ރައްޔިތުންގެ މަޖިލީހުގެ އިސްދޫ ދާއިރާގެ ކުރީގެ މެމްބަރު އަލީ ހަމީދުގެ ކުންފުނި -- ނޯތު ކޯސްޓް ކޮންސްޓްރަކްޝަން ޕްރައިވެޓް ލިމިޓެޑަށް އޮފީސް އިމާރާތެއް އެޅުމަށް އެޑްވާންސް ޕޭމަންޓެއްގެ ގޮތުގައި 44 މިލިއަން ރުފިޔާ ދިން މައްސަލަ ތަހުގީގު ކުރުމަށް ޕްރޮސެކިއުޓާ ޖެނަރަލް އައްބާސް ޝަރީފް ފުލުހުންނަށް އަމުރުކުރައްވައިފި އެވެ.
ރައްޔިތުންގެ މަޖިލީހުގެ އިސްދޫ ދާއިރާގެ ކުރީގެ މެންބަރު އަލީ ހަމީދުގެ ކުންފުނި ނޯތު ކޯސްޓް ކޮންސްޓްރަކްޝަނަށް އޮފީސް އިމާރާތެއް އެޅުމަށް އެޑްވާންސް ޕޭމަންޓެއްގެ ގޮތުގައި 44 މިލިއަން ރުފިޔާ ދިން މައްސަލައިގައި ޖިނާއީ ތަހުގީގެއް ހިންގުމަށް ފުލުސް އޮފީހަށް ހުށަހަޅަން ރައްޔިތުންގެ މަޖިލީހުގެ މާލިއްޔަތު ކޮމިޓީން މިއަދު ފާސް ކޮށްފި އެވެ.
މިމައްސަލަ ރައްޔިތުންގެ މަޖިލީހުގެ މާލިއްޔަތު ކޮމިޓީންވެސް ވަނީ ކުރިން ބަލާފަ އެވެ. އަދި މިމައްސަލަ ތަހުގީގު ކުރުމަށް ފުލުހުންގެ ސަމާލުކަމަށް ގެނައުމަށްވެސް މާލިއްޔަތު ކޮމިޓީން އޮތީ މިދިޔަ އޮކްޓޫބަރު 29 ވަނަ ދުވަހު ފާސްކޮށްފަ އެވެ.
ނިމިދިޔަ އެމްޑީޕީގެ ސަރުކާރުން އަލީ ހަމީދުގެ ކުންފުންޏާ އެންމެ ފުރަތަމަ ހަވާލުކުރީ ހޮސްޕިޓަލެއް އެޅުމަށެވެ. އާސަންދަ ކުންފުނިން މިމަސައްކަތް އަލީ ހަމީދުގެ ކުންފުންޏާ ހަވާލުކުރި ނަމަވެސް 2022 ވަނަ އަހަރު ވަނީ އެ އެއްބަސްވުން ބާތިލްކޮށް ހޮސްޕިޓަލްގެ ބަދަލުގައި އޮފީސް އިމާރާތެއް އެޅުމަށް އަލީ ހަމީދުގެ ކުންފުންޏާ ހަވާލުކޮށްފަ އެވެ. އަދި އޮފީސް އިމާރާތް އެޅުމަށް 2023 ވަނަ އަހަރު އެޑްވާންސް ޕޭމަންޓްގެ ގޮތުގައި އަލީ ހަމީދުގެ ކުންފުންޏަށް ވަނީ 44 މިލިއަން ރުފިޔާ ދޫކޮށްފަ އެވެ.
އާސަންދަ ކުންފުނިން މީގެކުރިން މާލިއްޔަތު ކޮމިޓީއަށް ފޮނުވި ސިޓީއެއްގައި ބުނެފައިވަނީ އަލީ ހަމީދުގެ ކުންފުންޏަށް މަޝްރޫއު ކުރިއަށް ގެންދެވިފައި ނުވަނީ އެކަން ކުރުމުގެ ގާބިލްކަން އެ ކުންފުނީގައި ނެތުމުން ކަމަށް އާސަންދަ ކުންފުންޏަށް ބެލެވޭ ކަމަށެވެ.
ޕީޖީ އޮފީހުން މިއަދު ބުނީ މި މައްސަލައަކީ ދިވެހި ދައުލަތާއި، ރައްޔިތުންގެ އާންމު މަސްލަހަތު މަތީ ދަރަޖައަކަށް އޮތް ހައްސާސް މައްސަލައެއް ކަމަށެވެ. އެހެންވެ މި މައްސަލައަށް އިތުރު ސަމާލުކަމެއް ދީގެން އަދި ހާއްސަ ތަހުގީގު ޓީމެއް އެކުލަވާލައި، އަވަސް މައްސަލައެއްގެ ގޮތުގައި ކުރިއަށް ގެންދިއުމަށް އެދިފައިވާނެ ކަމަށްވެސް ބުންޏެވެ.
"އަދި މި މައްސަލައިގައި ހިމެނޭ ފަރާތްތަކާ ގުޅޭ މި ބާވަތުގެ އިތުރު ޕްރޮޖެކްޓެއްވާނަމަ އެކަންކަންވެސް މި މައްސަލައިގެ ތެރެއިން ތަހުގީގު ކުރެއްވުމަށް ދަންނަވާފައިވާނެ އެވެ،" ޕީޖީ އޮފީހުން ބުންޏެވެ.