ޖިއްދާއިން މާލެއަށް: ދަމުނަމާދުގެ ދުޢާ އާއި މާނަ

ތިރީގައި ބަޔާންވެގެން އެވަނީ ރަމަޟާން މަހުގެ ފަހު ދިހައިގެ ދަމު ނަމާދުގެ ވިތުރީގައި އިސްލާމީ މަރުކަޒުގައި ވޭތުވެ ދިޔަ އަހަރުތަކުގައި އަޅުގަނޑު ކިޔަމުން އައި ދުޢާއާއި އޭގެ ދިވެހި މާނަ އެވެ. އެ ދުޢާތަކުގެ ތެރޭގައި ވަނީ ކީރިތި ރަސޫލުﷲ ޞައްލަﷲ ޢަލައިހި ވަސައްލަމަގެ ސުންނަތުން ޘާބިތުވާ ދުޢާތަކެވެ. ވަރަށް ގިނަ އަޚުންނާއި އުޚުތުން އެދިވަޑައިގަންނަވާތީ މި ދުޢާތައް މާނައާ އެކު ޙިއްސާކޮށްލުމަކީ ލިބޭ އުފަލެކެވެ. ތިޔަ ބޭފުޅުންގެ ހެޔޮ ދުޢާއަށް އެދެމެވެ.

دعاء القنوت:
اَللَّهُمَّ لَكَ الْحَمْدُ أَنْتَ قَيِّمُ السَّمَوَاتِ وَاْلأَرْضِ وَمَنْ فِيهِنَّ وَلَكَ الْحَمْدُ لَكَ مُلْكُ السَّمَوَاتِ وَاْلأَرْضِ وَمَنْ فِيهِنَّ وَلَكَ الْحَمْدُ أَنْتَ نُورُ السَّمَوَاتِ وَاْلأَرْضِ وَمَنْ فِيهِنَّ وَلَكَ الْحَمْدُ أَنْتَ مَلِكُ السَّمَوَاتِ وَاْلأَرْضِ وَلَكَ الْحَمْدُ أَنْتَ الْحَقُّ وَوَعْدُكَ الْحَقُّ وَلِقَاؤُكَ حَقٌّ وَقَوْلُكَ حَقٌّ وَالْجَنَّةُ حَقٌّ وَالنَّارُ حَقٌّ وَالنَّبِيُّونَ حَقٌّ وَمُحَمَّدٌ صَلَّى اللَّهُ عَلَيْهِ وَسَلَّمَ حَقٌّ وَالسَّاعَةُ حَقٌّ

މާނައީ: اَللَّهُمَّ ހައްދަވާ ބޮޑު ކުރެއްވި ރަސްކަލާކޮ! ތިޔައިލާހަށް ގިނަގުނަ ޙަމްދާއި ސަނާ ދަންނަވަމެވެ. ތިޔައީ އުޑުތަކާއި ބިމާއި އެތަންތާނގައިވާހާ މަޚްލޫޤުން އުފައްދަވައި، ގެންގުޅުއްވައި، ބަލަހައްޓަވާ އިލާހެވެ. ތިޔައިލާހަށް ގިނަގުނަ ޙަމްދާއި ސަނާ ދަންނަވަމެވެ. އުޑުތަކާއި ބިމާއި އެތަންތާނގައިވާހާ މަޚްލޫޤުން މިލްކުވެ ވޮޑިގެންވަނީ ތިޔައިލާހަށެވެ. ތިޔައިލާހަށް ގިނަގުނަ ޙަމްދާއި ސަނާ ދަންނަވަމެވެ. އުޑުތަކާއި ބިމާއި އެތަންތާނގައިވާހާ މަޚްލޫޤުންނަށް ހިދާޔަތުގެ ނޫރުން ނޫރުދެއްވައި މަގުދަކަވަނީ ތިޔައިލާހެވެ. ތިޔައިލާހަށް ގިނަގުނަ ޙަމްދާއި ސަނާ ދަންނަވަމެވެ. އުޑުތަކާއި ބިމާއި އެތަންތާނގައިވާހާ މަޚްލޫޤުންގެ ވެރިފަރާތަކީ ތިޔައިލާހެވެ. ތިޔައިލާހަށް ގިނަގުނަ ޙަމްދާއި ސަނާ ދަންނަވަމެވެ. ތިޔައީ ޙައްޤުއިލާހެވެ. ތިޔައިލާހުގެ ވަޢުދާއި ޢަހްދަކީ ޙައްޤު ތެދުބަސްފުޅެވެ. ތިޔައިލާހުގެ ޙަޟުރަތަށް ގޮސް ތިޔައިލާހާ ކުއްތަންވުމަކީ ޙައްޤުތެދުކަމެކެވެ. ތިޔައިލާހުގެ ވަޙީބަސްފުޅުތަކަކީ ތެދުބަސްފުޅެވެ. ސުވަރުގެއަކީ ތެދު އެއްޗެކެވެ. ނަރަކައަކީ ޙައްޤު ތެދު އެއްޗެކެވެ. އެންމެހާ ނަބިއްޔުންނީ ތެދުބޭކަލުންނެވެ. މުޙައްމަދު ޞައްލަﷲ ޢަލައިހި ވަސައްލަމަ އަކީ ތެދުބޭކަލެކެވެ. ޤިޔާމަތް ދުވަހަކީ ޙައްޤުތެދު ދުވަހެކެވެ.


اللَّهُمَّ لَكَ أَسْلَمْناَ، وَبِكَ آمَناَّ، وَعَلَيْكَ تَوَكَّلْناَ، وَإِلَيْكَ أَنَبْناَ، وَبِكَ خَاصَمْناَ، وَإِلَيْكَ حَاكَمْناَ، فَاغْفِرْ لَناَ مَا قَدَّمْناَ وَمَا أَخَّرْناَ، وَمَا أَسْرَرْناَ وَمَا أَعْلَناَّ، أَنْتَ الْمُقَدِّمُ وَأَنْتَ الْمُؤَخِّرُ لاَ إِلَهَ إِلاَّ أَنْتَ وَلاَ حَوْلَ وَلاَ قُوَّةَ إِلاَّ بِاللَّهِ وَأَنْتَ عَلَى كُلِّ شَيْءٍ قَدِيرٌ.

