އަންނަ އަހަރަށް ލަފާކުރާ ދައުލަތުގެ ބަޖެޓްގެ މަސައްކަތް 10 ދުވަސް ތެރޭ ނިންމާ ގޮތަށް މިއަދު ކޮމެޓީން ނިންމިފި އެވެ.
މާލިޔަތު ކޮމެޓީ އާއި އިގްތިސޯދީ ކޮމެޓީ އެއްކޮށްލައިގެން ހެދި ބަޖެޓް ކޮމެޓީން 10 ދުވަސް ތެރޭ ބަޖެޓްގެ މަސައްކަތް ނިންމަން ހުށަހެޅީ، ވިލިފުށީ ދާއިރާގެ މެންބަރު ރިޔާޒު ރަޝީދެވެ. އެކަމަށް ތާއިދު ކުރެއްވީ ނިލަންދޫ ދާއިރާގެ މެންބަރު އަބްދުﷲ ހަލީލެވެ. ރިޔާޒުގެ ހުށަހެޅުން ފާސްކުރީ 13 މެންބަރުންގެ ވޯޓުންނެވެ. އެހެންކަމުން މި މަހުގެ 25 ކުރިން ކޮމެޓީން ބަޖެޓްގެ ކަންކަން ނިންމާނެ އެވެ.
ބަޖެޓް ކޮމެޓީގެ މުގައްރިރާއި ނައިބު މުގައްރިރު ވެސް މިއަދު ވަނީ ހޮވާފަ އެވެ. މުގައްރިރަކަށް ހޮވާފައިވަނީ ވިލިމާލެ ދާއިރާގެ މެންބަރު އަހުމަދު ނިހާން ހުސެއިން މަނިކެވެ. ނައިބު މުގައްރިރަކަށް ހޮވާފައިވަނީ، ކުޑަހުވަދޫ ދާއިރާގެ މެންބަރު އަހުމަދު އާމިރެވެ. މުގައްރިރާއި ނައިބު މުގައްރިރު ހޮވާފައިވަނީ މީޑިއާ ނުވައްދަ އެވެ.
އަންނަ އަހަރަށް ލަފާކޮށް 28 ބިލިއަން ރުފިޔާގެ ބަޖެޓެއް ސަރުކާރުން މިއަދު މަޖިލީހަށް ވަނީ ހުށަހަޅާފަ އެވެ. އެ ބަޖެޓްގެ ދަރަނިވެސް 2.5 ބިލިއަން ރުފިޔާ އަށް (ޖީޑީޕީގެ ނިސްބަތުން 3.8 ޕަސެންޓް) އަރަ އެވެ. މިއަހަރު ބަޖެޓްގެ ދަރަނި ވެސް 1.4 ބިލިއަން ރުފިޔާ އަށް އަރަ އެވެ.
އިދިކޮޅު މެންބަރުންގެ އިހުތިޖާޖާ އެކު "2018 ވަނަ އަހަރަށް ލަފާ ކުރާ ދައުލަތުގެ ބަޖެޓް" މަޖިލިހަށް ހުށަހަޅުއްވައި ދެއްވަމުން ފިނޭންސް މިނިސްޓަރު އަހުމަދު މުނައްވަރު ވިދާޅުވީ އަންނަ އަހަރުގެ ބަޖެޓްގައި ހަރަދުގެ ގޮތުގައި ހިނގާނެ ކަމަށް ބެލެވެނީ، 24.9 ބިލިއަން ރުފިޔާ ކަމަށެވެ. އަދި އާމްދަނީ އާއި ހިލޭ އެހީގެ ގޮތުގައި 22.4 ބިލިއަން ރުފިޔާ ލިބޭނެ ކަމަށް މިނިސްޓަރު ވިދާޅުވި އެވެ.