މާލެ، 15 ޖެނުއަރީ 2021 -- މޯލްޑިވްސް ނެޝަނަލް ޕާޓީ (އެމްއެންޕީ)ގެ ކެންޑިޑޭޓް އަބްދުލްހަންނާން އިދުރީސްގެ ކެމްޕޭން ޖަގަހަ ރޭ ހުޅުއްވައިދެއްވީ ހަންނާން އެވެ. މި އިވެންޓްގައި އެމްއެންޕީގެ ލީޑަޝިޕްގެ އިސް ބޭފުޅުންނާއި ހަންނާނަށް ތާއީދުކުރާ ފަރާތްތަކުން ބައިވެރިވި އެވެ. ހަންނާންގެ ކެމްޕޭން ޖަގަަހަތައް މީގެކުރިން ކޮމަންޑޫ ދާއިރާގެ ތިން ރަށް ކަމަށްވާ ކޮމަންޑޫ، މަރޮށި އަދި ފޯކައިދޫގައި ހުޅުވާފައިވެ އެވެ. ކޮމަންޑޫ ދާއިރާގެ އިންތިހާބުގެ ފޯރި ވަރަށް ގަދަވެފައިވާއިރު ކެންޑިޑޭޓުންގެ ކެމްޕޭން ހަރަކާތްތައް ވެސް ވަރަށް ބޮޑަށް އިތުރުކޮށްފައިވެ އެވެ. ހަންނާންގެ ކެމްޕޭން ޓީމު ތަކުން މިހާރު ވަނީ ކޮމަންޑޫ ދާއިރާގެ ހުރިހާ ރަށެއްގެ ހުރިހާ ގެއަކަށް ޑޯޓްޑޯ ހަރަކާތް ހިންގުމަށްފަހު މާލެއާއި ހުޅުމާލޭގައި ޑޯޓްޑޯ ހަރަކާތްތައް ފަށާފަ އެވެ. އެމްއެންޕީން ބުނީ ހަންނާނަށް ގޮނޑި ލިބިއްޖެނަމަ ކޮމަންޑޫ ދާއިރާގެ މެންބަރަކު މިހާތަނަށް ނުކުރައްވާ ވަރަށް ރައްޔިތުންގެ ހިދުމަތުގައި ހަންނާން މަސައްކަތް ކުރައްވާނެ ކަމަށެވެ. އަދި އެއްވެސް ރައްޔިތަކު ތަފާތުކޮށްގެން ހަންނާން މަސައްކަތް ނުކުރައްވާނެ ކަމުގެ ޔަގީންކަން އެމްއެންޕީން ދެ އެވެ. ހަންނާނަކީ ކޮމަންޑޫ ދާއިރާގެ އެންމެ ބޮޑު ރަށް ކަމުގައިވާ ކޮމަންޑޫ އަށް ނިސްބަތްވާ ބޭފުޅެކެވެ. އަދި އޭނާ އަކީ ތައުލީމީ ދާއިރާގައި 32 އަހަރު ހިދުމަތްކުރައްވާ އެތައް ބަޔަކު ބިނާ ކުރެއްވި ޕްރިންސިޕަލެއް އަދި ޓީޗަރެކެވެ. -- ސާމީ | އަވަސް