اَللَّهُمَّ ހައްދަވާ ބޮޑު ކުރެއްވި ރަސްކަލާކޮ! ތިޔައިލާހުގެ އަމުރުފުޅުތަކާއި ނަހީތަކަށް އަޅަމެން ކިޔަމަންވެ ތަބާވަމެވެ. ތިޔައިލާހުގެ އަމުރުފުޅުތަކާއި ނަހީތައް ތެދުކޮށް ޤަބޫލުކުރަމެވެ. އަޅަމެންގެ އެންމެހައި ކަންތަކެއް ތިޔައިލާހުގެ ޙަޟުރަތާ ޙަވާލުކޮށް ތިޔައިލާހަށް ވަކީލު ކުރަމެވެ. ތިޔައިލާހުގެ ޙަޟުރަތުގައި އަޅަމެންގެ ދިރިއުޅުމުގެ ކަންތަކުގައި ތަދްބީރު ކުރެއްވުމަށް އެދިދަންނަވަމެވެ. އަޅަމެންގެ އެންމެހައި ކަންތަކެއް ހިންގަވައި ތަޤްދީރު ކުރެއްވުމަށް އެދިދަންނަވަނީ ވެސް ތިޔައިލާހުގެ ޙަޟުރަތުގައެވެ. ފަހެ އަޅަމެންގެ ފާފަ ފުއްސަވާނދޭވެ. އަޅަމެން އިހުގައި ކޮށްފައިވާ ފާފަތައް ވިއަސް، ފަހުގައި ކުރާނެ ފާފަތައް ކަމުގައިވިއަސް، ސިއްރުން ކުރެވޭ ފާފަތައް ކަމުގައިވިއަސް، ފާޅުގައިކުރެވޭ ފާފަތައް ކަމުގައި ވިއަސް އެވެ. ތިޔައީ އެންމެ އިސްވެ ވޮޑިގެންވާ ފަރާތެވެ. އަދި އެންމެ ފަސްވެ ވޮޑިގެންވާ، އަބަދަށް ދެމިވޮޑިގެންވާ ފަރާތެވެ. ތިޔައިލާހު ފިޔަވައި ޙައްޤުވެގެން އަޅުކަމެއްވެވޭ އިލާހަކު ނުވެއެވެ. ހުރިހާ އާރަކާއި ބާރެއްވަނީ ﷲ އަށް މިލްކުވެ ވޮޑިގެންނެވެ. ތިޔައީ ހުރިހާ އެއްޗެއްގެ މައްޗަށް ކުޅަދުންވަންތަވެ ވޮޑިގެންވާ އިލާހެވެ.

اَللَّـهُمَّ اهْـدِنَا فِيمَنْ هَـدَيتَ، وَعَافِـنَا فِيمـَنْ عَافَـيْتَ، وَتَوَلَّنَا فِيْمَنْ تَوَلَّيتَ، وَبَارِكْ لَنَا فِيمَا أَعْطَيْتَ، وَقِـنَا شَـرَّ مَا قَضَيتَ، إِنَّكَ تَقْضِي وَلاَ يـُقْضَى عَلَيكَ، إِنَّهُ لاَ يَذِلُّ مَنْ وَالَيتَ، وَلاَ يَعِـِـزُّ مَنْ عَادَيْتَ، تَبَارَكْتَ رَبَّنَا وَتَعَـالَيتَ، لَكَ الْحَمْدُ عَلَى مَا قَـضَيتَ، وَلَكَ الشُّكْرُ عَلى مَا أَعْـطَيتَ، نَسْتَغْـفِـُركَ اللَّـهُمَّ مِنْ جَمِيْعِ الذُّنُوبِ وَالْخَطَـايَا وَنَتُوبُ إِلَيْكَ.

اَللَّهُمَّ ހައްދަވާ ބޮޑު ކުރެއްވި ރަސްކަލާކޮ! ތިޔަ އިލާހު ތެދުމަގު ދެއްކެވި މީހުންގެ ތެރޭގައި އަޅަމެންނަށް ތެދުމަގު ދައްކަވައިފާނދޭވެ! އަދި ތިޔަ އިލާހު ސަލާމަތުން ލެހެއްޓެވި މީހުންގެ ތެރޭގައި، އަޅަމެން ސަލާމަތުން ލަހައްޓަވާނދޭވެ! އަދި ތިޔަ އިލާހު އެހީތެރިވެ ވޮޑިގަތް މީހުންގެ ތެރޭގައި އަޅަމެންނަށް އެހީތެރިވެ ވޮޑިގަންނަވާނދޭވެ. އަދި ތިޔަ އިލާހު އަޅަމެންނަށްދެއްވި ތަކެތީގައި ބަރަކާތް ލައްވައިފާނދޭވެ. އަދި ތިޔަ އިލާހު މިންވަރުކުރައްވާފައިވާ ނުބައި ގޮތްތަކުން އަޅަމެން ދިންނަވާނދޭވެ! ފަހެ ހަމަކަށަވަރުން މިންވަރުކުރައްވަނީ ތިޔަ އިލާހެވެ. ތިޔަ އިލާހުގެ ޙުކުމްފުޅުގެ މައްޗަށް އެކަކަށް ވެސް މިންވަރު ނުކުރެވޭ ހުއްޓެވެ. އަދި ހަމަކަށަވަރުން ތިޔަ އިލާހު އެހީތެރިވެ ވޮޑިގެންފި މީހަކު ނިކަމެތިވެގެން ނުދާ ހުއްޓެވެ. އަދި ތިޔަ އިލާހު ނިކަމެތި ކުރައްވަން އިރާދަކުރެއްވި މީހަކު ޢިއްޒަތްތެރި ނުވާ ހުއްޓެވެ. އަޅަމެންގެ ވެރި ރަސްކަލާކޮ! ތިޔަ އިލާހުގެ މަތިވެރި ކަމާއި ހުސްޠާހިރުވަންތަ ކަމާއެވެ. ފަހެ، ތިޔަ އިލާހު މިންވަރުކުރައްވާފައިވާ ގޮތަކާމެދު، ތިޔަ އިލާހުގެ ޙަޟްރަތަށް ޙަމްދުސަނާ ހުއްޓެވެ. އަދި ތިޔައިލާހުގެ ދެއްވި ރޯދިބަރަކާތްތަކަށް ގިނަގުނަ ޝުކުރު ދަންނަވަމެވެ. އަޅަމެންގެ ވެރި ރަސްކަލާކޮ! އަޅަމެންގެ އެންމެހައި ފާފަތަކާއި ކުށްތައް ފުއްސަވާނދޭވެ. ތިޔަ އިލާހުގެ ޙަޟްރަތަށް އަޅަމެން ތައުބާވެ، ފުއްސަވައިދެއްވުމަށް ދަންނަވަމެވެ.

