ދިމާވާ ގޮންޖެހުންތައް ހައްލުކޮށް ރާއްޖެއާއި އިންޑިއާގެ ގުޅުން އިތުރަށް ބަދަހިކުރަން މަސައްކަތްކުރަން ތައްޔާރަށް ހުންނެވި ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
އިންޑިއާގެ 76 ވަނަ ޖުމްހޫރީ ދުވަހުގެ ތަހުނިޔާ ފޮނުއްވައި އެކްސްގައި ކުރެއްވި ޕޯސްޓެއްގައި ރައީސް މުއިއްޒު ވިދާޅުވީ ދެ ގައުމުގެ ގުޅުމަކީ އިހުތިރާމާއި އިތުބާރުގެ މައްޗަށް ބިނާވެފައިވާ ވަރުގަދަ ގުޅުމެއް ކަމަށެވެ.
ރައީސް މުއިއްޒު ވަނީ އިންޑިއާއާއެކު އޮންނަ ގާތް ރަހުމަތްތެރިކަމުގެ ގުޅުމަށް ރާއްޖޭން އަބަދުވެސް އިހުތިރާމުކުރާނެ ކަމަށް ވިދާޅުވެފަ އެވެ.
އެގޮތުން ގޮންޖެހުންތައް ހައްލުކޮށް ދެ ގައުމަށް އެންމެ ފައިދާހުރި ގޮތުގައި ގުޅުން އިތުރަށް ބަދަހިކުރުމަށް މަސައްކަތްކުރަން ތައްޔާރަށް ހުންނެވި ކަމުގައި ރައީސް މުއިއްޒު ވިދާޅުވި އެވެ.
ރައީސް މުއިއްޒުގެ ޕޯސްޓްގައި ވަނީ އިންޑިއާގެ ޖުމްހޫރީ ދުވަހުގެ ތަހުނިޔާ އެ ގައުމުގެ ރައީސް ދުރޫޕަދީ މުރުމޫ އާއި އިންޑިއާގެ ބޮޑުވަޒީރު ނަރެންދުރަ މޯދީގެ އިތުރުން އެ ގައުމުގެ ރައްޔިތުންނަށް ފޮނުއްވާފަ އެވެ.
