އެމެރިކާގެ ރައީސް ޖޯ ބައިޑަން ޕޫޓިންގެ އަރިހުގައި ސިއްރެއް ވިދާޅުވި ކަމަށް ރަޝިއާގެ ރައީސް ވިދާޅުވެއްޖެ އެވެ.
ޕޫޓިން ވިދާޅުވި ގޮތުގައި ޖޫން 16، 2021 ގައި، ސްވިޒަލޭންޑްގެ ޖެނީވާގައި އޮތް ބައިޑަން - ޕޫޓިން ސަމިޓްގައި ބައިޑަން ވިދާޅުވި ސިއްރަކީ ޔުކްރޭން ނޭޓޯގައި ބައިވެރިކުރުން 10 ވަރަކަށް ނުވަތަ 15 ވަރަކަށް އަހަރަށް ލަސްކުރެވިދާނެ ކަމަށެވެ.
އެމެރިކާގެ ވިސްނުން އޭރުވެސް އޮތީ ކޮންމެ ގޮތެއް ހަދާފައި ނަމަވެސް، ނޭޓޯގައި ޔުކްރޭން ބައިވެރިކުރާ ގޮތަށް ކަމަށް ޕޫޓިން ވިދާޅުވި އެވެ.
ޕޫޓިން ވިދާޅުވި ގޮތުން ހުޅަނގަށް މުގޫލާފައި އޮންނަ އަސްކަރީ ޖަމާއަތެއްގައި ޔުކްރޭން ބައިވެރިކުރުމަކީ ރަޝިއާއަށް ކެތްކުރެވޭނެ ކަމެއް ނޫނެވެ. އޭނާ އަދި ވިދާޅުވި 10 އަހަރަކީ އަދި 15 އަހަރަކީ ވެސް ރަޝިއާގެ ނިސްބަތުން އެސްފިޔަޖަހާލުން ކަމަށެވެ.
ނޭޓޯ ޖަމާއަތުގައި ޔުކްރޭން ބައިވެރިކުރާ ގޮތަށް އޮންނަ އެއްވެސް އެއްބަސްވުމަކަށް ރުހެވޭނެ ގޮތެއް ނޯންނާނެ ކަމަށް ޕޫޓިން ވިދާޅުވި އެވެ.
ޔުކްރޭން ހަނގުރާމަ ދިގުދެންމުމަކީ ރަޝިއާ އެދޭ ގޮތް ނޫން ކަމަށް ޕޫޓިން ވިދާޅުވި އެވެ. އެކަމަކު މިހާރުގެ ހާލަތަށް ރިއާޔަތްކުރައްވައި ގޮތެއް ނިންމަވާ ނަމަ، ޔުކްރޭން ހަނގުރާމަ ހުއްޓާލެވޭނީ ރަޝިއާގެ ހުރިހާ މުހުތާދެއް ފުރިހަމަވުމުން ކަމަށް އޭނާ ވިދާޅުވި އެވެ.
ސިޔާސީ ގޮތުން އަދި އަސްކަރީ ގޮތުން ރަޝިއާއަށް ހުރި ގޮންޖެހުންތައް ކޮޅެއްގައި ޖެހުމުން ޔުކްރޭން ހަނގުރާމަ ނިމޭނެ ކަަމަށް ޕޫޓިން ވިދާޅުވި އެވެ.
އެމެރިކާގެ ވެރިކަން ޖެނުއަރީ 21، 2025 ގައި ބަދަލުވުމާ އެކު، ރައީސް ޑޮނަލްޑް ޓްރަމްޕްގެ ޒައާމަތުގައި، ޔުކްރޭން ހަނގުރާމަ ހުއްޓުވުމަށް އެމެރިކާ ފޫގަޅާނެ އެވެ، މިއީ ޓްރަމްޕްގެ ރިޔާސީ ވައުދެއްވެސް މެއެވެ.
އެމެރިކާގައި ނޮވެމްބަރު ފަހެއްގައި އޮތް ރިޔާސީ އިންތިޚާބަށް ކެމްޕޭންކުރެއްވި ދުވަސްވަރު ޕޫޓިން ވަނީ ޔުކްރޭން ހަނގުރާމަ ހުއްޓުވާނެ ކަމަށް ވިދާޅުވެފަ އެވެ. ޔުކްރޭން ހަނގުރާމަ ހުއްޓުވުމަށް ޚާއްސަ ރޭވުމެއް އޮތް ކަމަށްވެސް އޭނާ ވިދާޅުވި އެވެ.
ނަމަވެސް، ރައީސްކަމާ ހަވާލުވެވަޑައިގަތުމުގެ ކުރިން އެ ރޭވުމާ ބެހޭ އެއްވެސް މައުލޫމާތެއް އާންމު ނުކުރައްވާނެ ކަަމަށް ޓްރަމްޕް ވިދާޅުވި އެވެ.