اَللَّهُمَّ أَقْسِمْ لَنَا مِنْ خَشْيَتِكَ مَا تَحُوْلُ بِهِ بَيْنَنَا وَبَينَ مَعْـصِيَتَكَ، وَمِنْ طَاعَـتِكَ مَا تُبَلِّـغُــنَا بِهِ جَنَّتَـكَ، وَمِنَ الْيَقِـيْنِ مَا تُهَـوِّنُ بِهِ عَـلَينَا مَصَائِبَ الدُّنْيَا، وَمَتِّـعْـنَا اللَّهُمَّ بِأَسْمَاعِـنَا وَأَبْصَارِنَا وَقُـوَّاتِـنَا مَا أَبْقَـيتَنَا، وَاجْعَـلْهُ الوَارِثَ مِنَّـا وَاجْعَـلْ ثَأْرَنَا عَلَى مَنْ ظَلَمَنَا، وَانْصُرْنَا عَلَى مَنْ عَادَانَا، وَلاَ تَجْعَـلْ مُصِيبَـتَـنَا فِي دِيـنِنَا، وَلاَ تَجْعَـلِ الدُّنْيَا أَكْبَرَ هَـمِّنَا، وَلاَ مَبْلَغَ عِلْمِنَا، وَلاَ إِلىَ النَّارِ مَصِيرَنَا، وَاجْعَـلِ الْجَنَّةَ هِيَ دَارَنَا، وَلاَ تُسَلِّطُ عَـلَيْنَا بِذُنُوبِـنَا مَن لاَّيَخَافُـكَ فِينَا وَلاَ يَرْحَمُـنَا

اَللَّهُمَّ ހައްދަވާ ބޮޑު ކުރެއްވި ރަސްކަލާކޮ! އަޅަމެންނާއި ތިޔަ އިލާހު މަނާކުރައްވާފައިވާ އުރެދުންތަކާ ދެމެދު ފަރުދާއެއް ކަމުގައި އަޅަމެންގެ ހިތްތަކުގައި ތިޔަ އިލާހަށް ބިރުވެތިކަން ލައްވާނދޭވެ! އަދި ތިޔަ އިލާހަށް ކިޔަމަންތެރި ވުމަކީ އެކަމުގެ ޒަރިއްޔާއިން ތިޔަ އިލާހުގެ ސުވަރުގެ އަޅަމެނަށް ނަސީބުކުރަށްވާ ކަމެއް ކަމުގައި ލައްވާނދޭވެ! އަދި ދުނިޔޭގައި އަޅަމެންގެ މައްޗަށް ފާވަމުންދާ މުޞީބާތަކީ ތިޔަ އިލާހުގެ ކުޅަދުންވަންތަ ކަމުން، ތަޤްދީރުގައި ނިޔާ ކުރެވިގެންވާ ކަމެއް ކަމާމެދު އީމާންވެ ހިތުގައި ޔަޤީންކަން ލަހައްޓަވާނދޭވެ! އަޅަމެންގެ ވެރި ރަސްކަލާކޮ! އަޅަމެން ދިރިދެމި ތިބިހާ ހިނދަކު އަޅަމެންގެ އިވުމާއި ފެނުމާއި ހަށިގަނޑުގެ ހަކަތަ ލަހައްޓަވައި އެހިއްސުތަކުން ތިޔައިލާހަށް ކިޔަމަންތެރި ކަމާއެކު ފައިދާ ލިބޭގެ ގޮތް ލައްވާނދޭވެ! އަދި އަޅަމެން މަރުވަންދެން ޞައްޙަ ސަލާމަތުން އެތަކެތި ލަހައްޓަވާނދޭވެ! އަޅަމެންގެ މައްޗަށް އަނިޔާވެރިވީ ބައެއްގެ ފަރާތުން ބަދަލު ހިފުމުގެ އެދުން އަޅަމެންގެ ކިބައިގައި ނުލައްވާނދޭވެ! އަޅަމެންގެ ތެރޭން އަޅަމެންގެ ދީނަށް ޙުރުމަތްތެރިކޮށް ނުހިތާ މީހުންނާހެދި އަޅަމެންނަށް މުޞީބާތެއް ނުޖައްސަވާނދޭވެ! އަދި ދުނިޔޭގެ މުދަލާއި ޖާހަކީ އަޅަމެންގެ އެންމެ ބޮޑު މަޤްޞަދު ކަމުގައްޔާއި އަޅަމެން ނަރަކައަށް ދާންޖެހޭ ސަބަބެއް ކަމުގައްޔާއި އަޅަމެންގެ ޢިލްމާއި ފިކުރުގެ އިންތިހާ ކަމުގައި ނުލައްވާނދޭވެ! ސުވަރުގެ އަކީ އަޅަމެންގެ ގޯތި ކަމުގައި ލައްވާނދޭވެ! އަޅަމެންނަށް ކުރެވޭ ފާފަޔާ ހުރެ، ތިޔަ އިލާހަށް ބިރުވެތިނުވާ، އަޅަމެންނަށް އޯގާތެރިވުމެއް ނެތް ވެރިން އަޅަމެންގެ މައްޗަށް ފާނުކުރައްވާނދޭވެ!

اللَّهُمَّ أَصْلِحْ لَنَا دِينَنَا الَّذِي هُوَ عِصْمَةُ أَمْرِنَا وَأَصْلِحْ لَنَا دُنْيَانَا الَّتِي فِيهَا مَعَاشُنَا وَأَصْلِحْ لَنَا آخِرَتَنَا الَّتِي فِيهَا مَعَادُنَا وَاجْعَلِ الْحَيَاةَ زِيَادَةً لَنَا فِي كُلِّ خَيْرٍ وَاجْعَلِ الْمَوْتَ رَاحَةً لَنَا مِنْ كُلِّ شَرٍّ
اَللَّهُمَّ ހައްދަވާ ބޮޑު ކުރެއްވި ރަސްކަލާކޮ! އަޅަމެންގެ ދެދުނިޔޭގެ އަބުރާއި ކަރާމާތުގެ ގޮތުގައި ތިޔައިލާހު ލައްވާފައިވާ އިސްލާމް ދީން އަޅަމެންނަށްޓަކައި ލުއި ފަސޭހަ ކުރައްވާނދޭވެ! އަދި އަޅަމެން ދިރިއުޅެމުން މިދާ ދުނިޔެއިން އަޅަމެންނަށް އުފަލާއި ހަމަޖެހުން ދެއްވާނދޭވެ! އަދި އަޅަމެން ދާންއޮތް އުޚްރަވީ ދުނިޔެ ވެސް އަޅަމެންނަށް ހިތްހަމަޖެހޭ ތަނެއްގެ ގޮތުގައި ލައްވާނދޭވެ! އަދި ދިމާވާ ކޮންމެ ހެއުކަމެއް ކުރުމަށް ތައުފީޤު ދެއްވައި، އަޅަމެންގެ ދިރިއުޅުން އިތުރު ކުރައްވާނދޭވެ! އަދި ފާފައާއި ގެއްލުންދެނިވި ނުބައި ކަމާ ދިމާވެއްޖެނަމަ އެއަށްވުރެން މަރު ހެއުއެއްޗެއް ކަމުގައި ލައްވާނދޭވެ!

