އއ. މަތިވެރި ، ޖުލައި 07، 2022: އއ. މަތިވެރީ ޔޫނިއަން ސްޕޯޓްސް ކްލަބް (ޔޫއެސްސީ) ގެ 16 ވަނަ ފުޓްސަލް ޓޯނަމަންޓް އިއްޔެ ހަވީރު ވަނީ ފަށާފައެވެ. މަތިވެރީގެ އެންމެ ގިނަ ދުވަސްވީ ޖަމިއްޔާއިން ބާއްވާ މި މުބާރާތުގައި މި އަހަރު 8 ޓީމު ވާދަ ކުރެއެވެ. މިއީ މަތިވެރީގައި ބާއްވާ ކުޅިވަރުގެ އެންމެ ބޮޑު އަދި އެންމެ ޝަރަފުވެރި މުބާރާތެވެ. މި އަހަރުގެ މުބާރާތުގެ ޗެންޕިއަން ޓީމަށް ދޭ ފައިސާގެ އަދަދު ވެސް ވަނީ ބޮޑުކޮށްފައެވެ. މި ފަހަރު ޗެމްޕެއިން ޓީމަށް 35،005 ރުފިޔާ ދިނުމަށް ނިންމާފައިވެއެވެ. ރަނަރަޕް ޓީމަށް 11،005 ރުފިޔާ ދިނުމަށް ވަނީ ނިންމާފައެވެ. މިއީ މިދިޔަ 15 އަހަރުގެ ތާރީހުގައި އެންމެ އަގުބޮޑު މުބާރާތެވެ. މި އަހަރުގެ މުބާރާތް ބާއްވަނީ "ރައުޗް ޔޫއެސްސީ ސިކްސްޓީންތް ފުޓްސަލް ޓޯނަމަންޓް 2022" ގެ ނަމުގައެވެ. ޓައިޓްލް ސްޕޮންސަރަކީ ހެޕީ މާކެޓްގެ ރައުޗް ބްރޭންޑެވެ.