މީޑިއާ ދެކެ ކޯފާ ވެގެން، ނޫސްވެރިންގެ ޖާފަތް ވެސް ޓްރަމްޕް ދޫކޮށްލައްވައިފި

އެމެރިކާ އާއި ދުނިޔޭގެ ބޮޑެތި މީޑިއާ ތަކުން ފަތުރަނީ ދޮގު ހަބަރު ކަމަށް ތުހުމަތު ކުރައްވައި، ގިނަ ވާހަކަފުޅު ތަކެއް ދެއްކެވުމަށް ފަހު ، އެމެރިކާގެ ރިޔާސީ ގަނޑުވަރު ވައިޓް ހައުސްގެ ހަބަރުތައް ކަވަކުރާ ނޫސްވެރިންގެ ޖަމިއްޔާ ވައިޓް ހައުސް ކަރެސްޕޮންޑެންޓްސް އެސޯސިއޭޝަނުން ބާއްވާ ޖާފަތް، ކަރެސްޕޮންޑެންޓްސް ޑިނާައަށް ވެސް ވަޑައި ނުގަންނަވާނެ ކަން ރައީސް ޑޮނަލްޑް ޖޭ ޓްރަމްޕް އިއުލާން ކުރައްވައިފި އެވެ.

ނޫސްވެރިންނާއި މަޝްހޫރުމީހުންނާއި ސިޔާސީ ލީޑަރުން ވަޑައިގަންނަވާ އެ ހަފުލާއަކީ އާއްމުކޮށް އެމެރިކާގެ ރައީސުން ބައިވެރިވެ ވަޑައިގަންނަވާ ހަފުލާއެކެވެ. އެ ހަފުލާގައި ބައިވެރިވެވަޑައި ނުގަންނަވާނެ ކަން ޓްރަމްޕް އިއުލާން ކުރައްވާފައި މިވަނީ ބޮޑެތި މީޑިއާތައް ބައިވެރި ނުކޮށް ވައިޓްހައުސް އިން ނޫސްކޮންފަރެންސެއް ބާއްވާފައި ވަނިކޮށެވެ. އަދި ނޫސްއެޖެންސީތަކާއި ޓްރަޕް ސަރުކާރާއި ދެމެދު ވަރަށް ބޮޑަށް ގުޅުން ގޯސްވެފައިވާ ދަނޑިވަޅެއްގައެވެ.

ޓްރަމްޕް ވަނީ ރައީސް ކަމަށް އިންތިހާބު ނުވާ އިރު 2015 ވަނަ އަހަރު އެހަފުލާއަށް ވަޑައިގެންފަ އެވެ.

އެމެރިކާގެ ރައީސް ކަަމަށް ޓްރަމްޕް ވަޑައިގެންނެވި ފަހުން ސަރުކާރަށް ފާޑުކިއުން އަމާޒުވާ ގޮތަށް ލިޔާ ކޮންމެ ހަބަރެއް އޭނާ ސިފަކުރައްވަމުން ގެންދަވަނީ " ފޭކް ނިއުސް" ގެ ގޮތުގައެވެ. ނަމަވެސް އެއިން އެއްވެސް ހަބަރެއްގެ ދޮގުކަން ހާމަވާ އެއްވެސް ހެއްކެއް އޭނާއަށް މިހައިތަނަަށް ދެއްކެވިފައެއް ނުވެއެވެ.

ވައިޓްހައުސްގައި ހުކުރު ދުވަހު ބޭއްވި ނުރަސްމީ ނިއުސް ބްރީފިންއަށް ނުވެއްދި މީޑިއާ ތަކުގެ ތެރޭގައި ބީބީސީއާއި ސީއެންއެންއާއި ދަ ނިއުޔޯކް ޓައިމްސް ހިމެނެއެވެ. ވައިޓް ހައުސިން އެގޮތަށް އަމަލުކުރެއްވުމުގެ މަދު ގަޑިއިރުތަކެއް ކުރިން ޓްރަމްޕް ވަނީ މީޑިއާތަކަށް ވަރުގަދަ ބަހުގެ ހަމަލާތަކެއް ދެއްވާފައެވެ. އޭނާ ވިދާޅުވެފައި ވަނީ ދޮގު ހަބަރަކީ ރައްޔިތުންގެ ދުޝްމަނެއް ކަމަށެވެ.

ކަރެސްޕޮންޑެންޓްސް ޑިނާއަކީ 1921 ވަނަ އަހަރުން ފެށިގެން ބާއްވަމުން އަންނަ ހަފުލާއެކެވެ. އެހަފުލާ އޭގެ ފަހުން ނުބާއްވާ ގޮސްފައި ވަނީ މަދު އަހަރުތަކެއްގައެވެ. އެއީ 1930 ، 1942 އަދި 1952 ވަނަ އަހަރުއެވެ. އެކި ސަބަބުތަކާއި ހެދި އެ ހަފުލާއަށް ވަޑައިނުގެންނެވުނު ރައީސުންގެ ތެރޭގައި ރިޗަޑް ނިކްސަންއާއި ރޮނަލްޑް ރޭގަންއާއި ޖިމީ ކާޓާ ހިމެނިވަޑައިގަންނަވައެވެ. އެ ހަފުލާ އެންމެ ފަހުން ދޫކޮށްލައްވާފައި ވަނީ 1981 ވަނަ އަހަރު އޭރުގެ ރައީސް ރޮނަލްޑް ރޭގަންެއެވެ.