اَللَّهُمَّ إِنَّا نَسْأَلـُكَ فِعْـلَ الْخَيْرَاتِ، وَتَرْكَ الْمُنْكَرَاتِ، وَحُبَّ الْمَسَاكِينِ، وَأَنْ تَغْـفِـرَ لَنَا وَتَرْحَمَنَا وَتَتُوبَ عَلَيْنَا، وَإِذَا أَرَدتَّ بِقَـوْمٍ فِـتْنَةً فَـتَوَفَّـنَا غَـيْرَ مَفْـتُونِينَ، وَنَسْأَلُكَ حُبَّـكَ، وَحُبَّ مَنْ يُحِـبُّكَ، وَحُبَّ عَـمَلٍ يُقَـرِّبُنَا إِلَى حُـبِّـِك، يَا رَبَّ الْعَــالَمِـينَ .

اَللَّهُمَّ ހައްދަވާ ބޮޑު ކުރެއްވި ރަސްކަލާކޮ! އަޅަމެންނަށް ހެއު ކަންތައް ކުރުމަށާއި މުންކަރާތްތަކުން ދުރުހެލިވުމަށާއި ނިކަމެތިންގެ ފަރާތުން ރުހުމާއި ލޯބި ލިބުމުގެ ތައުފީޤު ދެއްވުން އެދި ތިޔަ އިލާހުގެ ޙަޟުރަތުގައި ދަންނަވަމެވެ. އަދި އަޅަމެންގެ ފާފަ ފުއްސެވުމާއި އަޅަމެންނަށް އޯގާތެރިވެ ވޮޑިގަތުމާއި އަޅަމެންގެ ތައުބާ ޤަބޫލުކުރެއްވުން އެދިވެސް ދަންނަވެމެވެ. ބަޔަކަށް މުޞީބާތެއް ޖައްސަވަން އިބަ ރަސްކަލާނގެ އެދިވޮޑިގަންނަވާނަމަ، އެފިތުނައިގައި އަޅަމެން ނުޖައްސަވާ އަޅަމެން މަރުގަންނަވާނދޭވެ! އަދި އަޅަމެން ތިޔަ އިލާހުގެ ލޯތްބާއި ތިޔަ އިލާހު ދެކެ ލޯބިވާ މީހުންގެ ލޯތްބާއި ރުހުމާއި ތިޔަ އިލާހުގެ ލޮބުވެތިކަން ލިބުމުގައި ތިޔަ އިލާހުގެ ޙަޟުރަތަށް ކުއްތަން ވެވޭފަދަ ޢަމަލުތަކަށް ރުހި އެކަންކަން ކުރުމުގެ ތައުފީޤު އަޅަމެނަށް ދެއްވާނދޭވެ!

اَللَّهُمَّ اغْـفِـرْ لَنَا .. وَارْحَمْـنَا .. وَأَعْـتِـقْ رِقَابَنَـا مِنَ النَّـارِ .
اَللَّهُمَّ اغْـفِـرْ لَنَا .. وَارْحَمْـنَا .. وَأَعْـتِـقْ رِقَابَنَـا مِنَ النَّـارِ
اَللَّهُمَّ اغْـفِـرْ لَنَا .. وَارْحَمْـنَا .. وَأَعْـتِـقْ رِقَابَنَـا مِنَ النَّـارِ.

އަޅަމެންގެ ވެރި ރަސްކަލާކޮ! އަޅަމެންގެ ފާފަ ފުއްސަވާނދޭވެ! އަދި އަޅަމެންނަށް އޯގާތެރިވެ ވޮޑިގަންނަވާނދޭވެ! އަޅަމެން ނަރަކައިން ސަލާމަތް ކުރައްވާނދޭވެ!

اللَّهُمَّ إِنَّا نَسْأَلُكَ بِكُلِّ اسْمٍ هُوَ لَكَ سَمَّيْتَ بِهِ نَفْسَكَ أَوْ عَلَّمْتَهُ أَحَدًا مِنْ خَلْقِكَ أَوْ أَنْزَلْتَهُ فِي كِتَابِكَ أَوْ اسْتَأْثَرْتَ بِهِ فِي عِلْمِ الْغَيْبِ عِنْدَكَ أَنْ تَجْعَلَ الْقُرْآنَ الْعَظِيمَ رَبِيعَ قَلْبِنَا وَنُورَ صُدُورِنَا وَجِلاَءَ أَحْزَانِنَا وَذَهَابَ هُمُومِنَا وَغُمُومِنَا وَسَائِقُنَا وَدَلِيلُنَا إِلَيْكَ، وَإِلَى جَنَّاتِ النَّعِيمِ. اَللَّهُمَّ ذَكِّرْنَا مِنْهُ مَا نَسِينَا، وَعَلِّمْنَا مِنْهُ مَا جَهِلْنَا، وَارْزُقْنَا تِلاَوَتَهُ آنَاءَ اللَّيْلِ وَأَطْرَافَ النَّهَارِ عَلَى الْوَجْهِ الَّذِي يُرْضِيكَ عَنَّا.

اَللَّهُمَّ ހައްދަވާ ބޮޑު ކުރެއްވި ރަސްކަލާކޮ! ތިޔަ އިލާހުގެ އެންމެހައި އިސްމުފުޅުތަކުގެ ބަރަކާތުން އަޅަމެން އެދެމެވެ. އެނަންފުޅަކީ ތިޔަ އިލާހުގެ ޒާތުފުޅަށް ދެއްވި ނަންފުޅެއް ކަމުގައި ވިއަސް އެވެ. ނުވަތަ ތިޔަ އިލާހުގެ މަޚްލޫޤަކަށް އުނގަންނަވައި ދެއްވާފައި އޮތް ނަންފުޅެއް ކަމުގައި ވިއަސްއެވެ. ނުވަތަ ތިޔަ އިލާހުގެ ކަލާމްފުޅުގައި ބާވައިލައްވާފައި އޮތް ނަންފުޅެއް ކަމުގައި ވިއަސް އެވެ. ނުވަތަ ތިޔަ އިލާހުގެ ޢިލްމުގައި ސިއްރުކުރައްވާފައިވާ ނަންފުޅެއް ކަމުގައި ވިއަސްއެވެ. ކީރިތި ޤުރުއާނަކީ އަޅަމެންގެ ހިތްތަކުގެ ހަމަޖެހުންކަމުގައްޔާއި ހިތްތަކުގެ ނޫރުކަމުގައްޔާއި އަޅަމެންގެ ހިތާމަތަކުގެ މޮޅިވެރިކަމާއި އުދާސްތައް ފިއްލެވުމުގެ ސަބަބެއް ކަމުގައްޔާއި ތިޔަ އިލާހުގެ ޙަޟްރަތަށް އަޅަމެން ކުއްތަންވުމުގައި މަގުދައްކައިދެނިވި ފަރާތެއް ކަމުގައްޔާއި އެހީތެރިއެއްކަމުގައި ލައްވާނދޭވެ! އަދި އަޅަމެން ޤުރުއާނުގެ ޛަރީޢާއިން ސުވަރުގެ ވައްދަވާނދޭވެ! اَللَّهُمَّ ހައްދަވާ ބޮޑު ކުރެއްވި ރަސްކަލާކޮ! ޤުރުއާނުން އަޅަމެނަށް ހަނދުމަ ނެތިފައި ހުރި ތަކެތި ހިތަށް ގެންނަވައި ހަނދުމަކޮށް ދެއްވާނދޭވެ! އަދި އަޅަމެންނަށް އެއިން ނޭގި ހުރި ތަކެތި އުނގަންނަވައި ދެއްވާނދޭވެ! އަދި ތިޔަ އިލާހު ރުހި ވޮޑިގަންނަވާ ގޮތް މަތީ، ރޭގަނޑާއި ދުވާލުގެ އެކި ގަޑިގަޑީގައި އަޅަށް ޤުރުއާން ކިޔެވުމުގެ ތައުފީޤު ދެއްވާނދޭވެ!

