ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު އިންޑިއާއަށް ފުރާވަޑައިގެންފި އެވެ.
ޑިއާގެ ރައީސް ދުރޫޕަދީ މުރުމޫގެ ދައުވަތަކަށް ކުރައްވާ މި ދަތުރުފުޅުގައި ރައީސް ފުރާވަޑައިގަތީ މިއަދު މެންދުރު 12:00 ގައި ވެލާނާ އިންޓަނޭޝަނަލް އެއާޕޯޓް (ވީއައިއޭ) އިންނެވެ.
ރައީސް އިންޑިއާއަށް ފުރާވަޑައިގަތީ އެގައުމުން ހަމަޖައްސާފައިވާ އެއާފޯސްގެ މަތިންދާބޯޓެއްގަ އެވެ. މި ދަތުރުފުޅު ކުރިއަށް ދާނީ މިމަހުގެ 6 އިން 10 އަށެވެ.
ރައީސްގެ މި ދަތުރުފުޅުގައި އިންޑިއާގެ ރައީސާއި، ބޮޑު ވަޒީރާއި އަދި އެ ގައުމު ބައެއް އިސް މަސްއޫލުވެރީންނާއި ބައްދަލުކުރައްވައި، ދެ ގައުމުގެ ގުޅުން އިތުރަށް ބަދަހިކުރެއްވުމަށް މަޝްވަރާ ކުރެއްވުމަށް ހަމަޖެހިފައިވެ އެވެ.
ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެންނެވި ފަހުން ޔޫއޭއީގައި ބޭއްވި "ކޮޕް-28"ގެ ހަވާސާގައި މިދިޔަ ޑިސެމްބަރު މަހުގެ ތެރޭގައި އެމަނިކުފާނު ވަނީ އިންޑިއާގެ ބޮޑު ވަޒީރާ ނަރެންދުރާ މޯދީއާ ފުރަތަމަ ފަހަރަށް ބައްދަލުކުރައްވާފަ އެވެ. އަދި މޯދީ ވެރިކަމުގެ ތިންވަނަ ދައުރަކަށް ހުވާ ކުރެއްވުމަށް ބޭއްވި ރަސްމިއްޔަތަށް އިންޑިއާއަށް ވަޑައިގެން މިއަހަރުގެ ޖޫން ނުވަވަނަ ދުވަހުވެސް ރައީސް މުއިއްޒު ވަނީ އިންޑިއާގެ ބޮޑު ވަޒީރާއި އެ ގައުމުގެ ރައީސްއާ ބައްދަލުކުރައްވާފަ އެވެ.
ރައީސް އޮފީހުން ބުނީ ރައީސް ޑރ. މުހައްމަދު މުއިއްޒު މިމަހު އިންޑިއާއަށް ކުރައްވާ ފުރަމާނަ ދަތުރުފުޅުގައި، އެމަނިކުފާނުގެ އަރިހުގައި ދިވެހި ސަރުކާރުގެ މަތީ ފެންވަރުގެ ވަފްދެއްވެސް ބައިވެރިވެވަޑައިގަންނަވާނެ ކަމަށެވެ. މި ދަތުރުފުޅުގައި ދިވެހި ވަފްދުގެ މެހްމާންދާރީގެ ހުރިހާ ކަމެއް ހަމަޖައްސަވައި ދެއްވަނީވެސް އިންޑިއާ ސަރުކާރުންނެވެ.
ރައީސް އޮފީހުން ބުނީ ރައީސް މުއިއްޒު ގެންދަވަނީ ރާއްޖޭގެ ހާރިޖީ ސިޔާސަތު ހަރުދަނާކުރައްވައި، ރާއްޖޭގެ ތަރައްގީއަށްޓަކައި މުހިއްމު ހުރިހާ ގައުމަކާވެސް ބަދަހި ގުޅުމެއް ބާއްވަވަމުން ކަމަށެވެ.