ޑިފެންސް މިނިސްޓަރު މުހައްމަދު ޣައްސާން މައުމޫން ރަސްމީ ދަތުރެއްގައި އިންޑިއާއަށް ވަޑައިގަންނަވާ ގޮތަށް ހަމަޖެހިފައިވާ ކަމަށް އެ ގައުމުގެ ނޫހަކުން ރިޕޯޓްކޮށްފި އެވެ.
އިންޑިއާގެ ވިއޯން ނޫހުން ރިޕޯޓްކޮށްފައިވާ ގޮތުން މިނިސްޓަރު ޣައްސާން އިންޑިއާއަށް ވަޑައިގަންނަވަނީ މިމަހުގެ 7-8 އަށެވެ.
މިއީ ޑިފެންސް މިނިސްޓަރުގެ ހައިސިއްޔަތުން ޣައްސާން އިންޑިއާއަށް ކުރައްވާ ފުރަތަމަ ދަތުރުފުޅެވެ. އެކަން އެ ނޫޙުންވެސް ވަނީ ފާހަގަކޮށްފަ އެވެ.
މިނިސްޓަރު ޣައްސާން އިންޑިއާއަށް ވަޑައިގަންނަވަން ހަމަޖެހިފައިވާ ކަމަށް ފޮރިން މިނިސްޓަރު ޑރ. އަބްދުﷲ ހަލީލް ކަށަވަރުކޮށްދީފައިވާ ކަމަށްވެސް ވިއޯން ނޫހުން ރިޕޯޓްކޮށްފައިވެ އެވެ.
މި ދަތުރުގައި ދެ ސަލާމަތާއި ރައްކާތެރިކަމުގެ ދާއިރާއިން ދެ ގައުމުގެ ގުޅުން އިތުރަށް ބަދަހިވެގެންދާނެ ކަމަށް ހަލީލް ވިދާޅުވި ކަމަށްވެސް އިންޑިއާގެ ނޫހުން ރިޕޯޓްކޮށްފައިވެ އެވެ.
ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވިތާ ކުރީކޮޅު ދެ ގައުމު ގުޅުން އޮތީ ވަރަށް ބޮޑަށް ހީނަވަރުވެފަ އެވެ. ނަމަވެސް ރައީސް މުއިއްޒު އިންޑިއާއަށް ކުރެއްވި ދަތުރުފުޅާ އެކު ދެ ގައުމުގެ ގުޅުން މިހާރު ދަނީ ހަރުދަނާވެ ވަރުގަދަ ވަމުންނެވެ.