اللَّهُمَّ إِنَّا نَعُوذُ بِكَ مِنْ جَهْدِ الْبَلاَءِ وَدَرَكِ الشَّقَاءِ وَسُوءِ الْقَضَاءِ وَشَمَاتَةِ اْلأَعْدَاءِ
اَللَّهُمَّ ހައްދަވާ ބޮޑު ކުރެއްވި ރަސްކަލާކޮ! ނުއުފުލޭވަރުގެ ބުރަ ތަކްލީފުތަކާއި މުޞީބާތްތަކުންނާއި ދެދުނިޔޭން އަބާއްޖަވެރިކަން ކުރިމަތިވުމުންނާއި ފުރާނައާއި ޢާއިލާއާއި ދަރިންނާއި މުދަލަށް ގެއްލުން ވުމުންނާއި ޢަދާވާތްތެރިންނަށް ޢަދާވާތްތެރިންގެ ފަރާތުން ކުރިމަތިވާ އުނދަގޫތަކުން އަޅަމެން ސަލާމަތްވުން އެދި ތިޔަ އިލާހުގެ ޙަޟުރަތުގައި ދަންނަވަމެވެ.

اللَّهُمَّ هَوِّنْ عَلَيْنَا سَكَرَاتِ الْمَوْتِ، وَارْزُقْنَا قَبْلَ الْمَوْتِ تَوْبَةً، وَعِنْدَ الْمَوْتِ شَهَادَةً، وَبَعْدَ الْمَوْتِ جَنَّةً وَنَعِيماً، بِرَحْمَتِكَ يَا أَرْحَمَ الرَّاحِمِينَ

اَللَّهُمَّ ހައްދަވާ ބޮޑު ކުރެއްވި ރަސްކަލާކޮ! މަރުގެ ސަކަރާތުގެ ވަގުތު އަޅަމެނަށް ލުއިގޮތް ދައްކަވާނދޭވެ! އަދި މަރުވުމުގެ ކުރިން ތައުބާވުމުގެ ނަޞީބު ދެއްވައި، މަރުގެންނެވޭ ވަގުތު ޝަހާދަތުގެ ދެކަލިމަ ދޫމައްޗަށް ގެނައުމާއި މަރުވުމަށް އަޅަމެންނަށް ތިޔަ އިލާހުގެ ނިޢުމަތުގެ ގޯތި، ސުވަރުގެ ދެއްވުމުގެ ހެއު ނަޞީބު ލައްވާނދޭވެ! އޭ އެންމެ ބޮޑަށް އޯގާވަންތަ ރަސްކަލާނގެއެވެ!

اللَّهُمَّ احْفَظِ الْمَسْجِدَ اْلأَقْصَى مِنَ اليَهُودِ الْغَاصِبِينَ، وَارْزُقْنَا اللَّهُمَّ فِيهِ صَلاَةً قَبْلَ الْمَمَاتِ، بِرَحْمَتِكَ يَا أَرْحَمَ الرَّاحِمِينَ

اَللَّهُمَّ ހައްދަވާ ބޮޑު ކުރެއްވި ރަސްކަލާކޮ! ގަދަކަމުން މަސްޖިދުލް އަޤްޞާގެ ފޭރިގެންފައިވާ ޔަހޫދީންގެ ކިބައިން އެމިސްކިތް ސަލާމަތް ކުރައްވާނދޭވެ! އަދި ތިޔަ އިލާހުގެ ރަޙްމަތާއި އޯގާތެރި ކަމާއެކު، އަޅަމެން މަރުގެންނެވުމުގެ ކުރިން އެމިސްކިތަށް ޒިޔާރަތްކޮށް އެތާނގައި ނަމާދެއް ކުރުމުގެ މަގު ފަހި ކުރައްވާނދޭވެ! އޭ އެންމެ ބޮޑަށް އޯގާވަންތަ ރަސްކަލާނގެއެވެ!

اَللَّهُمَّ أَعِزَّ اْلإِسْلاَمَ وَالْمُسْلِمِينَ، وَانْصُرِ اْلإِسْلاَمَ وَالْمُسْلِمِينَ، وَانْصُرْ إِخْوَانَنَا الْمُجَاهِدِينَ فِي كُلِّ مَكَانٍ. اَللَّهُمَّ سَدِّدْ رَمْيَهُمْ، وَافْتَحْ لَهُمْ فَتْحاً مُبِيناً، وَانْصُرْهُمْ نَصْراً عَزِيزاً، وَاجْعَلْ لَهُمْ قُوَّةً تُرْهِبُ بِهَا عَدُوَّكَ وَعَدُوَّهُمْ يَا أَرْحَمَ الرَّاحِمِينَ

اَللَّهُمَّ ހައްދަވާ ބޮޑު ކުރެއްވި ރަސްކަލާކޮ! އިސްލާމް ދީނަށާއި މުސްލިމުންނަށް ގަދަކަން ދެއްވައި އެއުރެންނަށް ނަޞްރު ދެއްވާނދޭވެ! އަދި އަޅަމެންގެ އަޚުން ކަމުގައިވާ މުޖާހިދުންނަށް އެންމެހައި ކަންކޮޅުތަކުގައި ކާމިޔާބު ދެއްވާނދޭވެ! اَللَّهُمَّ ހައްދަވާ ބޮޑު ކުރެއްވި ރަސްކަލާކޮ! އެއުރެންގެ ހަތިޔާރުތައް ސީދާ ކުރައްވާނދޭވެ! އަދި އެއުރެންނަށް ޞުލްޙަވެރި ފަތަޙައެއް ދެއްވައި، ބޮޑުވެގެންވާ ނަޞްރެއް ދެއްވާނދޭވެ! އަދި އެއުރެންގެ ޢަދާވާތްތެރިންނާއި ތިޔައިލާހުގެ ޢަދާވާތްތެރިން ޖެހިލުންވެ، ހިތްގުޑާވަރުގެ ބާރެއް އެއުރެންނަށް ދެއްވާނދޭވެ! އޭ އެންމެ ބޮޑަށް އޯގާވަންތަ އިލާހެވެ.

