އިންޑިއާގެ ކުރީގެ ބޮޑުވަޒީރު ޑރ. މަންމޯހަން ސިންގް އަވަހާރަވުމާ ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ތައުޒިޔާގެ މެސެޖެއް ފޮނުއްވައިފި އެވެ.
ރައީސުލްޖުމްހޫރިއްޔާގެ ރަސްމީ "އެކްސް" އެކައުންޓުން ހިއްސާކުރެއްވި މެސެޖުގައި ވަނީ 2011 ވަނަ އަހަރުގެ ނޮވެމްބަރު މަހު، މަންމޯހަން ސިންގް ރާއްޖެއަށް ކުރެއްވި ތާރީހީ ޒިޔާރަތުގެ ހަނދާން އާކުރައްވާފަ އެވެ. އަދި އެ ޒިޔާރަތް ވެގެންދިޔައީ ރާއްޖޭގެ އިގްތިސާދީ އަދި އިޖުތިމާއީ ކުރިއެރުމުގެ މުހިއްމު ނިޝާނަކަށް ކަމަށް ވިދާޅުވި އެވެ.
މީގެ އިތުރުން ތަމައްދުނު ހާސިލްކުރެއްވުމުގައި މަންމޯހަން ސިންގް ދެއްކެވި ސާބިތުކަމާއި، ދެކުނު އޭޝިޔާގައި އެއްބާރުލުމާއި ތަރައްގީ ފަހިކުރުމުގައި މުހިއްމު ދައުރެއް އަދާކުރާ "ލުކް އީސްޓް ޕޮލިސީ" ހަރުދަނާކުރެއްވުމުގައި ސިންގް އަދާކުރެއްވި އިސް ދައުރުވެސް ރައީސް ވަނީ ފާހަގަކުރައްވާފަ އެވެ.
ރައީސުލްޖުމްހޫރިއްޔާގެ މެސެޖު ނިންމަވާލައްވާފައިވަނީ، ފުން ހިތާމައިގެ މިދަނޑިވަޅުގައި މަންމޯހަން ސިންގްގެ އާއިލާއަށާއި އިންޑިއާގެ ރައްޔިތުންނަށް ތައުޒިޔާ ވިދާޅުވެފަ އެވެ.