މާލެ، 05، ޑިސެމްބަރު 2022: މާލެ ބޭރުގައި އޮތް ކްރޫޒްލައިން -- ސެވެން ސީސް އެކްސްޕްލޯރާ އިން މިއަދު މާލެއަށް 600 ފަތުރުވެރިން ޒިޔާރާތްކުރި އެވެ. ފަތުރުވެރިން މާލެއަށް ފޭބީ މާލޭގެ މޫނުމަތީގެ ގޮތުގައި ބަލައި ޖުމްހޫރީ މައިދާނާ ދިމާލުގެ ފާލަންތަކުންނެވެ. އެ ސަރަހައްދުގައި ފަތުރުވެރިންނަށް ހިދުމަތް ދިނުމަށްޓަކައި ވަގުތީ އިންތިޒާމުތަކެއް ހުރީ ރާވާފަ އެވެ. ނަމަވެސް އެއީ ޖެހިޖެހިގެން ތިން އަހަރު ވޯލްޑް ލީޑިން ޑެސްޓިނޭޝަންގެ އެވޯޑް ހޯދާފައިވާ ރާއްޖޭގެ ވެރިރަށުގައި ހުންނަންވާނެ އިންތިޒާމުތަކެއް ނޫނެވެ. އިށީދެ ތިބެވޭނެ ގޮތެއް ނެތެވެ. ގަދަ ހޫނުގައި ހިޔާވާނެ ގޮތެއް ނެތެވެ. ޓޫރިސްޓް ޕޮލިހުން ފަތުރުވެރިންނަށް ކަންކަން ބުނެދިނުމަށް މަސައްކަތް ކުރި އެވެ. ޓްރެފިކް ބެލެހެއްޓުމުގައި ފުލުހުން ހަރަކާތްތެރިވި މަންޒަރުވެސް ފެނުނެވެ. ހަރުދަނާ އިންތިޒާމުތަކެއް ނެތި ފަތުރުވެރިން މާލެ ތެރޭގައި ގިނައިރުތަކަކު އުޅުމަށްފަހު އެނބުރި ކުްރޫޒްލައިނަށް ދިޔައީ ހަވީރު ވަނިކޮށެވެ. އަދި މިއަދު އިރުއޮއްސެނިކޮށް ސެވެން ސީސް އެކްސްޕްލޯރާ ވަނީ ރާއްޖެއިން ފުރާފަ އެވެ. -- ފޮޓޯ: އަހްމަދު އަޒާން | އަވަސް