اللَّهُمَّ أَصْلِحْ جَمِيعَ وُلاَةَ الْمُسْلِمِينَ، اللَّهُمَّ اجْعَلْهُمْ رَحْمَةً عَلَى شُعُوبِهِمْ وَرَعَايَاهُمْ، وَوَفِّقْ إِمَامَنَا وَوَلِيِّ أَمْرِنَا إِلَى كُلِّ مَا تُحِبُّهُ وَتَرْضَاهُ، هَيِّئًا لَهُ قَوْلاً سَدِيداً، وَعَمَلاً رَشِيداً، وَالْبَطَانَةَ الصَّالِحَةَ النَّاصِحَةَ الَّتِي تُعِينُهُ عَلَى الْخَيْرِ وَتَدُلُّهُ عَلَيْهِ.

اَللَّهُمَّ ހައްދަވާ ބޮޑު ކުރެއްވި ރަސްކަލާކޮ! އިސްލާމީ ދުނިޔޭގެ ވެރިން އިޞްލާޙުކުރައްވާނދޭވެ! اَللَّهُمَّ ހައްދަވާ ބޮޑު ކުރެއްވި ރަސްކަލާކޮ! އަދި އެމީހުންގެ ހިތްތަކުގައި އެމީހުންގެ މުވާޠިނުންނާއި ރައްޔިތުންގެ މައްޗަށް އޯގާތެރިކަން ލައްވާނދޭވެ! އަދި އަޅަމެންގެ ވެރިޔާއަށާއި ނައިބަށް ތިޔަ އިލާހު ރުހިވޮޑިގެންނަވާ ގޮތުގެ މަތީން އުޅުމަށާއި ހެއު ބަސް ބުނުމާއި ތެދުމަގަށް ޢަމަލު ކުރުމުގެ ތައުފީޤު ދެއްވާނދޭވެ! އަދި އެއުރެންގެ ބައިވެރިންނާއި އެކުވެރިންގެ ގޮތުގައި އެއުރެންނަށް ހެއުގޮތް އަންގައިދޭނެ ޞާލިޙުންތަކެއް ލައްވާނދޭވެ!

اللَّهُمَّ اهْدِ شَبَابَ أُمَّةِ مُحَمَّدٍ أَجْمَعِين، اَللَّهُمَّ حَبِّبْ إِلَيْهِمُ اْلإِيمَانَ، وَزَيِّنْهُ فِي قُلُوبِهِمْ، وَكَرِّهْ إِلَيْهِمُ الْكُفْرَ وَالْفُسُوقَ وَالْعِصْيَانَ، وَاجْعَلْنَا وَإِيَّاهُمْ مِنَ الرَّاشِدِينَ.

اَللَّهُمَّ ހައްދަވާ ބޮޑު ކުރެއްވި ރަސްކަލާކޮ! މުޙައްމަދުގެފާނުންގެ އުއްމަތުގެ ޒުވާނުންނަށް ތެދުމަގު ދައްކަވާނދޭވެ! އަދި އެމީހުންގެ ހިތްތަކުގައި އީމާންކަމުގެ ލޯބި ޖައްސަވައި، އެއިން އެމީހުންގެ ހިތްތައް ޒީނަތްތެރި ކުރައްވާނދޭވެ! އަދި އެމީހުންގެ ގާތުގައި ކުފުރުވެރިކަމާއި ފާސިޤުކަމާއި އުރެދުމަކީ ނުރުހޭ ކަންތައް ކަމުގައި ލައްވައި އެއުރެން އެންމެންނަށް ތެދުމަގު ދައްކަވާނދޭވެ!

اللَّهُمَّ اغْفِرْ لَنَا، وَلِوَالِدِينَا، وَلِجَمِيعِ أَقَارِبِنَا، اللَّهُمَّ اغْفِرْ لَهُمْ وَارْحَمْهُمْ ، وَاكْتُبْ لَهُمُ التَّوْفِيقَ، وَيَسِّرْ أُمُورَهُمْ.
اَللَّهُمَّ ހައްދަވާ ބޮޑު ކުރެއްވި ރަސްކަލާކޮ! އަޅަމެންނަށާއި އަޅަމެންގެ މައިބަފައިންނަށާއި އަޅަމެންގެ އެންމެހައި ގާތްތިމާގެ މީހުންނަށް ފާފަ ފުއްސަވާނދޭވެ! اَللَّهُمَّ ހައްދަވާ ބޮޑު ކުރެއްވި ރަސްކަލާކޮ! އެއުރެންނަށް ފުއްސަވައި އެއުރެންނަށް އޯގާތެރިވެ ވޮޑިގަންނަވާނދޭވެ! އަދި އެއުރެންގެ ދުނެޔެވީ ކަންކަމުގައި މަގުފަހިކޮށް ދެއްވައި އެއުރެންނަށްޓަކައި ތިޔައިލާހުގެ ރަޙްމަތް ކަނޑައަޅުއްވާނދޭވެ!

