މާލެ، އޮކްޓޯބަރް 10، 2022: އިދިކޮޅު ޕީޕީއެމް އާއި ޕީއެންސީގެ އިސްވެރިންނާއި އާންމު ބައެއް މެންބަރުން މިއަދު އަޑުއުފުލީ މަސްވެރިންގެ ހައްގުތައް ހޯދައިދިނުމަށް ސަރުކާރަށް ގޮވާލަމުންނެވެ. ކަރުދާސްތަކެއްގައި ޝުއޫރުތައް ލިޔެފައި ހުރިއިރު މައިގަނޑު ކަންބޮޑުވުމެއްގެ ގޮތުގައި ފާހަގަކުރީ މަސްވެރިން ބާނާ މަހަށް ހަމަ އަގު ނުދިނުމާއި މަސްވެރިން ބާނާ މަސް ކިރުވޭނެ ގޮތެއް މިސަރުކާރަށް ހަމަޖައްސައިދެވިފައި ނުވުމެވެ. ރައީސް އިބްރާހީމް މުހައްމަދު ސޯލިހްގެ ސަރުކާރުން ރާއްޖޭގެ މަސް ކަނޑުތައް ބޭރުގެ ފަރާތްތަކަށް ވިއްކާލައި މަސްވެރިންނަށް ހިޔާނާތްތެރިވަމުންދާ ކަމަށްވެސް ތުހުމަތުކޮށްފައިވެ އެވެ. މުޒާހަރާގެ ބައިވެރިން ވަނީ މަސް މާރުކޭޓް ސަރަހައްދުގައި މުޒާހަރާ ފެށުމަށްފަހު ޖުމްހޫރީ މައިދާނާ ދިމާލަށް ދިއުމަށް މަސައްކަތް ކޮށްފަ އެވެ. ނަމަވެސް ފުލުހުން އެ ސަރަހައްދު ބަންދުކޮށްފައި އޮތުމުން މުޒާހަރާގެ ބައިވެރިންނަށް އެ ސަރަހައްދަށް ވަދެވޭ ގޮތެއް ނުވި އެވެ. ޕީޕީއެމް އިން ބުނި ގޮތުގައި މުޒާހަރާގެ ތެރެއިން 10 މީހުން ހައްޔަރުކުރި އެވެ. -- ފޮޓޯ: އަހްމަދު އަޒާން | އަވަސް