ރޮހިންޔާ މުސްލިމުންނަށް އެހީވުމަށް މޯލްޑިވްސް އެއަޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ހަރަކާތްތަކެއް ކުރިއަށް ގެންގޮސްފި އެވެ.
އެމްއޭސީއެލުން، ވެލާނާ އިންޓަނޭޝަނަލް އެއަޕޯޓްގައި އިއްޔެ ކުރިއަށް ގެންދިޔަ ހަރަކާތްތަކުގެ ތެރޭ، ހެނދުނު އެކުންފުނީގެ ގިނައަދެއްގެ މުވައްޒަފުން ވަނީ ރޮހިންޔާ މުސްލިމުންނާއި އެކުގައި ތިބިކަން ދައްކައި ދިނުމުގެ ގޮތުން އެއަޕޯޓުގެ ވަަކި ސަރަހައްދެއްގައި ހިނގާލުމެއް ބޭއްވި އެވެ.
އެމްއޭސީއެލުން ރޮހިންޔާ މުސްލިމުންނަށް އެހީ ވުމުގެ ގޮތުން އެކުންފުނީގެ ކޮންމެ މުވައްޒަފެއްގެ އެއްދުވަހުގެ މުސާރަ އާއި އެލަވަންސްތަކުގެ އިތުރުން އެއަޕޯޓުގައި ހުންނަ ދޮވެމި އެރައިވަލް ޝޮޕްގެ އެއްދުވުގެ ޕްރޮފިޓް ރޮހިންޔާ މުސްލިމުންނަށް ހަދިޔާ ކޮށްފަ އެވެ. މީގެ އިތުރުން ވެލާނާ އިންޓަނޭޝަނަލް އެއަޕޯޓުގެ އެކި ސަރަހައްދުތަކުގައި ފަންޑު ފޮށިތައްވެސް ވަނީ ބަހައްޓާފައެވެ.
ރޮހިންޔާ މުސްލިމުންނަށް އެހީވުމުގެ ގޮތުން ރާއްޖޭގެ އެކި ކަންކޮޅު ތަކުގައި އާއި މާލޭގައި ވަރަށް ގިނަ ފަރާތްތަކުން އެކި ޕްރޮގްރާމްތައް އަންނަނީ ހިންގަމުންނެވެ. ސަރުކާރުގެ ގިނަ ކުންފުނިތަކަކުން ދަނީ އެކުންފުނިތަކުގެ މުއައްޒަފުންގެ އެއްދުވަހުގެ މުސާރަ ރޮހިންޔާ މުސްލިމުންނަށް އެހީވުމަށް ހަދިޔާ ކުރަމުން ނެވެ.