ދަރުމަވަންތަ ހޮސްޕިޓަލް ހުޅުވުން އަންނަ މިނިވަން ދުވަހު

އައިޖީއެމްއެޗްގައި އަލަށް އިމާރާތްކުރާ 25 ބުރީގެ އިމާރާތް، ދަރުމަވަންތަ ހޮސްޕިޓަލްގެ ކޮންސްޓްރަކްޝަން މަސައްކަތް މިއަދު ނިމިގެން ދިއުމާއެކު ސަރުކާރުން އަމާޒު ހިފާފައިވަނީ އަންނަ އަހަރުގެ މިނިވަން ދުވަހު އެ އިމާރާތުގެ ހުރިހާ މަސައްކަތް އެއްކޮށް ނިންމައި ހިދުމަތްދޭން ފެށުން ކަމަށް ހެލްތް މިނިސްޓަރު އަބްދުﷲ ނާޒިމް މިއަދު ވިދާޅުވެއްޖެ އެވެ.

ދަރުމަވަންތަ ހޮސްޕިޓަލްގެ ޓޮޕިން އޮފް ނުވަތަ އެ އިމާރާތުގެ އެންމެ ފަހު ކޮންކުރީޓް މަސައްކަތް ނިންމުމަށް މިއަދު ބޭއްވި ރަސްމިއްޔާތުގައި މިނިސްޓަރު ވިދާޅުވީ އަައިޖީއެމްއެޗަކީ މިއަދު ގާތްގަނޑަކަށް 250 ހާއި 300 ދެމެދުގެ އަދަދަކަށް އެނދުގެ ހިދުމަތް ދެމުންދާ ހޮސްޕިޓަލެއް ކަމަށާއި ދަރުމަވަންތަ އިމާރާތް ނިމުމާއެކު އައިޖީއެމްއެޗާއި ދަރުމަވަންތަ ހޮސްޕިޓަލުން ރައްޔިތުންނަށް 500 އެދުގެ ހިދުމަތަށް ދެވިގެންދާނެ ކަމަށެވެ. އަދި އެންމެ ޒަމާނީ ޑައިގްނޯސްޓިކް ހިދުމަތްތައް ގާއިމް ކުރެވި، ސިއްހީ ނިޒާމަށް ހެޔޮ ބަދަލުތަކެއް އަތުވެގެންދާނެ ކަމަށް މިނިސްޓަރު ވިދާޅުވި އެވެ.

މިނިސްޓަރު ވިދާޅުވީ ރައީސް ޔާމީންގެ އަމާޒަކީ މި ރީޖަންގައި އެންމެ ފެންވަރު ރަނގަޅު ހޮސްޕިޓަލަށް ދަރުމަވަންތަ ހޮސްޕިޓަލް ވެގެން ދިއުން ކަމަށާއި މި ހޮސްޕިޓަލްގެ ސަބަބުން ހުސްނުވާ އާސަންދާގެ ދަށުން ބޭރަށް ސިއްހީ ހިދުމަތް ހޯދަންދާ ފަރާތްތައް މަދުވެގެން ދިއުން ކަމަށެވެ. އަދި އެކަމުގެ ސަބަބުން ގައުމަށް އެތަށް ޑޮލަރެއް އިތުރުވެގެން ދާނެ ކަމަށާއި ގައުމުގެ އެތަށް ފައިސާއެއް ރައްކާ ކުރެވިގެން ދާނެ ކަމަށް މިނިސްޓަރު ވިދާޅުވި އެވެ.

މި އިމާރާތަކީ 2016 ވަނަ އަހަރު ޖޫން މަހުގެ 5 ވަނަ ދުވަހު ބިންގާ އެޅި އިމާރާތެކެވެ.

"ސަރުކާރުން އަމާޒުހިފަނީ ޖުލައި މަހުގެ 26 ވަނަ ދުވަހު ރައްޔިތުްނނަށް ދެވޭ ހަދިޔަލެއްގެ ގޮތުގައި، މިއީ ކުޑަ މަސައްކަތެއް ނޫން، ބޮޑު މަސައްކަތެއްް، މި މަސައްކަތް ފެށިގެން އަންނަނީ، ވިޝަންއަކުން، ލީޑާޝިޕަކުން، " މިނިސްޓަރު ވިދާޅުވި އެވެ.

މިނިސްޓަރު އިތުރަށް ވިދާޅުވީ ވޭތުވެދިޔަ ސަރުކާރުން މިފަދަ ބޮޑު ހޭދައެއް ސިއްހީ ހިދުމަތަށް ކުރެއްވުމުގެ ގާބިލްކަން ފެނިފައި ނެއްކަމީ މިއަދު ސިއްހީ ނިޒާމްގައި ހުރި ގޮންޖެހުން ރަމްޒުކޮށްދޭ ކަމެއް ކަމަށެވެ. އަދި މި ހިދުމަތްތައް ފުޅާވެގެން ދިއުމުން ރައްޔިތުންގެ އިޖުތިމާއީ އެތަށް ކަމަކަށާއި ސިއްހީ އެތަށް ކަމަކަށް ހެޔޮ ބަދަލު އައިސް އިގްތިސޯދަށް ހެޔޮ އަސަރު ކުރާނެ، ކަމަށް މިނިސްޓަރު ވިދާޅުވި އެވެ.

"ވޭތުވެދިޔަ ސަރުކާރުން ކުރެވިފައިނުވާ ކަމަކީ، މިކަލަ ބޯލްޑް ޑިސިޝަނެއް ނެގުން، މިފަދަ ބޮޑު ހޭދައެއް ސިއްހީ ހިދުމަތަށް ކުރެއްވުމުގެ ގާބިލްކަން ފެނިފައި ނެއްކަމީ މިއަދު ސިއްހީ ނިޒާމްގައި ހުރި ގޮންޖެހުން ރަމްޒުކޮށްދޭ ކަމެއް، އެދުވަހު މި މަސައްކަތް މިގޮތަށް ކުރެވުނު ނަމަ މި ޝަކުވާ މިއަދު ކުރާކަށް ނުޖެހުނީސް،" މިނިސްޓަރު ވިދާޅުވި އެވެ.

ރާއްޖެތެރޭގައި ގާއިމް ކުރެވެމުންދާ ހޮސްޕިޓަލްތަކުގެ މަސައްކަތްތަކަށް އަލިއަޅުވާލައި މިނިސްޓަރު ވިދާޅުވީ ކުޅުދުއްފުށި ހޮސްޕިޓަލްގެ މަސައްކަތް ވަރަށް ހަލުވި ކަމާއެކު ތާވަލާ އެއްގޮތަށް ކުރިއަށްދާ ކަމަށާއި ދެއަހަރެއްގެ ތެރޭގައި އެތަން ވެގެންދާނީ 150 އެނދުގެ ހޮސްޕިޓަލަކަށް ކަމަށެވެ. އަދި އައްޑޫ ހޮސްޕިޓަލްގެ މަސައްކަތް ވެސް ތާވާލާ އެއްގޮތަށް ކުރިއަށްދާ ކަމަށާއި މިއަންނަ އަހަރު މެދުތެރޭގައި އެތަނުގެ މަސައްކަތް ނިމި އެތަން ވެގެންދާނީ 100 އެނދުގެ ހޮސްޕިޓަލަކަށް ކަމަށް މިނިސްޓަރު ވިދާޅުވި އެވެ.