މާލެ، 12، ފެބްރުއަރީ 2023: މާލޭގެ އަމީނީ މަގުގައި ތާރު އެޅުމުގެ މަސައްކަތް އެމްޓީސީސީއާ ހަވާލުކޮށްފައިވާ ކަމަށް ކަމާ ގުޅޭ އިދާރާތަކުން ހާމަކުރީ މިދިޔަ ހުކުރު ދުވަހު އެވެ. ރޯޑް ޑިވެލޮޕްމެންޓް ކޯޕަރޭޝަން (އާރްޑީސީ)އާ ހަވާލުކޮށްގެން ހަދަމުންދާ އަމީނީ މަގުގައި ތާރުއެޅުމުގެ މަސައްކަތް އެމްޓީސީސީއާ ހަވާލުކުރީ މަސައްކަތް އަވަސްކުރުމުގެ ގޮތުންނެވެ. އާރްޑީސީ އިން އަމީނީމަގުގައި ޕޭވިންގެ މަސައްކަތް މިހާރު ނިންމާފައި އޮތް ހިސާބުގައި ތާރުއަޅަން އެމްޓީސީސީއާ މަސައްކަތް ހަވާލުކުރީ ހުކުރު ދުވަހު އެވެ. ޕޭވިންގެ މަސައްކަތް ނިމިފައިވާ ހިސާބުގައި (އަމީނީ މަގުގެ އެންމެ އިރުމަތިކޮޅުން ފެށިގެން ސްޓެލްކޯ ހެޑް އޮފީހާ ހަމައަށް) ގިނަވެގެން ހަތް ދުވަސް ތެރޭގައި ތާރުއަޅާ ނިންމާލާނެ ކަމަށް އެމްޓީސީސީ އިން ދަނީ ބުނަމުންނެވެ. މާލޭގެ އަމީނީ މަގު ހަދަން ސަރުކާރުން އާރްޑީސީއާ ހަވާލުކުރީ ޖުލައި 3، 2022ގައި 84 މިލިއަން ރުފިޔާ އަށެވެ. މަސައްކަތް ނިންމަން ދީފައިވަނީ ހަތް މަސް ދުވަހެވެ. އެކަމަކު މިހާރު މަސައްކަތް ނިމޭނެ ކަމަށް މިއަހަރުގެ ސެޕްޓެމްބަރު 27 ވަނަ ދުވަހަށެވެ. -- ފޮޓޯ: މުހައްމަދު ޒައިން އިބްރާހީމް | އަވަސް