ރާއްޖޭގައި މަސައްކަތްކުރާ އިންޑިއާ މީހުންގެ މުސާރަ އެ ގައުމަށް ފޮނުވުމުގައި ދިމާވާ ދަތިތައް ހައްލުކުރަން ދިވެހި ސަރުކާރުގެ ކަމާގުޅޭ އިދާރާތަކާއެކު މަޝްވަރާ ކުރަމުންދާ ކަމަށް އިންޑިއާގެ އެކްސްޓާނަލް އެފެއާޒް މިނިސްޓްރީން ބުނެފި އެވެ.
އިންޑިއާގެ އެކްސްޓާނަލް އެފެއާޒް މިނިސްޓްރީން މިކަން ހާމަކޮށްފައިވަނީ އެ ގައުމުގެ ގާނޫނު ހަދާ މަޖިލިސް، ލޮކް ސަބާގައި މެންބަރަކު ކުރެއްވި ސުވާލަކަށް ލިޔުމުން ފޮނުވި ޖަވާބުގަ އެވެ.
ލޮކް ސަބާގެ މެންބަރަކު ވަނީ ރާއްޖޭގައި މަސައްކަތްކުރާ އިންޑިއާ މީހުންގެ މުސާރަ އެ ގައުމަށް ފޮނުވުމުގައި ދަތިތައް ދިމާވާކަން އިންޑިއާ ސަރުކާރުގެ ސަމާލުކަމަށް އައިސްފައިވޭތޯ ސުވާލުކޮށްފަ އެވެ. އެކަމުގެ ތަފުސީލާއި މައްސަލަ ހައްލުކުރުމަށް އިންޑިއާ ސަރުކާރުން މިހާތަނަށް ކޮށްފައިވާ އަދި ކުރަމުންދާ މަސައްކަތްތަކުގެ ތަފުސީލު ހޯދުމަށްވެސް އެދިފައިވެ އެވެ.
އިންޑިއާގެ އެކްސްޓާނަލް އެފެއާޒް މިނިސްޓްރީން ބުނީ ރާއްޖޭގެ މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ޑޮލަރު ފޯރުކޮށްދިނުމުގައި ލިމިޓެއް ގެންގުޅޭ ކަމަށެވެ.
ނަތީޖާއެއްގެ ގޮތުން ރެމިޓެންސްގެ ގޮތުގައި ހުރިހާ ގައުމަކަށްވެސް ޑޮލަރު ފޮނުވުމުގައި ދަތިތައް ހުރި ކަމަށް އިންޑިއާގެ އެކްސްޓާނަލް އެފެއާޒް މިނިސްޓްރީން ބުނެފައިވެ އެވެ. ނަމަވެސް ޑޮލަރުން މުސާރަ ލިބޭ މީހުންނަށް އެ މައްސަލަ ދިމާނުވާ ކަމަށް އެ މިނިސްޓްރީން ބުންޏެވެ.
މުސާރަ ފޮނުވުމުގައި ދަތިތައް ހުރިކަން ދިވެހި ސަރުކާރާއި އެމްއެމްއޭގެ ސަމާލުކަމަށް ގެނެސްފައިވާ ކަމަށް އިންޑިއާގެ އެކްސްޓާނަލް އެފެއާޒް މިނިސްޓްރީން ވަނީ ބުނެފަ އެވެ.