މާލެ، 10 ޖެނުއަރީ 2021 -- މާލެ ސަރަހައްދުގައި ކޮވިޑް ކޭސްތައް ވަރަށް ބޮޑަށް އިތުރުވުމާ ގުޅިގެން އެޗްޕީއޭ އިން އިއްޔެ ވަނީ ކޮވިޑުން ރައްކާތެރިވުމުގެ ގޮތުން ފިޔަވަޅުތައް އަޅާފަ އެވެ. މުހިއްމު އެއް ފިޔަވަޅަކީ މާލެ ސަރަހައްދުން އަތޮޅުތަކަށް ފުރާ މީހުން ފުރުމުގެ 72 ގަޑިއިރު ކުރިން ޕީީސީއާރް ޓެސްޓް ހެދުމަށް މަޖުބޫރު ކުރުމެވެ. އެކަމާ ގުޅިގެން އަމާޒުވި ފާޑުކިޔުންތަކުގެ ސަބަބުން އެޗްޕީއޭ އިން ފަހުން ވަނީ މިއަދާއި މާދަމާ ފުރާ މީހުންނަށް ޕީސީއާރް ހެދުމަށް ދެ ގޮތެއް ހަމަޖައްސައިދީފަ އެވެ. އެއްގޮތަކީ މާލެއިން ސާމްޕަލްއެއް ނެގުމަށްފަހު ދަތުރުކޮށް ނަތީޖާ ލިބެންދެން ކަރަންޓީންގައި ހުރުމެވެ. ދެވަނަ ގޮތަކީ އެމީހަކު ދަތުރުކުރާ ރަށަކަށް ދަތުރުކޮށް، ރަށުން ސާމްޕަލް ނަގާ ޓެސްޓްކުރުމަށްފަހު، ނަތީޖާ ލިބެންދެން ކަރަންޓީނުގައި ހުރުމެވެ. އެޗްޕީއޭ އިން ފަހުން ލުއި ދިން ނަމަވެސް އެތައް ސަތޭކަ ބަޔަކު ވަނީ މާލޭގެ ސޯޝަލް ސެންޓަރު ކައިރީގައި ރެއާއި މިއަދު ވެސް ކިއު ހަދާފަ އެވެ. ކިޔުގައި ތިބި ބައެއް މީހުން ރޭ ވަރަށް ދަންވަންދެން އެ މީހުންގެ ތުއްތު ކުދިން އުރައިގެން އެތައް އިރަކު ކިޔުގައި ތިއްބެވެވެ. އެޗްޕީއޭ އިން ބުނީ އެ އެޖެންސީން ފަހުން ދިން ލުޔާ އެކު ޕީސީއާރް ހެދުމަށް ކިޔު ދިގުވާން ޖެހޭ ސަބަބެއް ނޯންނާނެ ކަމަށެވެ. -- މުހައްމަދު ހުމާމް އަހްމަދު | އަވަސް