ސަރުކާރުގެ ގެދޮރުވެރިކުރުމުގެ ޕްރޮގްރާމުގެ ތެރެއިން ޝަރުތުތައް ހަމަވެ، ފްލެޓު ލިބޭ 661 އަށް ވުރެ ގިނަ މީހުންގެ ލިސްޓް އާންމުކުރިއިރު އެފަރާތްތަކުގެ ނަންތައް ހާމަކޮށްފައި ނުވުމުން އިދިކޮޅުފަރާތްތަކުން ކަން ބޮޑުވުން ފާޅުކޮށްފި އެވެ.
މ. ކުނޫޒުގައި މިއަދު ހަވީރު ބޭއްވި ނޫސްވެރިންގެ ބައްދަލުވުމެއްގައި ގަލޮޅު ދެކުނު ދާއިރާގެ މެންބަރު އަހުމަދު މަހުލޫފު ވިދާޅުވީ ފްލެޓް ލިބިފައިވާ ފަރާތްތަކާއި އެފަރާތްތަކަށް ފްލެޓް ލިބުނު ގޮތް ހާމަ ކުރަން ޖެހޭ ކަމަށާއި ކުރީގެ ސަރުކާރުތަކުން ވެސް ގެދޮރު ނުވަތަ ފްލެޓް ލިބޭ ފަރާތްތަކުގެ ހުރިހާ މައުލޫމާތެއް ހާމަ ކުރާ ކަމަށެވެ. އަދި ފްލެޓް ލިބުނު ފަރާތްތަކުގެ ނަންތައް ހާމަކޮށްފައިނުވަނީ މަސްލަހަތައް ބަލާފައި ކަމަށް ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވެފައިވާ ކަމަށާއި ނަމަވެސް އެ ފަރާތްތަކުގެ ނަންތައް ހާމަ ކޮށްފައިނުވަނީ ކޮރަޕްޝަނަށް މަގުފަހިވާ ގޮތަށް އެކަން ކޮށްފައިވާތީ ކަމަށް މަހުލޫފް ވިދާޅުވި އެވެ.
މަހުލޫފް ވިދާޅުވީ ފްލެޓްތަށް ނުލިބުނު ފަރާތްތަކުގެ މަސްލަހަތަށް ބަލައި އެފަރާތްތަކަށް ފްލެޓް ނުލިބުނު ސަބަބު ހާމަ ކޮށްދޭން ޖެހޭ ކަމަށާއި ދެފުށް ފެންނަ ގޮތަށް ފްލެޓްތައް ލިބުނު ފަރާތްތަކަށް ފްލެޓް ލިބުނު ގޮތް ހާމަ ކޮށްދޭން ޖެހޭނެ ކަމަށެވެ. އަދި ވިދާޅުވީ ބޯހިޔާވަހިކަން ބޭނުންވާ ނުވަތަ މަޖުބޫރުވާ އެއްވެސް ފަރާތަކަށް ފްލެޓް ލިބިގެން ގޮސްފައެއް ނުވާ ކަމަށާއި އެކަމަކީ ވަރަށް ބޮޑަށް ކަންބޮޑުވާ ކަމެއް ކަމަށެވެ.
"ފްލެޓް ލިބުނު ފަރާތްތަކުގެ ލިސްޓް އާއިރު އޮތީ ނަމްބަރު ތަކެއް، މުއިއްޒު އިއްޔެ ވިދާޅުވި، ނަންތައް ހާމަ ނުކުރަނީ ފްލެޓް ލިބުނު ފަރާތްތަކުގެ މަސްލަހަތަށްޓަކާ ކަމަށް، މަސްލަހަތު އޮންނަން ޖެހެނީ ހަމައެކަނި ފްލެޓް ލިބުނު މީހާ އަކަށް ނޫން، މަސްލަހަތު އޮންނަން ޖެހޭ އެކަމަށް އެދި ހުށަހެޅި ފަރާތްތަކުގެ ވެސް، ކުރިމަތިލާފައިވާ ފަރާތްތަކަށް އިނގެންވާނެ ދެއްތޯ ކީއްވެގެންކަން ފްލެޓް ނުލިބުނީ،" މަހުލޫފް ވިދާޅުވި އެވެ. "މުއިއްޒު އިސްކޮށް ހުރެގެން މިއަދު ލިސްޓް އާންމު ނުކުރަން އުޅުއްވާ ސަބަބަކީ މަކަރުހަދާ އޮޅުވާލާ ވައްކަން ކުރަންވެގެން، ދެފުއް ދައްކަން ވީ ނޫންތޯ، ފްލެޓްތައް ލިބުނު ގޮތް ހާމަ ކޮށްދޭންވީ ނޫންތޯ، ކާކަށް ކިހިނެއް ލިބުނު އެއްޗެއްތޯ،"
މަހުލޫފު އިތުރަށް ވިދާޅުވީ ކުރީގެ ރައީސް މުހައްމަދު ނަޝީދުގެ ސަރުކާރުގައި އާޅާފައިވާ ފްލެޓްތަކެއް މިސަރުކާރުން ހައްގުވެރި ފަރާތްތަކަށް ދިނުމަށް ނުކުޅެދިފައިވާ ކަމަށެވެ. އަދި ކޮރްޕަޝަނަށް މަގުފަހިވާ ގޮތަށް ފްލެތްތައް ހޯދާފައިވާ ފަރާތްތަކުގެ މައްސަލަ ފަހުން ބެލޭނެ ކަމަށެވެ. އަދި އެފަދަ އެއްވެސް ކަމެއްގައި ބައިވެރިނުވުމަށް ވެސް މަހުލޫފު ގޮވާލާފައި ވެއެވެ.