އު ރީދޫ ފަން ރަންނ މިއީ ރާއްޖޭގައި ބާއްވާ އެންމެ ބޮޑު އަދި އެންމެ އުފާވެރި ދުވުމެވެ. ކުޑަކުދިންނަށްވެސް ބައިވެރިވެވޭ ގޮތަށް ބާއްވާ "އުރީދޫ ފަން ރަން" އަކީ ހުރިހާ އުމުރުފުރައެއްގެ މީހުންނަށްވެސް ބައިވެރިވެވޭ ގޮތަށް ބާއްވާ ދުވުމެކެވެ.
"އެންމެ ކުޑަކުއްޖާއިން ފެށިގެން ގޮސް ދުވަސްވީ ބޭފުޅުންނަށްވެސް ބައިވެރިވެވޭ ގޮތަށް އާއިލާ އާއި ރައްޓެހިން އެންމެން އެއްކޮށް ބައިވެރިވެ މަޖާ މާހައުލެއްގައި ދުޅަހެޔޮ ސިއްހަތެއްގައި ހުރުމަށް ހިތްވަރުދޭ ގޮތަށް ރޭވިފައިވާ ހަރަކާތެއް ފަން ރަން އަކީ،" އުރީދޫގެ އެސިސްޓަންޓް މެނޭޖާ، ޕީއާރް، ޝިއުނާ ހަމީދު ވިދާޅުވި އެވެ.
މިއީ ވަކި ވަގުތަކަށް ނިންމަންޖެހޭ ދުވުމަކަށް ނުވާތީ އަލަށް ދުވާ މީހުންނަށްވެސް މި ދުވުމުގައި ބައިވެރިވެވޭނެ އެވެ.
ޖުމްލަ ފަސް ކިލޯ މީޓަރުގެ މި ދުވުމުގައި ކޮންމެ ކިލޯމީޓަރެއް ދުވެ ނިމުމުން، ބެހެއްޓިފައިވާ ސްޓޭޝަންތަކުގައި، ކުލައިގެ އިތުރުން ފެން އަދި މަޖާ ހަރަކާތްތަކެއް ކުރިއަށްދާނެ އެވެ.
އުރީދޫ ފަން ރަން އަންނަ މަހުގެ 20 ވަނަ ދުވަހު ހުޅުމާލޭގައި ބާއްވާއިރު މިއީ މި އަހަރު ބާއްވާ މިފަދަ ދެވަނަ ރަން އެވެ.
އުރީދޫ ފަން ރަން މި އަހަރު ޖުލައި މަހު އޮތީ ލ. އަތޮޅުގައެވެ. އެ ދުވުމަށްވެސް ވަރަށް ބޮޑު ތަރުހީބެއް ލިބުނެވެ.
މި ދުވުން ނިންމާލާ އެންމެންނަށްވެސް ހާއްސަ މެޑަލްއެއް ލިބޭނެ އެވެ. މި އަހަރުގެ މެޑަލް ވަކިން ހާއްސަވާނެ ކަމަށްވެސް ޝިއުނާ ވިދާޅުވި އެވެ.
"މިއަހަރު މިއިންނަނީ ދެ މެޑަލް އެއްކޮށް އެއީ ދެ ދުވުމުގައި ބައިވެރިވި ފަރާތްތަކަށް ތަތް ކޮށްލެވޭ ގޮތަށް ގެންދެވޭ ދެ މެޑަލް. އެހެންވީމަ ލ. އަތޮޅުގައި ބައިވެރިވި ފަރާތްތައް އަދި ހުޅުމާލޭގައި ބައިވެރިވާ ފަރާތްތަކަށް ލިބޭނެ ދެ މެޑަލް،" ޝިއުނާ ވިދާޅުވި އެވެ.
އުރީދޫ ފަން ރަންގައި ރަޖިސްޓްރީވުމުގެ ފުރުސަތު މިމަހުގެ 16 ވަނަ ދުވަހާ ހަމައަށް ހުޅުވާލާފައިވާއިރު އުރީދޫގެ މޫލީ މެދުވެރިކޮށް ފަން ރަންގެ ކިޓް ޑެލިވާ ކޮށްދޭނެ އެވެ.
އުރީދޫ ފަން ރަން - ކިޓްތައް ދެ ކެޓަގަރީއަކުން ލިބެން ހުންނާނެ އެވެ. އެއީ ސްޓޭންޑަޑް ކިޓްސް އަދި ފަން ކިޓްސް ކެޓަގަރީ އެވެ.
ސްޓޭންޑަޑް ކިޓް - ބިބް ކަސްޓަމައިޒޭޝަންއާއެކު 150 ރުފިޔާއަށް ލިބޭނެ އެވެ. ބިބް ކަސްޓަމައިޒޭޝަންގައި ހަތް އަކުރުގެ ބޭނުން ނަމެއް ބިބްގައި ޖަހާލެވޭނެ އެވެ. ބިބް ކަސްޓަމައިޒޭޝަންއާ ނުލައި ސްޓޭންޑަޑް ކިޓްގެ އަގަކީ 100 ރުފިޔާ އެވެ.
އުރީދޫ ފަން ރަން ޓީޝާޓްގެ އިތުރުން ރިސްޓްބޭންޑަކާއި، އައިނު އަދި ބަންޑާނާ ފަން ކިޓްގެ އަގަކީ 210 ރުފިޔާ އެވެ. ބިބް ކަސްޓަމައިޒޭޝަންއާއެކު ފަން ކިޓްގެ އަގަކީ 260 ރުފިޔާ އެވެ.
ކުޑަކުދިންގެ ބޮޑު ތަރުހީބެއް ކޮންމެ އަހަރަކުވެސް ލބޭ އުރީދޫ ފަން ރަން އެންމެ ފުރަތަމަ ބޭއްވީ ކަލަ ރަންގެ ނަމުގައި 2017 ވަނަ އަހަރު އެވެ.
ކޮވިޑްއާ ގުޅިގެން މެދުކެނޑުމަކަށްފަހު މި ދުވުން "ފަން ރަން"ގެ ނަމުގައި ފެށީ 2022 ވަނަ އަހަރު އެވެ.
މިދިޔަ އަހަރުން ފެށިގެން އުރީދޫ އިން ދަނީ އަތޮޅުތަކުގައި އެއް ދުވުން އަދި ހުޅުމާލޭގައި ފަން ރަންގެ ދުވުމެއް ބާއްވަމުންނެވެ. ފަން ރަންގައި ކޮންމެ އަހަރަކުވެސް 5،000 މީހުން ބައިވެރިވެ އެވެ.