ސޯމާލިޔާއަށް ކުރިމަތިވެފައިވާ ތަދުމަޑުކަން ބޮޑުވެ، ދެ ދުވަސް ތެރޭގައި އެއް ސަރަހައްދަކުން 110 މީހުން ބަނޑަށް މަރުވެއްޖެ އެވެ.
ސޯމާލިޔާގެ ބޮޑުވަޒީރު ހޮނިހިރު ދުވަހު ވިދާޅުވެފައި ވަނީ އެގައުމުގެ ދެކުނުގެ ސަރަހައްދުތަކަށް މިހާރު ކުރިމަތިވެފައިވާ ހަނަފަސްކަމުގެ ސަބަބުން ކާނާ ލިބުން އިންތިހާއަށް ދަތިވެފައިވާ ކަމަށާއި ކާން ނުލިބުމާއި ބޭރަށް ހިންގުމުގެ ސަބަބުން މީހުން މަރުވަމުންދާ ކަމަށެވެ. މިދިޔަ ފެބްރުއަރީ މަހު ޔްނައިޓެޑް ނޭޝަންސް ( ޔޫއެން) އިން ބުނެފައި ވަނީ ސޯމާލިޔާއަށް ކުރިމަތިވެފައިވާ ހަނަފަސްކަމުގެ ސަބަބުން މިއަހަރު ތެރޭގައި 270000 ކުޑަކުދިންނަށް ކާޑުބަލި ޖެހޭނެ ކަމަށް ލަފާ ކުރެވޭ ކަމަށެވެ.
" މިއީ ހުއިހައްޕާމީހުންނަށާއި އެމީހުންގެ ނައަމްސޫފި ތަކަށް ދަތި ހާލަތެއް. ބައެއް މީހުންނަށް ވަނީ ބަނޑުހައިހޫނުކަމާއި ބޭރަށް ހިންގުމާ ދެކަންތައް އެއްފަހަރާ ޖެހިފައި. ފާއިތުވި 48 ގަޑި އިރުގެ ތެރޭގައި އައްސޭރި ސަރަހައްދުގައި ބަނޑު ހައިހޫނުކަމާއި ބޭރަށް ހިންގުމުގެ ސަބަބުން 110 މީހުން ވަނީ މަރުވެފައި،" ސޯމާލިޔާގެ ބޮޑުވަޒީރު ޙަސަން އަލީ ޚައިރުގެ އޮފީހުން ނެރުނު ބަޔާނުގައި ބުނެފައި ވެއެވެ.
ބަޔާނުގައި ބޮޑުވަޒީރު ވިދާޅުވެފައި ވަނީ ރައްޔިތުން ސަލާމަތް ކުރުމަށް ކުރެވެން އޮތް ހުރިހާ މަސައްކަތެއް ކުރައްވާނެ ކަަމަށެވެ. ދުނިޔޭގެ އެކި ކަންކޮޅުތަކުގައި ތިބި ސޯމާލިޔާ މީހުން ، ގައުމުގައި ތިބި ސޯމާލިޔާ މީހުންނަށް އެހީތެރިވުމަށް އޭނާ ވަނީ ގޮވާލައްވާފައެވެ.
ހަނގުރާމައާއި ހަނަފަސްކަމުގައި ގިނަ އަހަރުތަކެއް ހޭދަވެފައިވާ ސޯމާލިޔާގެ ރައްޔިތުންނަށް 2011 ވަނަ އަހަރު ކުރިމަތިވި ބަނޑުހައިހޫނުކަމުގައި 260000 މީހުން ބަނޑަށް މަރުވިއެވެ.
ކާން ނުދެވުމުގެ ސަބަބުން އަނަރޫފަ ވެފައިވާ ސޯމާލިޔާގެ ދެ ކުޑަކުދިން އެކުދިންގެ މައިންގެ އުނގުގައި. ފޮޓޯ: ކޮންކޯޑް މޮނިޓާ