އީރާންގެ ނިއުކްލިއް ޕްރޮގްރާމާ ބެހޭ ގޮތުން އީރާނުން ހުށަހެޅި ހުށަހެޅުން އެމެރިކާގެ ރައީސް ޑޮނަލްޑް ޓްރަމްޕް ބަލައިގެންފާނެ ކަމަށް އެމެރިކާގެ ނޫސްތަކުން ބުނެފި އެވެ.
އީރާންގެ ނިއުކްލިއާ ޕްރޮގްރާމާ ބެހޭ ގޮތުން ރައީސް ޓްރަމްޕް ވަނީ ހަރުކަށި އިންޒާރުތަކެއް އީރާނަށް ދެއްވާފަ އެވެ. އެމެރިކާއާ އެކު މަޝްވަރާ މޭޒު ދޮށަށް އަންނަން ބޭނުން ނޫން ނަމަ އީރާނަށް އޮތީ އަސްކަރީ އޫގޫބާތްތައް ތަޖުރިބާކުރުން ކަމަށް ޓްރަމްޕް ވިދާޅުވި އެވެ.
އަދި ނިއުކްލިއާ ހަތިޔާރު އުފެއްދުމަށް މިސްރާބުޖަހައިފި ނަމަ، ބޮމާއި މިސައިލުން އީރާނަށް ވާރޭ ވެއްސާނެ ކަމަށް ޓްރަޕް ވިދާޅުވި އެވެ.
އެމެރިކާގެ މި އިންޒާރަށް ގުޅިގެން އީރާނުން ނެރުނު ބަޔާނެއްގައި ބުނެފައި ވަނީ، ބިރުދައްކައި ހަނގާކުރުމަކުން ގުޑުމެއް ނާރާނެ ކަމަށެވެ. އީރާނަށް ބޮންއަޅައިފި ނަމަ، އަސްކަރީ ފެންވަރުގެ ނިއުކްލިއާ ހަތިޔާރު އުފެއްދުން ނޫން ގޮތެއް އީރާނަށް ނޯންނާނެ ކަމަށްވެސް އެ ގައުމުން ވަނީ ބުނެފަ އެވެ.
އީރާނަށް ބޮަންއަޅައިފި ނަމަ ހުރިހާ ގެއްލުމެއް ލިބޭނީ އެމެރިކާ އަށާއި ބައިވެރިންނަށް ކަމަށްވެސް އެ ގައުމުން ވަނީ ބުނެފަ އެވެ.
މަޝްވަރާކުރަން ބޭނުން ނަމަ، ސުލްހަވެރިކަމާ އެކު މަޝްވަރާކުރަން އީރާން ތައްޔާރު ކަމަށާއި، އީރާނަށް ފައިދާއެއް ނެތް ކަމެއްގައި މަޝްވަރާކުރުމެއް ނޯންނާނެ ކަމަމަށްވެސް އީރާނުން ވަނީ ބުނެފަ އެވެ.
އެމެރިކާ ބުނާހާ ގޮތެއް އީރާން ނުހަދާނެ ކަމަށް ބަލައި، އެމެރިކާއިން ގެންދަނީ އަސްކަރީ ފައުޖުތައް މެދުއިރުމައްޗަށް ޖަމާކުރަމުންނެވެ. އެމެރިކާގެ އަސްކަރީ ބޭސްތަކަށް ބޮންއަޅާ ބޯޓުތައް ޖަމާކުރުމުގެ މަޝްރޫއުތަކެއް ވެސް އެމެރިކާއިން މިހާރު ދަނީ ހިންގަމުންނެވެ.
ރިޕޯޓްތައް ބުނާ ގޮތުން އީރާންގެ ހުށަހެޅުމުގައި އޮތް އެއްޗެއް ބައްލަވައި ގޮތެއް ނިންމެވުމަށް ރައީސް ޓްރަމްޕް މިހާރު ވަނީ ނިންމަވާފަ އެވެ. އީރާންގެ ހުށަހެޅުމުގައި ރަނގަޅު ގޮތެއް އޮތް ނަމަ އެ ގޮތެއް ގަބޫލުކުރައްވާނެ ކަމަށް ޓްރަމްޕް ވިދާޅުވި ކަމަށް އޮފިޝަލުންނާ ހަމާލީ ދީ އެމެރިކާގެ ނޫސްތަކުން ވަނީ ބުނެފަ އެވެ.
އެމެރިކާއާ ސީދާ ސީދާ މަޝްވަރާނުކުރާނެ ކަމަށް އީރާނުން އޮތީ ބުނެފަ އެވެ. އީރާނަށް އެންމެ ރަނގަޅު ގޮތަކީ އޮމާން މެދުވެރިކޮށް މަޝްވަރާކުރުން ކަމަށް އޮފިޝަލުން ވިދާޅުވި އެވެ.
