އެމެރިކާގެ ރައީސް ޑޮނަލްޑް ޖޭ ޓްރަމްޕް އެ ގައުމުގެ ކޮންގްރެސްއާ ފުރަތަމަ ފަހަރަށް މިއަދު މުހާތަބު ކުރައްވައިފި އެވެ.
އާއްމުކޮށް ވާހަކަ ދައްކަވާ ވަރަށް ވުރެ މަޑުމައިތިރިކޮށް، އެހެން ރައީސުން ވެސް ދެއްވާ ފަދަ ގޮތަކަށް ޓްރަމްޕް މިއަދު ދެއްވި ރިޔާސީ ބަޔާނުގައި އާ ވާހަކަތަކެއް ނެތެވެ.
ބަޔާނުގައި ޓްރަމްޕް ހާމަ ކުރެއްވި ސިޔާސަތު ތަކުގެ ތެރޭގައި ވަނީ ސަރަހައްދީ ރޮނގުތަކުގެ ސަލާމަތީ ކަންތައްތައް ވަރުގަދަ ކުރުމަށާއި ގަވާއިދާ ހިލާފަށް އެމެރިކާއަށް ހިޖުރަކޮށްފައިވާ މީހުން ބޭރުކުރުމަށާއި އެމެރިކާގައި އުފައްދާ ތަކެތި ގަނެގެން އެމެރިކާ މީހުންނަށް މުސާރަދީގެން ގައުމު ބިނާކުރުން ހިމެނެއެވެ. އަދި އެމެރިކާގެ ބައިވެރިންގެ ގޮތުގައި ތިބި ގައުމުތަކުން ކުރަން ޖެހޭ ހަރަދު އެގައުމުތަކުން ކުރަން ޖެހޭނެ ކަމަށް ވިދާޅުވާ ވިދާޅުވުން ވެސް އޭނާ ތަކުރާރު ކުރެއްވިއެވެ.
ދެން ދެއްކެވީ މިހާރު އޮތް ސިއްހީ ހިދުމަތާ ބެހޭ ގާނޫނު އުވާލައި އެކަމަށް އާ ގާނޫނެއް ހެދުމުގެ ވާހަކައާއި ބޯޑާ ޓެކްސްތައް އިތުރު ކުރުމުގެ ވާހަކައެވެ.
ބަޔާނުގައި ފާހަގަކޮށްލެވޭ ކަންތައްތައް
- ނޭޭޓޯއަށް ވަރުގަދައަށް ތާއީދު ކުރައްްވާ ކަމަށާއި ނަމަވެސް މެމްބަރު ގައުމުތަކުން އަދާކުރަން ޖެހޭ މާލީ ވާޖިބު އަދާކުރަން ޖެހޭނެ ކަމަށް
- އޮބާމާ ކެއާ ގެ ނަމުގައި އޮތް ހެލްތުކެއާ ގާނޫނުގެ ބަދަލުގައި އެހެން ގާނޫނެއް އަވަހަށް ހަދަން ކޮންގްރެސްއަށް ގޮވާލެއްވި
- މެދު ފަންތީގެ މީހުން އަތުން ނަގާ ޓެކްސް މަދުކުރައްވާނެ ކަަމަށް ވިދާޅުވި
- އިންފްރާ ސްޓްރަކްޗާ ބިނާ ކުރުމަށް 800 ބިލިޔަނުގެ ޕެކޭޖެއް ފާސްކުރަން ގޮވައިލެއްވި
- އިސްލާމިކް ސްޓޭޓް ނައްތައިލައްވާނެ ކަމަށް ވިދާޅުވި
ބީބީސީން ފާހަގަކޮށްފައިވާ ގޮތުގައި އާ ވާހަކަ ތަކެއް ނެތަސް ޓްރަމްޕް ވާހަކަ ދެއްކެވި ގޮތް އޭނާ އާއްމުކޮށް ވާހަކަ ދައްކަވާ ގޮތާއި ތަފާތެވެ. އެެގޮތޮން ފާހަގަކޮށްފައި ވަނީ ބާރަށް ހަޅޭއް ލެއްވުމުގައި ބަދަލުގައި މަޑުމައިތިރިކޮށް ވާހަކަ ދެއްކެވި ކަމެވެ.
ރިޔާސީ ބަޔާން އިއްވަވަމުން ޓްރަމްޕް ވަނީ އެމެރިކާގައި ދާދިފަހުން އިންޑިއާ މީހަކު މަރައިލުމާއި އެގައުމުގެ ޔަހޫދީންނަށް އަމާޒުކޮށް ހިންގި ރުޅިވެރިކަމުގެ އަމަލުތައް ކުށްވެރިކުރައްވާފަ އެވެ.