މާލެ، 17 ސެޕްޓެމްބަރ 2020 -- ރޭގަނޑު 8:00 އިން 10:00 ދުއްވާއެޗެހި މަނާ ވަގުތަކަށް ވުމުން މާލޭގެ މަގުތައް ހަމަހިމޭން ވެފައިވާ އޮންނަ ވަގުތަކަށް ވެއެވެ. އެހެންވެ ލޮކްޑައުންގެ ހާސްކަމާއި އައިސޮލޭޝަންގެ ބަންދުކަމުން ނުކުމެ ހަށިފުރާ ނޭވާއެއް ލާން ބޭނުންވެފައި ތިބި އެތައް ބަޔަކު ދުވާ ބޫޓު ނަގައިގެން މިހާރު އުޅެނީ މަގުތަކަށް ނިކުމެ އެ ގަޑީގައި ދުވާށެވެ. ރޭގަނޑު އަށަކާއި 10:00 ޖެހުމާ ދެެމެދު ރިންގް ރޯޑް ހީވަނީ ދުވާ މީހުންނަށް އީދެއް އައިސްގެން އުޅޭހެންނެވެ. ކުޑައެއް ބޮޑެއް ނެތި، އާއިލާ ތަކާއި ލޯބިވެރިން ވެސް މިގަޑިތަކުގައި އުޅެނީ ދުވަން ނުކުމެއެވެ. ދުއްވާ އެއްޗެހީގެ އުނދަގުލެއް ނެތުމުން މަގުތަކުގައި ދުވާ މީހުންގެ މޫނު މަތިން ފެންނަނީ އުފާވެރި ކަމެވެ -- އާއިމް ޒަމީރު | އަވަސް