ޖަޕާނުގެ އެކްސްކްލޫސިވް އިކޮނޮމިކް ޒޯން ( އީއީޒެޑް)ގެ ތެރެއަށް އުތުރުކޮރެއާއިން ހަތަރޔ ބެލިސްޓިކް މިސައިލް ފޮނުވާލައިފިއެވެ.
ޖަޕާނުގެ ބޮޑުވަޒީރު ޝިންޒޯ އަބޭ އުތުރުކޮރެއާގެ އެ އަމަލު ސިފަކުރައްވާފައި ވަނީ "ބިރުދެއްކުމުގެ އާ ހަރުފަތެއް" ގެ ގޮތުގައެވެ.
އުތުރޮކޮރެއާއިން އިއްޔެ ފޮނުވައިލި މިސައިލްތައް ޖަޕާނުގެ ކަނޑުގެ ސަރަހައްދަށް ވެއްޓުނީ 620 މޭލުގެ ރާސްތާއެއް ކަޑައްތު ކުރުމަށް ފަހުގައެވެ. އެ މިސައިލް އުދުއްސާލީ އުތުރުކޮރެއާއާއި ޗައިނާއާ ގުޅޭ ސަރަހައްދީރޮނގުގެ ކައިރީގައިވާ ޓޮންޗެންރީ ނަމަކަށް ކިޔާ ސަރަހައްދުންނެވެ. ދެކުނު ކޮރެއާއިން ބުނީ އެ މިސައިލް ފޮނުވާލާފައި ވަނީ އިއްޔެ ހެނދުނު ކޮރެއާ ގަޑިން 7.36 އެހާކަށްހާއިރު ކަމަށާއި އެ މިސައިލްގައި ބޭނުންކޮށްފައި ވަނީ ކޮން ކަހަލަ ޕްރޮޖެކްޓައިލްއެއް ކަމެއް އަދި ނޭނގޭ ކަމަށެވެ. އެމެރިކާއިން ބުނެފައި ވަނީ މިސައިލް ފޮނުވައިލިކަން އެނގޭ ކަމަށާއި އެހެން ނަމަވެސް އުތުރު އެމެރިކާ ކޮންޓިނެންޓަށް އެކަމުން ނުރައްކަލެއް ނެތް ކަމަށެވެ.
މިސައިލް ފޮނުވާލާނެ ކަމުގެ އިންޒާރު އުތުރުކޮރެއާއިން ވަނީ މިދިޔަ ހުކުރުދުވަހު ދީފައެވެ. އެއީ އެމެރިކާއާއި ދެކުނު ކޮރެއާ ގުޅިގެން އެސަރަހައްދުގައި އަސްކަރީ ތަމްރީނުތަކެއް ބޭއްވުމުން އެކަމާ ރުޅިއައިސްގެންނެވެ. އެ ސަރަހައްދުގައި ތަމްރީނުތަކެއް ހަދާ ނަމަ އުތުުރުން އަބަދުވެސް ދެކެނީ އެއީ އެގައުމު ހިފަން ތައްޔާރުވާ ތައްޔާރުވުމެއް ކަމަށެވެ.
އުތުރުކޮރެއާއިން ފޮނުވި މިސައިލް ދަތުރުކުރިގޮތް ދެކުނު ކޮރެއާގެ ޓީވީ އަކުން ދައްކަނީ. ފޮޓޯ: ބީބީސީ