މާލެ، 20، އޮކްޓޯބަރް 2022: މާލޭގެ ކާނިވާ ސަރަހައްދުގައި ސިޓީ ކައުންސިލްގެ ގަސް ފިހާރަ ހުޅުވާފައިވަނީ "މާލެ ފެހި" ނަމުގަ އެެވެ. ސިޓީ ކައުންސިލުން ބުނި ގޮތުގައި އާންމުންނަށް ގަސް ގަނެވޭނެ ގޮތަށް ހެދުމުގެ ބޭނުމަކީ މާލެ ފެހިކުރުމަށް ބޭނުންވާ މީހުންނަށް އެ ފުރުސަތު ފަހިވެގެންދާނެ ގޮތަށް އެކަން ކުރުން ކަމަށެވެ. އަދި މިކަމުގެ ސަބަބުން އަމިއްލަ ގޭގައި އަދި ގޯތިތެރޭގައި ގަސްހެއްދުމަށް ބޭނުންވާ މީހުންނަށްވެސް ފުރުސަތުލިބިގެން ދާނެ ކަމަށެވެ. މިފިހާރައިގައި 25 ބާވަތެއްގެ ގަހާއި ގަސްހެއްދުމަށް ބޭނުންވާ އެކި ސާމާނު ލިބެން އެބަހުއްޓެވެ. މާލޭގެ މޭޔަރު ޑރ. މުހައްމަދު މުއިއްޒު ވިދާޅުވީ މިހާރުވެސް އެކި މީހުން ގަސްތައް ގަތުމަށް އެދެމުންދާ ކަމަށެވެ. މިކަމުގެ ސަބަބުން މާލެ ސިޓީ ކައުންސިލަށް އާމްދަނީއެއް ލިބޭނެ މަގުފަހިވެގެންދާނެ ކަމަށްވެސް މޭޔަރު ގަބޫލުކުރައްވަ އެވެ. މާލެ ފެހި ފިހާރަ ހުޅުވާފައި ހުންނާނީ ހެނދުނު 8:30 އިން މެންދުރު 12:00 އަށް، މެންދުރު ފަހު 2:00 އިން 6:00 އަށް އަދި ރޭގަނޑު 8:00 އިން 10:00 އަށެވެ. -- ފޮޓޯ : އަޙުމަދު އަޒާން | އަވަސް