މާލެ، ސެޕްޓެމްބަރު 10، 2022: އިންޑިއާގެ ޓާޓާ ކުންފުންޏަށް މާލޭގެ ހަތަރު ސަރަހައްދެއްގައި އެޕާޓްމަންޓް ކޮމްޕްލެކްސް ހަދަން އެންމެ ފުރަތަމަ ބިން ދޫކުރީ އެމްޑީޕީގެ ފުރަތަމަ ވެރިކަމުގައި 2010 ވަނަ އަހަރު އެވެ. ދޫކުރި ބިންތަކުގެ ތެރެއިން މިހާތަނަށް މަސައްކަތް ނިންމާ މީހުން ދިރިއުޅެނީ އަރަބިއްޔާ ކުރިން ހިންގި ބިމާއި ގާކޮށީގައި ހަދާފައިވާ އެޕާޓްމަންޓްތަކުގަ އެވެ. މި ދެ ބިމުގެ އިތުރުން ޓާޓާ ކުންފުންޏަށް ދެން ދޫކޮށްފައިވަނީ އޯޑިއޯން ބިމުގެ އިތުރުން ސަރުކާރު މުވައްޒަފުންގެ ނާދީ ކުރިން ހިންގި ބިމެވެ. މި ދެ ބިމުގައި އަމަލީ މަސައްކަތް ފަށާފައި ނުވާ ކަމަށް ބުނެ 2017 ވަނަ އަހަރުގެ އޭޕްރީލް މަހު ރައީސް އަބްދުﷲ ޔާމީންގެ ވެރިކަމުގައި ވަނީ ޓާޓާ ކުންފުންޏާ އެކު ހަދާފައިވާ އެއްބަސްވުން ބާތިލްކޮށްފަ އެވެ. ނަމަވެސް ރައީސް އިބްރާހީމް މުހައްމަދު ސޯލިހް ވެރިކަމާ ހަވާލުވެވަޑައިގެން އޯޑިއޯން ބިމާއި ނާދީ ބިން މިއަހަރުގެ ތެރޭގައި އަލުން ވަނީ ޓާޓާ ކުންފުންޏަށް ދޫކޮށްފަ އެވެ. އޯޑިއޯން ބިމުގައި އެޕާޓްމަންޓް އެޅުމުގެ އަމަލީ މަސައްކަތް ޓާޓާ ކުންފުނިން މިހާރު ވަނީ ފަށާފަ އެވެ. މި މަސައްކަތް ކުރަނީ ރާއްޖޭގެ އަމިއްލަ ކުންފުންޏެއް ކަމަށްވާ ރެއިންބޯ ކޮންސްޓްރަކްޝަނާ ހަވާލުކޮށްގެންނެވެ. އެކުންފުނިން މިދިޔަ މެއި މަހުގެ ތެރޭގައި މަސައްކަތް ފަށާފައިވާއިރު އެ ބިމުގައި އެޅުމަށް ހަމަޖެހިފައިވަނީ 10 ފަންގިފިލާގެ ލަގްޒަރީ އެޕާޓްމަންޓް ކޮމްޕްލެކްސް އެކެވެ. އޯޑިއޯން ބިމުގައި ހަދާ އެޕާޓްމަންޓްތަކުގެ މަސައްކަތް އެއްކޮށް ނިމޭނީ 2025 ވަނަ އަހަރު އެވެ. -- ފޮޓޯ: ޔާމިން މުހައްމަދު | އަވަސް