اللَّهُمَّ اغْفِرْ لِجَمِيعِ مَوْتَى الْمُسْلِمِينَ، اللَّهُمَّ اغْفِرْ لَهُمْ وَارْحَمْهُمْ وَعَافِهِمْ وَاعْفُ عَنْهُمْ وَأَكْرِمْ نُزُلَهُمْ وَوَسِّعْ مُدْخَلَهُمْ وَاغْسِلْهُمْ بِالْمَاءِ وَالثَّلْجِ وَالْبَرَدِ وَنَقِّهِمْ مِنَ الذُّنُوبِ وَالْخَطَايَا كَمَا نَقَّيْتَ الثَّوْبَ اْلأَبْيَضَ مِنَ الدَّنَسِ وَأَبْدِلْهُمْ دَارًا خَيْرًا مِنْ دَارِهِمْ وَأَهْلاً خَيْرًا مِنْ أَهْلِهِمْ وَزَوْجًا خَيْرًا مِنْ زَوْجِهِمْ وَأَدْخِلْهُمُ الْجَنَّةَ وَأَعِذْهُمْ مِنْ عَذَابِ الْقَبْرِ وَمِنْ عَذَابِ النَّارِ وَارْحَمْنَا اللَّهُمَّ بِرَحْمَتِكَ إِذَا صِرْنَا إِلَى مَا صَارُوا إِلَيْهِ، تَحْتَ الْجَنَادِلِ وَالتُّرَابِ وَحْـدَنَا.
اَللَّهُمَّ ހައްދަވާ ބޮޑު ކުރެއްވި ރަސްކަލާކޮ! މުސްލިމުންގެ ތެރެއިން މަރުވަފައިތިބި އެންމެންގެ ފާފަ ފުއްސަވާނދޭވެ! އަދި އެއުރެންނަށް ފުއްސެވުމާއެކު އޯގާތެރިވެ ވޮޑިގަންނަވާނދޭވެ! އަދި އެއުރެންގެ ކުށްތައް ފިއްލަވައި ޞިއްޙަތާއި ޢާފިޔަތުގެ ނިޢުމަތް އެއުރެންނަށް ދެއްވާނދޭވެ! އަދި އެއުރެންނަށް ސުވަރުގެއިން ނިޢުމަތް ނަޞީބު ކުރައްވައި، ކަށްވަޅުގެ ގޮވަތި ތަނަވަސްކޮށް ދެއްވާނދޭވެ! އަދި ފެނުންނާއި ގަނޑުފެނުންނާއި ފިނިފެނުގެ ޒަރީޢާއިން މިލައާއި ހަޑިތަކެތިން ހުދުހެދުން ދޮވެސާފުވެވޭ ފަދައިން އެމީހުންގެ ފާފަ ފުއްސަވައި ދޮވެ ސާފު ތާހިރުކުރައްވާނދޭވެ. އެމީހުންގެ ގެތަކަށް ވުރެން ހެއު ގެތަކެއް އެބައިމީހުންނަށް މިންވަރުކުރައްވައި، އެބައިމީހުންގެ އަހުލުވެރިންނަށް ވުރެން ހެއު އަހުލުވެރިން އެބައިމީހުންނަށް ދައްކަވާނދޭވެ. އަދި އޭނާގެ ބައިވެރިޔާއަށް ވުރެން ރަނގަޅު ބައިވެރިއަކު ތިޔައިލާހުގެ ޙަޟުރަތުން އޭނާއަށް ދެއްވާނދޭވެ. އަދި އެބައިމީހުންނަށް ސުވަރުގޭގެ ނިޢުމަތް ދެއްވައި ކަށްވަޅާއި ނަރަކައިގެ ޢަޛާބުން އެއުރެން މިންޖުކުރައްވާނދޭވެ! اَللَّهُمَّ ހައްދަވާ ބޮޑު ކުރެއްވި ރަސްކަލާކޮ! ތިޔަ އިލާހުގެ ތަނަވަސް ރަޙްމަތުން އަޅަމެންނަށް ރަޙްމަތް ލައްވާނދޭވެ! އަދި އެކަހެރިވެ، ބިމާއި ވެލީގެ ދަށުގައިތިބެ، އެބައިމީހުން ދިޔަ މަގުން ތިޔަ އިލާހުގެ ޙަޟުރަތަށް ދިއުމުގެ މަގު އަޅަމެންނަށް ތަނަވަސްކޮށް ދެއްވާނދޭވެ!

اَللَّهُمَّ اجْعَلْنَا مِمَّنْ وُفِّقَ لِقِيَامِ لَيْلَةِ الْقَدْرِ، وَ اجْعَلْنَا مِمَّنْ صَامَ رَمَضَانَ إِيمَانًا وَاحْتِسَاباً.
اَللَّهُمَّ ހައްދަވާ ބޮޑު ކުރެއްވި ރަސްކަލާކޮ! ލައިލަތުލް ޤަދްރި މިންވަރު ކުރައްވާ މީހުންގެ ތެރެއިން އަޅަމެން ލައްވާނދޭވެ! އަދި ޔަޤީންކަމާއި އެކު ޘަވާބުލިބުމުގެ އުއްމީދުގައި ރަމަޟާން މަހުގެ ރޯދަ ހިފާ މީހުންގެ ތެރޭން އަޅަމެން ލައްވާނދޭވެ!
اَللَّهُمَّ أَعِدْ عَلَيْنَا رَمَضَانَ أَعْوَاماً عَدِيدَةً، وَأَزْمِنَةً مَدِيدَةً.
اَللَّهُمَّ ހައްދަވާ ބޮޑު ކުރެއްވި ރަސްކަލާކޮ! ރަމަޟާން މަސް ގިނަގިނައިން އަޅަމެނާ ހަމައަށް އައިސް އަޅަމެނާ ކުރިމަތި ވުމުގެ ތައުފީޤު ދެއްވާނދޭވެ!
اَللَّهُمَّ إِنَّكَ قُلْتَ فِي كِتَابِكَ الْكَـرِيمِ: (اُدْعُونِي أَسْتَجِبْ لَكُمْ إِنَّ الَّذِينَ يَسْتَكْبِرُونَ عَنْ عِبَادَتِي سَيَدْخُلُونَ جَهَنَّمَ دَاخِرِينَ ) ، نَسْأَلُكَ أَنْ تُرِيَنَا وَجْهَكَ الْكَرِيمِ فِي الْجَنَّةِ.

اَللَّهُمَّ ހައްދަވާ ބޮޑު ކުރެއްވި ރަސްކަލާކޮ! ތިޔަ އިލާހުގެ މޫރިތި ކަލާމްފުޅުގައި (ادْعُونِي أَسْتَجِبْ لَكُمْ إِنَّ الَّذِينَ يَسْتَكْبِرُونَ عَنْ عِبَادَتِي سَيَدْخُلُونَ جَهَنَّمَ دَاخِرِينَ ) މިފަދައިން ވަޙީކުރައްވައި އަންގަވާފައިވާ ފަދައިން، އަޅަމެން ތިޔަ ޙަޟުރަތުގައި މިއޮތްގެން ދަންނަވަނީއެވެ. އަޅަމެންނަށް ޤިޔާމަތް ދުވަހު ސުވަރުގޭގައި ތިޔަ އިލާހުގެ ވަޖުހުފުޅު ފެނުމުގެ ނަޞީބު ލައްވަނދޭވެ! (އާޔަތުގެ މާނައީ: ތިމަން އިލާހުގެ ޙަޟުރަތުގައި ދަންނަވާށެވެ! ތިމަން ﷲ ތިޔަބައިމީހުންގެ ދުޢާ އިޖާބަ ކުރައްވާހުށީމެވެ. ހަމަކަށަވަރުން ތިމަން ﷲއަށް އަޅުކަން ކުރުމާއި ދުޢާ ދެންނެވުމުގައި ބޮޑާވެގަނެ، އެއްކިބާވާ މީހުން ދަންނާށެވެ! ޔަޤީނުން ތިމަން ﷲ އެބައިމީހުން ނަރަކަށް ވައްދަވައި ނިމެތިކުރައްވާހުށީމެވެ.)
اَللَّهُمَّ أَرِنَا وَجْهَكَ الْكَرِيمَ فِي الْجَنَّةِ، لاَ تُحْرِمْنَا مِنَ الْجِنَانِ، وَلاَ تُطْرِدْنَا مِنَ الْجِنَانِ، وَلاَ تُحْجِبْنَا عَنِ الْجِنَانِ

