ޕީޕީއެމުންް ވަކިކޮށް ރައްޔިތުން މަޖިލީހުގެ ގޮނޑި ގެއްލިފައިވާ ކަމަށް އިލެކްޝަން ކޮމިޝަނުން ނިންމާފައިވާ މެންބަރުން ކުރީ ބަގާވާތެއް ކަމަށް ރައީސް އަބުދުﷲ ޔާމީން ވިދާޅުވަމުންދާ ކަމަށާއި އެކަން ކަމާބެހޭ ފަރާތްތަކަށް ހުށަހަޅަން ނިންމާފައިވާ ކަމަށް އިދިކޮޅު ފަރާތްތަކުން މިރޭ ބުނެފި އެވެ.
ނޫސްވެރިންގެ ބައްދަލުވުމުގައި މަޑުއްވަރީ ދާއިރާގެ މެންބަރު މުހައްމަދު އަމީތު ވިދާޅުވީ، ޕީޕީއެމުން ވަކިވެ އިދިކޮޅު ފަރާތްތަކާއި ގުޅުމަކީ ބަގާވާތެއް ނޫން ކަމަށާއި ޕާޓީ ބަދަލު ކުރުމަކީ ބަގާވާތް ކުރުން ކަމަށް އެއްވެސް ގާނޫނަކު ބަޔާންކޮށްފަ ނުވާ ކަމަށެވެ. އަދި ވިދާޅުވީ، ވޭތުވެދިޔަ ހަތަރު އަހަރު 15 މެންބަރަކު އެހެން ޕާޓީތަކުގައި ތިބުމަށް ފަހު ޕީޕީއެމަށް ގުޅިފައިވާ ކަމަށާއި މެންބަރުން އިދިކޮޅު ފަރާތްތަކާއި ގުޅުމަކީ ބަގާވާތެއްގެ ގޮތުގައި ސިފަ ކުރާނަމަ އެންމެ ފުރަތަމަ ބަގާވާތެއް ކުރީ ރައީސް ޔާމީން ކަމަށް އަމީތު ތުހުމަތު ކުރެއްވި އެވެ.
"ރައީސް ރައްޔިތުންނާ ބައްދަލު ކުރައްވާ ކޮންމެ ފަހަރަކު ވިދާޅުވޭ އަޅުގަނޑުމެން މެންބަރުން މިތިބީ ބަގާވާަތެއް ކޮށްގެން ކަމަށް، ޕީޕީއެމުން ވަކިވި ވަކިވުމާއި އިދިކޮޅު ފަރާތްތަކާއި ގުޅުނު ގުޅުންވެސް ސިފަކުރަނީ ބަގާވާތެއްގެ ގޮތުގައި، އެއްވެސް ގާނޫނަކުނެއް ބަޔާންކޮށްފަ ޕާޓީ ބަދަލު ކުރުމަކީ ބަގާވާތެއް ކަމަށް،" އަމީތު ވިދާޅުވި އެވެ.
ވިލިގިލީ ދާއިރާގެ މެންބަރު، ސައުދު ވިދާޅުވީ ދައުލަތުގެ އެކިއެކި މުއައްސަސާތަކުގެ އޮޑިޓް ރިޕޯޓްތަކުން ހިޔާނާތުގެ އެކިއެކި މައްސަލަތައް ފެންނަމުންދާ ކަމަށާއި މަޖިލީހުގެ ތެރޭގައި ކުރަމުން ގެންދިޔަ މަސައްކަތަކީ އެކަންކަން ހުއްޓުވުން ކަމަށެވެ. އަދި ވިދާޅުވީ، ދައުލަތުގެ ތެރޭގައި ހިންގާ ކޮރަޕްޝަނުގެ މައްސަލަތައް ހުއްޓުވައި ސަރުކާރު ޖަވާބުދާރީ ކުރުމަށް ކުރާ މަސައްކަތަކީ ބަގާވާތެއް ކަމަށް ސިފަ ކުރާނަމަ މެންބަރުންގެ ބޮލުގައި އަޅުވަނީ ވަރަށް ބޮޑު އިލްޒާމެއް ކަމަށެވެ.
