ރާއްޖެއަށް މިދުވަސްވަރަކީ ހުޅަނގު މޫސުމުގެ ދުވަސްވަރެވެ. މި މޫސުމުގައި ގިނަ ދުވަސް ދުވަހު ވައިގަދަވެ، ބޯކޮށް ވާރޭވެހުމަކީ އެންމެ އާންމުކޮށް ހިނގާ ކަންކަމެވެ. އެގޮތުން މިއަދަކީވެސް ރާއްޖޭގެ ބޮޑު ބަޔަކަށް މޫސުން ގޯސް ދުވަހެކެވެ.
މޫސުމާ ބެހޭ ގައުމީ އިދާރާ އިން ވަނީ ބޯކޮށް ވާރޭ ވެހޭނެ ކަމަށް ލަފާކޮށް ރާއްޖޭގެ ބައެއް އަތޮޅުތަކަށް ވައިޓް އެލާޓްވެސް ނެރެފަ އެވެ. މިއަދު ހެނދުނު 10:00 އިން ފެށިގެން މެންދުރުފަހު 1:00 އާ ހަމައަށް އެލާޓް ނެރެފައި ވަނީ ޅ. އަތޮޅުން ފެށިގެން މ. އަތޮޅާ ހަމައަށެވެ.
ވައިޓް އެލާޓް ނެރެފައިވާ ސަރަހައްދުތަކަށް ބޯކޮށް ވާރޭ ވެހި ގުގުރާނެ ކަމަށް މެޓް އޮފީހުން ލަފާކުރެ އެވެ. އެލާޓް ނެރެފައިވާ ސަރަހައްދުތަކުގެ ތެރޭގައި މާލެ ސަރަހައްދުވެސް ހިމެނޭއިރު މިސަރަހައްދަށް މިއަދު ފަތިހުން ފެށިގެން ދަނީ ވާރޭވެހެމުންނެވެ.
މިއީ ހުޅަނގުގެ މޫސުމުގެ ދުވަސްވަރު ކަމަށްވާތީ ދިޔަވަރު ބޮޑު ވަގުތުތަކުގައި ނަގާ ބިޔަ ރާޅުތައް ވެސް ބައެއް ރަށްރަށުގެ ގޮނޑޮދޮށަށް ދަނީ ބިންދާލަމުންނެވެ. މިކަމުގެ ސަބަބުން ދިޔަވަރު ބޮޑުވާ ވަގުތުތަކުގައި ބައެއް ރަށްރަށަށް އުދައަރައި ގެއްލުންތަކެއް ލިބިދާނެ ކަމަށްވެސް ބައެއް އިދާރާތަކުން ލަފާކުރެ އެވެ.
މޫސުމާ ގައުމީ އިދާރާއިންނާއި ކަމާ ގުޅޭ އެހެން އިދާރާތަކުން ވެސް ގެންދަނީ މޫސުމަށް ސަމާލުވުމަށް ތަކުރާރުކޮށް އިލްތިމާސް ކުރަމުންނެވެ. ވައިގަދަވެ ކަނޑުގަދަ ނަމަ ކަނޑުދަތުރުތައް ފަސްކޮށްލުމަށް ނުވަތަ މަޑުޖައްސާލުމަށްވެސް އިދާރާ ތަކުން ދަނީ އިލްތިމާސްކުރަމުންނެވެ.
ރާއްޖޭގެ ބޮޑު ބަޔަކަށް ކުރަމުން މިދާ ވިއްސާރައިގައި ބައެއް ރަށްރަށުގައި ފެން ބޮޑުވުމާއި ބައެއް ރަށްރަށަށް އުދައެރުމުގެ ހާދިސާތައް މިހާރުވެސް ދަނީ ހިނގަމުންނެވެ. އެކަމަކު އަދި މިފަދަ ހާދިސާއެއްގައި މި ދެ ދުވަހަކު މާބޮޑު ގެއްލުންތަކެއް ލިބިގެން އެއްވެސް ރަށަކުން އަދި އުޅޭތީއެއް ނުފެނެ އެވެ.
މޫސުމަށް ސަމާލުވުމަށް އިދާރާތަކުން އަންގާ އެންގުންތަކަށް ހުރިހާ ފަރާތްތަކުންވެސް ސަމާލުވުން މުހިއްމެވެ. އޭރުން ލިބިދާނެ ގެއްލުމަކު ސަލާމަތްވެވިދާނެ އެވެ. އެހެން ނޫނީ ކުރަންޖެހޭ ހިތާމަ ބޮޑުވެދާނެ އެވެ.