ސަލްމާން ރަސްގެފާނަށް ބާލީ އިން ހޫނު މަރުހަބާއެއް

ސައުދީ އަރަބިއްޔާގެ ރަސްގެފާނު ސަލްމާން ބިން ޢަބުދުލް ޢަޒީޒު އަލް ސަޢުދު އިންޑޮނޭޝިއާއަށް ކުރައްވާ ދަތުރުފުޅުގެ ރަސްމީ ބައި ނިންމެވުމަށް ފަހު ޗުއްޓީ ހޭދަކޮށްލެއްވުމަށް އެ ގައުމުގެ ރިސޯޓްތައް ގިނަ ސިޓީ އެއް ކަަމށްވާ ބާލީއަށް އިއްޔެ ވަޑއިގެންފި އެވެ.

ރަސްގެފާނު ސަލްމާން ބާލީއަށް ވަޑައިގެންނެވުމުން އެރަށުން އެމަނިކުފާނަށް ވަނީ ވަރަށް ހޫނު މަރުހަބާއެއް ކިޔާފައެވެ. ރަސްގެފާނަށް މަރުހަބާ ކިއުމުގެ ގޮތުން ބާލީގެ ފަންސާސް ކުޑަކުދިން އިންޑޮނޭޝިއާގެ ސަގާފީ ނެށުމެއް ހުށަހެޅިއެވެ. އިންޑޮނޭޝިއާގެ ޖަކާޓާ ޕޯސްޓް ނޫހުން ބުނީ ރަސްގެފާނަށް މަރުހަބާ ކިއުމުގެ އިންތިޒާމް ކުރިން ހަމަޖެހިފައި އޮތީ އެރަށުގެ ބައިނަލް އަގުވާމީ ވައިގެ ބަނދަރަުގަިއ ކަމަށް ވިޔަސް ފަހުން ބަދަލެއް ގެނެސް ، އެކަން ފަހުން ކުރިއަށް ގެންދިޔައީ އެތަނާ ކައިރީގައިވާ އެއާބޭހަކަށް ކަމަށެވެ.

ބާލީ އިން ރަސްގެފާނަށް މަރުހަބާ ވިދާޅުވީ އެރަށުގެ ގަވާނާ މާޑީ މަންކޫ ޕަސްޓީކާއާއި ޕޮލިސް ޗީފް ޕެޓްރޫސް އާރް ގޮލޯސް އުދަޔާނާ ޑިސްޓްރިކްޓްގެ މިލިޓަރީ ކޮމާންޑަރު މޭޖާ ޖެނެރަލް ކުސްޓާންޓޯ ވިޑިއަޓްމޮކޯއެވެ. އެއާބޭހުން ރަސްގެފާނު ވަޑައިގެންނެވީ ރިޒޯޓް ސަރަހައްދެއް ކަމަށްވާ ސެއިންޓް ރެޖިސް އަށެވެ. އެ ތަނުގައިވާ ހޮޓަލެއްގައި ހަދުވަސް ވަންދެން ރަސްގެފާނު ސަލްމާން ޗުއްޓީ ހޭދަކުރެއްވުމަށް ވަނީ ހަމަޖެހިފައެވެ.

ރަސްގެފާނު ބާލީއަށް ވަޑައިގެންނެވުމުގެ ކުރިން ބާލީގެ އެއާޕޯޓްގެ ސަލާމާތީ ކަންތައްތައް ވަނީ ވަރަށް ވަރުގަދަކޮށްފައެވެ. އަދި އެދަތުރުފުޅަކީ އަމިއްލަ ފުޅު ދަތުރުފުޅަކަށް ވާތީ އެސަރަހައްދަށް ދިއުން ނޫސްވެރިންނަށް އޮތީ މަނާކޮށްފައި ކަމަށާއި ޖަކާޓާ ޕޯސްޓަށް މައުލޫމާތު ދިނީ އެއާޕޯޓްގެ އޮފިޝަލުން ކަމަށް އެނޫހުން ބުންޏެވެ.

ސަލްމާން ރަސްގެފާނު މިހާރު އުޅުއްވަނީ އޭޝިއާގެ ގައުމުތަކަށް ކުރައްވާ އެއް މަސްދުވަހުގެ ދަތުރުފުޅެއްގައެވެ. އެދަތުރުފުޅުގައި ފުރަތަމަ ވަޑައިގެންނެވީ މެލޭޝިއާއަށެވެ. މެލޭޝިއާއިން އިންޑޮނޭޝިއާަގެ ވެރިރަށް ޖަކާޓާއަށް އަށް ވަޑައިގެން އެގައުމުގެ އިސްވެރިންނާ ބައްދަލުކުރެއްވުމަށް ފަހު ދެން ވަޑައިގެންނެވީ ބުރޫނާއީއަށެެވެ. ބާލީއަށް ވަޑައިެގެންނެވީ އޭގެ ފަހުންނެވެ. ރަސްގެފާނުގެ ދަތުރުފުޅުގައި ޖަޕާނަށާއި ޗައިނާއަށާއި ދިވެހިރާއްޖެއަށް ވެސް ވަޑައިގަންނަވާނެއެވެ.

އޭޝިއާގެ ގައުމުތަކާ ގުޅުން ބަދަހިކުރެއްވުމަށް ކުރައްވާ އެދަތުރުފުޅުގައި ރަސްގެފާނު އަރިހުގައި 10 ވަޒީރުން ހިމެނޭ ގޮތުން 600 އޮފިޝަލުން ބައިވެރިވެވަޑައިގަންނަވައެވެ.