اَللَّهُمَّ ހައްދަވާ ބޮޑު ކުރެއްވި ރަސްކަލާކޮ! ސުވަރުގޭގައި ތިޔަ އިލާހުގެ މޫރިތި ވަޖުހުފުޅު އަޅަމެންނަށް ދައްކަވާނދޭވެ! އަޅަމެން ސުވަރުގެ ދިއުމުން މަޙްރޫމު ނުކުރައްވާނދޭވެ! އަޅަމެން ސުވަރުގެއިން ބޭރުވެދިއުމުގެ ޢަމަލެއް އަޅަމެންގެ ކިބައިން ވިޔަދިއުމަށް އިރާދަ ނުކުރައްވާނދޭވެ! އަދި އަޅަމެންނާ ސުވަރުގެއާ ދެމެދު ޙިޖާބެއް ނުލައްވާނދޭވެ!

اَللَّهُمَّ إِنَّا نَعُوذُ بِرِضَاكَ مِنْ سَخَطِكَ، وَبِمُعَافَاتِكَ مِنْ عُقُوبَتِكَ، وَنَعُوذُ بِكَ مِنْكَ، لاَ نُحْصِي ثَنَاءً عَلَيْكَ، أَنْتَ كَمَا أَثْنَيْتَ عَلَى نَفْسِكَ

އަޅަމެންގެ ވެރި ރަސްކަލާކޮ. ތިޔައިލާހުގެ ޙަޟުރަތުން ރުހިވޮޑިގަތުން އެދޭޙާލު، ތިޔައިލާހުގެ ކޯފާއިން ސަލާމަތަށް އެދެމެވެ. އަދި ތިޔައިލާހުގެ ޙަޟުރަތުން ފުއްސެވުން އެދޭޙާލު، ތިޔައިލާހުގެ ޢަޒާބުން ސަލާމަތަށް އެދެމެވެ. އަދި ތިޔައިލާހުގެ ޙަޟުރަތުން ނޫންފަރާތަކުން ސަލާމަތަށް ނޭދޭނަމެވެ. ތިޔައިލާހުގެ ޙަޟުރަތުގައި ސަނާއާއި ތަޢުރީފުގެ ބަސްތައް ދެންނެވުމުގައި ތިޔައިލާހުގެ ޙަޟުރަތުން އަޅަމެންނަށް ލިބިފައިވާ ބަސްތަކަކުން މެނުވީ އެއްވެސް ސަނާއެއް ތިޔަ އިލާހަށް ދެންނެވުމުގެ ކުޅަދާނަކަން އަޅަމެންނަށް ލިބިގެނެއްނުވެއެވެ.

رَبَّنَا ظَلَمْنَا أَنْفُسَنَا وَإِنْ لَمْ تَغْفِرْ لَنَا وَتَرْحَمْنَا لَنَكُونَنَّ مِنَ الْخَاسِرِينَ
އަޅަމެންގެ ވެރި ރަސްކަލާކޮ! އަޅަމެން ވަނީ ފާފަވެރިވެ، އަޅަމެންގެ ނަފްސަށް އަނިޔާވެރިވެގެންފައެވެ. ތިޔަ އިލާހު އަޅަމެންނަށް އޯގާތެރި ވޮޑިނުގެން، އަޅަމެންގެ ފާފަ ނުފުއްސަވައިފިނަމަ އަޅަމެން ވާހުށީ ތިޔަ އިލާހުގެ ކޯފާއާއި ހަލާކުގެ ތެރޭގައިކަން ކަށަވަރެވެ.

رَبَّنَا تَقَبَّلْ مِنَّا إِنَّكَ أَنْتَ السَّمِيعُ الْعَلِيمُ، وَتُبْ عَلَيْنَا إِنَّكَ أَنْتَ التَّوَّابُ الرَّحِيم
އަޅަމެންގެ ވެރި ރަސްކަލާކޮ! އަޅަމެންގެ ދުޢާ ޤަބޫލުކުރައްވާނދޭވެ! ތިޔައީ ގިނަގިނައިން އަޑު އައްސަވާ ބޮޑަށް ބައްލަވައި ވޮޑިގަންނަވާ އިލާހެވެ. އަދި އަޅަމެންގެ ތައުބާ ޤަބޫލުކުރައްވާނދޭވެ! ތިޔައީ ގިނަގިނައިން ތައުބާ ޤަބޫލުކުރައްވާ، އޯގާވަންތަ އިލާހުކަން ކަށަވަރެވެ.

وَصَلَّى اللَّهُ عَلَى نَبِيِّنَا وَحَبِيبِنَا مُحَمَّدٍ وَعَلَى آلِهِ وَصَحَابِهِ أَجْمَعِينَ،
އަޅަމެންގެ ނަބިއްޔާ އަދި ލޮބުވެތި ސާހިބާ މުޙައްމަދުގެފާނުންގެ މައްޗަށް ﷲގެ ޙަޟުރަތުން ޞަލަވާތް ލައްވާނދޭވެ! އަދި އެކަލޭގެފާނުންގެ އެންމެހައި އާލުންނާއި އަޞްޙާބުންގެ މައްޗަށް ވެސް ޞަލަވާތް ލައްވާނދޭވެ! އާމީން!

سُبْحَانَ رَبِّكَ رَبِّ الْعِزَّةِ عَمَّا يَصِفُونَ، وَسَلامٌ عَلَى الْمُرْسَلِينَ، وَالْحَمْدُ لِلَّهِ رَبِّ الْعَالَمِينَ- آمين.
އެބައިމީހުން އެސިފަކުރާ ގޮތާމެދު ކަލޭފާނުންގެވެރި، ކަށަކުޅަދުންވަންތަ މަތިވެރި ﷲގެ ޒާތުފުޅު ހުސްޠާހިރުވެ ވޮޑިގެންވެއެވެ. އަދި އެންމެހައި ރަސޫލުބޭކަލުންގެ މައްޗަށް ސަލާމް ހުއްޓެވެ. އަދި ޢާލަމްތަކުގެވެރި ﷲއަށް ގިނަގުނަ ޙަމްދުސަނާ ކިޔަމެވެ. އާމީން.