މާދަމާ އިންފެށިގެން ސިމް ކާޑު އެކްޓިވޭޓް ވާނީ ކަސްޓަމަރުގެ ފުރިހަމަ މައުލޫމާތު އެނގިގެން ކަމަށް ކޮމިއުނިކޭޝަން އޮތޯރިޓީ އޮފް މޯލްޑިވްސް (ކޭމް) އިން އިއުލާންކޮށްފި އެވެ.
މިއީ މުވާސަލާތީ ވަސީލަތްތައް ބޭނުންކޮށްގެން ކުރާ ނޭދެވޭ އަމަލުތައް ދުވަހުން ދުވަހަށް އިތުރުވަމުންދާތީ މިފަދަ އަމަލުތައް މަދުކުރުމަށް އަޅާ ފިޔަވެޅެއް ކަމުގައި ކޭމްއިން ބުންޏެވެ.
މި ބަދަލުތަކާއެކު، ސިމް ކާޑު ކަސްޓަމަރުންނަށް ދޫކުރުމުގެ ކުރިން ހުންނާނީ ބޭނުން ނުކުރެވޭ (ނޮން އެކްޓީވޭޓެޑް ސްޓޭޓަސް) ހާލަތުގަ އެވެ. ސިމް ކާޑު އެކްޓިވޭޓް ވާނީ، ސިމް ކާޑު ދޫކުރާ ކަސްޓަމަރުގެ ފުރިހަމަ މައުލޫމާތު ސާވިސް ޕްރޮވައިޑަރަށް ދިނުމުންނެވެ.
މިކަމާ ބެހޭ އިތުރު ތަފްސީލް، ހިދުމަތް ހޯދަން ބޭނުންވާ ސާވިސް ޕްރޮވައިޑަރުންގެ ފަރާތުން ލިބޭނެ ކަމަށްވެސް ކޭމް އިން ބުނެފައިވެ އެވެ.
ސިމް ކާޑު ދޫކުރުމުގެ އުސޫލު ހަރުދަނާ ކުރުމަށް ކުރަމުންދާ މަސައްކަތްތަކުގެ ދަށުން ކުރިއަށް އޮތް ތަނުގައި އިތުރު ކަންކަންވެސް ކުރުމަށް ހަމަޖެހިފައިވާ ކަމުގައި ކޭމް އިން ބުނެ އެެވެ.
ސިމް ކާޑު ބޭނުންކޮށްގެން ސްކޭމް ކުރުމާއި އެނޫންވެސް ނޭދެވޭ އަމަލުތައް ކުރަމުންދާއިރު، ފަސް ބިދޭސީއަކު ކޮންމެ މީހަކު އެވަރެޖްކޮށް 5،000 ސިމް ގަނެފައިވާ ކަމަށްވެސް ދާދިފަހުން ފުލުހުން ބުނެފައިވެ އެވެ.