ކުރީގެ ނައިބް ރައީސް އަބްދުﷲ ޖިހާދުގެ މައްސަލަ ހައިކޯޓުން ބޭރުކޮށްލުމާ މެދު ފަނޑިޔާރުންގެ މެދުގައި ހިޔާލު ތަފާތުވެއްޖެ އެވެ.
ކުރީގެ ނައިބް ރައީސް އަބްދުﷲ ޖިހާދު ދިރިއުޅުއްވާ ތަނެއް ނޭނގޭތީ މައްސަލައިގެ ޗިޓު ރައްދު ނުކުރެވިގެން ދައުލަތުން ކޮށްފައިވާ އިސްތިއުނާފް މައްސަލަ ހައިކޯޓުން ބޭރުކޮށްލާފައި ވަނިކޮށް ޕްރޮސެކިއުޓާ ޖެނަރަލްގެ އޮފީހުން އެ މައްސަލަ އަލުން ހައިކޯޓަށް ހުށަހެޅީ، މައުލޫމާތު ލިބިފައިވާ ގޮތުގައި ރާއްޖޭން ބޭރުގައި އުޅުއްވުމަށްފަހު ޖިހާދު އަލުން އެނބުރި ރާއްޖެއަށް ވަޑައިގެންނެވުމުންނެވެ. އެކަމަކު ހައިކޯޓުން ވަނީ އެ މައްސަލަ އަނެއްކާވެސް ބޭރުކޮށްލާފަ އެވެ.
ހައިކޯޓުގެ ރަޖިސްޓްރާ ވިދާޅުވީ އެ މައްސަލަ ބޭރުކޮށްލީ ކަނޑައަޅާފައިވާ މުއްދަތުގެ ތެރޭގައި އަލުން ހުށަހަޅާފައި ނުވުމުން ކަމަށެވެ.
ހައިކޯޓުގެ ރެޖިސްޓްރާ އެ މައްސަލަ ބޭރުކޮށްލުމުން، ޕީޖީން ދެވަނަ ފަހަރަށް އެ މައްސަލަ ހުށަހެޅީ ފަނޑިޔާރުންގެ ރިވިއުއަކަށެވެ.
އެ މައްސަލަ ފަނޑިޔާރުން ރިވިއު ކުރިއިރު، ފަނޑިޔާރުންގެ މެދުގައިވަނީ ހިޔާލު ތަފާތުވެފަ އެވެ. މައްސަލަ ރިވިއު ކުރި ފަނޑިޔާރުންގެ ބެންޗުގެ މެޖޯރިޓީއަށް ބުރަވެވުނީ މައްސަލަ ބަލައިނުގަތުމަށެވެ. އެކަމަކު މައިނޯރިޓީ ފަނޑިޔާރު ނިންމެވީ މައްސަލަ ބަލައިގަންނާށެވެ.
މިއީ ޖިހާދުގެ މައްޗަށް ދައުލަތުން އުފުލާފައި އޮތް ފުށިދިއްގަރުފަޅާ ގުޅޭ ޖިނާއީ ދައުވާއަކާ ގުޅޭ މައްސަލައެކެވެ. ޖިހާދުގެ މައްޗަށް ދައުލަތުން ދައުވާ އުފުލީ ފުށިދިއްގަރުފަޅު ސްޕެޝަލް ޓޫރިސްޓް ޒޯނެއްގެ ގޮތުގައި ތަރައްގީކުރުމުގެ މަޝްރޫއާ ގުޅިގެން ފިނޭންސް މިނިސްޓަރު ކަމުގެ މަގާމުގައި ހުންނަވައިގެން، ދައުލަތަށް ފައިދާއެއް ލިބެން އޮތް ކަމެއްގައި އެ ނޫން ގޮތަކަށް އަމަލުކުރެއްވި ކަމުގެ ދައުވާ އެވެ.
ފުށިދިއްގަރުފަޅު ތަރައްގީކުރުމުގެ ޖޮއިންޓް ވެންޗާ އެއްބަސްވުމުގައި ސޮއިކޮށްފައިވަނީ ޖެނުއަރީ 18، 2013 ގައެވެ. ޖޮއިންޓް ވެންޗާ ކުންފުނީގައި ދިވެހި ސަރުކާރުގެ ހިއްސާއަކީ 25 ޕަސެންޓް ކަމަށް އެއްބަސްވުމުގައިވެ އެވެ. ފުށިދިއްގަރުފަޅު ތަރައްގީކުރުމަށް ބޭރުގެ ކުންފުންޏަކަށް ދިނުމަށް ނިންމީ ކުރީގެ ރައީސް މުހައްމަދު ނަޝީދުގެ ވެރިކަމުގައެވެ. ނަމަވެސް އެ ކުންފުންޏަށް ދިނުމަށް އެއްބަސްވުމުގައި ސޮއިކޮށްފައިވަނީ ރައީސް ޑރ. މުހައްމަދު ވަހީދުގެ ވެރިކަމުގަ އެވެ.
މޯލްޑިވްސް އިންޓަނޭޝަނަލް ފައިނޭންސް ސާވިސް އޮތޯރިޓީގެ ޗެއާޕާސަންގެ މަގާމުގައި މިވަގުތުވެސް ހުންނެވި ޖިހާދުގެ މައްޗަށް ދައުލަތުން މީގެކުރިން އިތުރު ދައުވާއެއްވެސް އުފުލި އެވެ. އެއީ އެމަނިކުފާނު ކުރިން ނައިބް ރައީސްގެ މަގާމުގައި ހުންނެވިއިރު އެ މަގާމުގެ ހައިސިއްޔަތުން ދިރިއުޅުއްވުމަށް ދައުލަތުން ހަމަޖައްސައިދީފައި ހުރި ރެހެންދި ފްލެޓް ހުސްނުކުރުމުގެ މައްސަލައިގައި އުފުލި ދައުވާ އެކެވެ.
ޖިހާދުގެ މައްޗަށް އޭރު ކޮށްފައިވާ ދައުވާއަކީ ފެބްރުއަރީ 17، 2020 ވަނަ ދުވަހާ ހަމައަށް ސަރުކާރުން ދޫކޮށްފައިވާ ދެ އެޕާޓްމަންޓް ހުސްނުކޮށް ބޭނުންކުރުމުގެ ދައުވާ އެވެ. އެހެންކަމުން ޖިހާދު އެތަނުގައި ދިރިއުޅުނު ދުވަސްތަކުގެ ކުއްޔާއި މެއިންޓަނަންސް ފީ އަދި ޔޫޓިލިޓީ ފީގެ ގޮތުގައި ދައްކަން ޖެހޭ 1,109,227.36 ރުފިޔާ އެއް ފަހަރާ ދައުލަތަށް ނަގައިދިނުމަށް ސިވިލް ކޯޓުގައި ދައުލަތުން އޭރު އެދިފައިވެ އެވެ. ނަމަވެސް ދައުލަތުން ވަނީ މިއަހަރުގެ ޖެނުއަރީ މަހުގެ ތެރޭގައި މިދައުވާ އަނބުރާ ގެންގޮސްފަ އެވެ.