މުސްލިމް ގައުމުތަކުގެ މީހުން އެމެރިކާއަށް ދަތުރުކުރުން މަނާކޮށް އެމެރިކާ ސަރުކާރުން އާ ރިޔާސީ ގަރާރެއް ނެރެފިއެވެ.
އެމެރިކާގެ ރައީސް ޑޮނަލްޑް ޓްރަމްޕް ކުރިން ނެރުއްވި ގަރާރުގައި ހިމެނޭ ހަތް ގައުމުގެ ތެރެއިން އާ ގަރާރުގައި ނުހިމެނެނީ އިރާގު އެކަންޏެވެ. އާ ގަރާރުގައި 90 ދުވަސް ވަންދެން އެމެރިކާއަށް ދަުރުކުރުން މަނާކޮށްފައި ވަނީ ސޯމާލިޔާ، ޔަމަން، ލީބިއާ، ސޫރިޔާ، ސޫދާން އަދި އީރާނުގެ ރައްޔިތުންނަށެވެ. އަދި ރެފިއުޖީންގެ ގޮތުގައި އެގައުމުތަކުގެ މީހުން އެމެރިކާއަށް ދިއުން އެގަރާރުގައި މަނާކޮށްފައި ވަނީ 120 ދުވަހަށެވެ.
އެމެރިކާ ސަރުކާރުގެ އާ ގަރާރުން އިރާގު އުނިކޮށްފައި ވަނީ އެގައުމުގެ މީހުން އެމެރިކާއަށް ދަތުރުކުރުމަށް ވިސާ ދޫކުރާ އުސޫލުތަކަށް ބަދަލު ގެންނަ ގޮތަށެވެ. އަތުވެދާނެ ޓެރަރިސްޓް ހަަމަލާއަކުން އެމެރިމާ ދިފާއުކުރުމުގެ ބޭނުމުގައި ކަމަށް ވިދާޅުވެ، ޓްރަމްޕް ކުރިން ނެރުއްވި ގަރާރަށް އަމަލުކުރުން އެމެރިކާގެ ކޯޓްތަކުން ވަނީ ހުއްޓުވާފައެވެ. އާ ގަރާރަށް އަމަލުކުރަން ފަށާނީ މިމަހުގެ 16 ވަނަ ދުވަހުން ފެށިގެންނެވެ.
އާ ގަރާރުގައި ތަފާތުކޮށްފައިވާ އަނެއް ކަމަކީ ރެފިއުޖީންގެ ގޮތުގައި އެމެރިކާއަށް ދިއުމަށް ކުރިން ހުއްދަދީފައިވާ މީހުން އެތެރެވުން މަނާކޮށްފައި ނުވުމާއި ސޫރިޔާ މީހުން ރެފިއުޖީންގެ ގޮތުގައި ދިއުން މުއްދަތެއް ނެތި މަނާކޮށްފައި ނުވުމެވެ.
ޓްރަމްޕްގެ އާ ގަރާރު އާއްމުކުރައްވައި އެގަރާރާ ބެހޭ މައުލޫމާތު މީޑިއާއާ ހިއްސާކުރެއްވީ އެމެރިކާގެ ސެކްރެޓަރީ އޮޕް ސްޓޭޓް ރެކްސް ޓިލާސަންއާއި އެޓާނީ ޖެނެރަލް ޖެފް ސެޝަންސްއާއި ހޯމްލޭންޑް ސެކްރެޓަރީ ޖޯން ކެލީއެވެ.
" އަހަރެމެންނަމީ ޓެރަރިސްޓް ހަމަލާތަކުން މުޅިން ދިފާއުވެފައި ބައެއް ނޫން. މިހަގީގަތް ދެމި އެބައޮތް. އަދި އަހަރެމެންގެ ދުޝްމަނުން އަހަރެމެންގެ މިނިވަންކަމާއި ދީލަތިކަން އަހަރެމެންނާ ދެކޮޅަށް ގިނަ ގިނައިން ބޭނުންކުރޭ،" ގަރާރާ ބެހޭ ގޮތުން ވާހަކަދައްކަވަމުން ކެލީ ވިދާޅުވެފައި ވެއެވެ. - ބީބީސީ
ރިޔާސީ ގަރާރުގައި ޓްރަމްޕް ސޮއިކުރައްވަނީ. ފޮޓޯ: ބީބީސީ