ސަރުކާރުގެ ހައުސިން ސްކީމްގެ ދަށުން ތިން ރަށެއްގައި 300 ހައުސިން ޔުނިޓް އަޅަން ފިނޭންސް މިނިސްޓްރީން އިއުލާން ކޮށްފި އެވެ.
ފިނޭންސް މިނިސްޓްރީން މިއަދު ކުރި އިއުލާނެއްގައި ބުނީ، ހައުސިން މިނިސްޓްރީގެ އެދުމުގެ މަތިން ސަރުކާރުގެ ސޯޝަލް ހައުސިން ސްކީމްގެ ދަށުން ޅ. ހިންނަވަރާއި އެއަތޮޅު ނައިފަރު އަދި ސ. ފޭދޫގައި އަޅަން ނިންމާފައިވާ 300 ހައުސިން ޔުނިޓްގެ ޑިޒައިނާއި ބިލްޑް އަދި ކޮންޓްރެކްޓަ ފައިނޭންސް އުސޫލުން ތަރައްގީ ކުރާނެ ފަރާތެއް ހޯދަން ބޭނުންވާ ކަމަށެވެ.
އެ ޔުނިޓްތައް އަޅަން ޝައުގުވެރިވާ ފަރާތްތަކަށް ބީލަން ހުށަހެޅުމުގެ ފުރުސަތު އަންނަ މަހުގެ 21 ވަނަ ދުވަހާއި ހަމައަށް ހުޅުވާލާފައިވާ ކަމަށެވެ. އަދި ބީލަމުގައި ބައިވެރިވާން 1500 ރުފިޔާގެ ފީއެއް ދައްކަން ޖެހޭ ކަމަށާއި މިމަހު 16 އިން 21 އަށް ފީ ބަލައިގަންނާނެ ކަމަށްވެސް އިއުލާނުގައި ވެއެވެ.
އެ ތިން ރަށުގައި ގާއިމް ކުރަން އިއުލާން ކޮށްފައިވާ 300 ހައުސިން ޔުނިޓްގެ ތެރެއިން ކޮންމެ ރަށެއްގައި އަޅަން ނިންމާފައިވަނީ 100 ހައުސިން ޔުނިޓެވެ. ބީލަން ހުށަހަޅުން ވަނީ ތިން ލޮޓަކަށް ބަހާލާފަ އެވެ. އެގޮތުން ކޮންމެ ރަށެއްގައި ގާއިމްކުރާ 100 ހައުސިން ޔުނިޓްގެ ބިޑްސެކިޔުރިޓީ ގޮތުގައި 250000 ރުފިޔާ ދައްކަން ޖެހެއެވެ. ބިޑްސެކިޔުރިޓީގެ މުއްދަތަކީ ބިޑް ހުޅުވާ ތާރީހުން ފެށިގެން 148 ދުވަހެވެ.
ބީލަން ހުޅުވަން ހަމަޖެހިފައިވަނީ އަންނަ މަހު 23 ވަނަ ދުވަހު ފިނޭންސް މިނިސްޓްރީގެ ނެޝަނަލް ޓެންޑަ އެންޑް ޕްރޮޖެކްޓް މޮނިޓަރިން ގެ ޖަލްސާކުރާ މާލަމުގައެވެ.