މާލެ، 03، ޖެނުއަރީ 2023: މާލޭގައި ވިލިމާލޭގެ ފެރީ ޓާމިނަލަކީ ކޮންމެ ދުވަހަކުވެސް އެތައް ސަތޭކަ ބަޔަކު ބޭނުންކުރަމުންދާ ޓާމިނަލެކެވެ. މިތަނުގައި މިވަގުތު ޖާގަ ނެތުމާއި ހިދުމަތް ހޯދުމުގައި ހުރި ބައެއް ދަތިތައް އާންމުން ފާހަގަކުރެ އެވެ. އެމްޓީސީސީން ގެންދަނީ ތަނުގެ ހާލަތަށް ބަލައިގެން އާންމުންނަށް ވީހާވެސް ފަސޭހަވާނެ ގޮތަކަށް ހިދުމަތްތައް އިންތިޒާމު ކުރެވޭތޯ މަސައްކަތް ކުރަމުންނެވެ. އެމްޓީސީސީގެ ސީއީއޯ އާދަމް އާޒިމް ވިދާޅުވި ގޮތުގައި ވިލިމާލެ ފެރީ ޓާމިނަލް ތަރައްގީކުރުމުގެ ގޮތުން ޕްލޭނެއް އެކުލަވާލުމުގެ މަސައްކަތް ވަނީ ފަށާފަ އެވެ. ޕްލޭން ނިމުނުހާ އަވަހަކަށް ފެރީ ޓާމިނަލް ތަރައްގީކުރުމުގެ އަމަލީ މަސައްކަތް ފަށާނެ އެވެ. ކުރީގެ ރައީސް އަބްދުﷲ ޔާމީންގެ ސަރުކާރުގައި 2016 ވަނަ އަހަރު ވިލިމާލެ ފެރީ ޓާމިނަލް އަލުން އިމާރާތްކޮށް ތަރައްގީކުރަން ކޮންޓްރެކްޓްގައި ސޮއި ވެސް ކުރިއެވެ. މިގޮތުން 12 ބުރީގެ އިމާރާތެއް އެޅުމަށް ނިންމައި އެ އިމާރާތުގެ ބްލޫ ޕްރިންޓަށް 500،000 ރުފިޔާ ވަނީ ހޭދަކޮށްފައެވެ. އަދި އެ މަޝްރޫއުގެ އެޑްވާންސް ޕޭމަންޓްގެ ގޮތުގައި އެމްޓީސީސީއަށް 17 މިލިއަން ރުފިޔާ ދީފައިވާ ކަމަށް އޭރު ރިޕޯޓްކޮށްފައިވެ އެވެ. މީގެ އިތުރުން އެ އެއްބަސްވުމާ ގުޅިގެން އެމްޓީސީސީން ފުރަތަމަ ޓާމިނަލް ހުރި ބިން ހުސްކޮށް ވަގުތީ ޓާމިނަލެއް ހެދި އެވެ. މިހާރު ބޭނުންކުރަމުން އެދަނީ އެ ވަގުތީ ޓާމިނަލެވެ. ނަމަވެސް ސަރުކާރު ބަދަލުވުމާއިއެކު އޭރުގެ ޕްލޭން ކުރިއަށް ނުގެންދަން ވަނީ ނިންމާފަ އެވެ. -- ފޮޓޯ: އަހްމަދު އަޒާން | އަވަސް