"އަޅުގަނޑު މެންނަށް ބަގާވާތުގެ މާނަ އޮޅިއްޖެ، ރައީސް ޔާމީން އެގޮތަށް ވާހަކަ ދައްކަވާނަމަ އަޅުގަނޑުމެން މި ނިންމަނީ އެ މައްސަލަ ކަމާބެހޭ ފަރާތްތަކަށް ހުށަހަޅަން،" ސައުދު ވިދާޅުވި އެވެ. "ރާއްޖޭގެ ރައްޔިތުންގެ އުދާސްތަކާ އެއްގޮތަށް ރައްޔިތުން މަޖިލީހުގެ ތެރެއިން މަސައްކަތް ކުރުމަށް މަޖިލީހުގެ މެންބަރު މަސައްކަތް ކުރީ، ދައުލަތުގެ ތެރޭގައި ފާހަގަ ކުރެވޭ ކޮރަޕްޝަނުގެ މައްސަލަތައް، އެކަންކަން އެމަގުން ދިޔަ ނުދީ ސަރުކާރު ޖަވާބުދާރީ ކުރެއްވުމަށް ކުރާ މަސައްކަތަކީ ބަގާވާތެއް ކަމަށް ސިފަ ކުރާނަމަ މެންބަރުންގެ ބޮލުގައި އެ އަޅުވަނީ ވަރަށް ބޮޑު އިލްޒާމެއް"
ސައުދު އިތުރަށް ވިދާޅުވީ، ޕީޕީއެމްގައި މިހާރު އިސްކޮށް ތިިބި މެންބަރުންނަކީ ޕީއޭ އިން އައިސްތިބި މެންބަރުން ތަކެއް ކަމަށެވެ. އަދި ޕީޕީއެމްގެ އިސްކޮށް އުޅުއްވި އެއްވެސް ބޭފުޅަކު ޕީޕީއެމް ހިންގުން ރާއީސް ޔާމީން އާ ހަވާލެއް ނުކުރާ ކަމަށާއި ބަގާވާތެއް ކުރިކަމަށް ރައީސް ޔާމީން ވިދާޅުވާއިރު އެމަނިކުފާނު އެ ހުންނެވީ ޕީޕީއެމް ތެރޭގައި ބަގާވާތެއް ކޮށް ޕާޓީ ހިސޯރު ކޮށްގެން ކަމަށް ސައުދު ވިދާޅުވި އެވެ.
ނޫސްވެރިންގެ ބައްދަލުވުމުގައި ތުލުސްދޫ ދާއިރާގެ މެންބަރު މުހައްމަދު ވަހީދު (ލޯޔަރު ވައްޑެ) ވިދާޅުވީ، ރައްޔިތުން މަޖިލީހުގެ މިހާރު އޮތް ގާނޫނު އަސާސީ އެކުލަވާލައި ފާސްކުރި އިރު ރައީސް ޔާމީންވެސް އިންނެވީ މަޖިލީހުގައި ކަމަށާއި ބަގާވާތެއް ކުރަން އެއްވެސް މާއްދާއެއްގައި ނޯންނާނެ ކަމަށެވެ. އަދި ވިދާޅުވީ، ގާނޫނު އަސާސީގައި ރައްޔިތުން މަޖިލީހުގެ ރައީސް ވަކި ކުރުމަށް ކުރެވެންހުރި ކަންކަން މާއްދާތަކުގައި ބަޔާންކޮށްފައި އެބަހުރި ކަމަށާއި މަޖިލީހުގެ ރައީސް މަގާމުން ވަކި ކުރުމަށް ކުރާ މަސައްކަތަކީ ބަގާވާތެއް ކަމަށް ގާނޫނުއަސާސީއަކު ނެތް ކަމަށެވެ.