އިސްރާފު ނުކުރުމާއި ބޭކާރު ހަރަދުތައް ދޫކޮށްލުމުގެ އާދަ އެންމެންވެސް ހިފެހެއްޓުމަށް ރައީސް ޑރ. މުހައްމަދު މުއިއްޒު އެދިވަޑައިގެންފި އެވެ.
ރައީސް މިކަމަށް އެދިވަޑައިގެންފައި މިވަނީ ދައުލަތުގެ ހަރަދުތައް ކުޑަކުރުމަށް ވަރުގަދަ ފިޔަވަޅުތަކެއް އެޅުމަށް ތައްޔާރުވަމުންދާ ވަގުތެއްގައި ހިޖުރީ އާ އަހަރާ ގުޅުވައިގެން ފޮނުއްވި ހިތާބެއް ގައެވެ.
ރައީސް ވިދާޅުވީ އިސްރާފު ނުކުރުމާއި ބޭކާރު ހަރަދުތައް ދޫކޮށްލުމުގެ އާދަ އެންމެންވެސް ހިފުމަކީ މުޅި ގައުމުގެ އިގްތިސާދަށް އޭގެ ފައިދާ ލިބޭނެ ކަމެއް ކަމަށެވެ.
"އައު އަހަރުގެ އަޒުމަކަށް ހަދަންވީ ރާއްޖޭގެ މާދަމާގެ ސަލާމަތާ، ފުދުންތެރިކަމަށް ސަރުކާރުން ފަށާފައިވާ އިސްލާހީ އަދި ބިނާކުރަނިވި މަސައްކަތްތަކަށް އެއްބާރުލުން ދެއްވުން،" ރައީސް ވިދާޅުވި އެވެ.
އެމަނިކުފާނު ވިދާޅުވީ ހިޖުރީ އާ އަހަރެއްގައި އާ ކުރަންވީ އެއް އަޒުމަކީ އެއްބައިވަންތަވެ، ގައުމުގެ ކަންކަން އިސްލާހުކުރުމުގައި އެންމެން އެކަތިގަނޑަކަށް ވުން ކަމަށެވެ.
ރައީސްގެ ހިތާބުގައި ގައުމުގެ ކުރިއެރުމަށްޓަކައި ރައްޔިތުންގެ އެއްބައިވަންތަކަމާއި، އާއިލާތަކުގެ ބަދަހިކަމަށް މަސައްކަތްކޮށް އަވަށްޓެރިކަމުގެ ގުޅުންތައް ދެމެހެއްޓުން މުހިއްމު ކަމުގައި ވިދާޅުވި އެވެ.
ހިޖްރީ އައު އަހަރަކާ ބައްދަލުކުރާއިރު ފަލަސްތީނުގެ މުސްލިމް އަހުންނާއި އުހުތުންނަށް ކުރިމަތިވެފައިވާ ނުތަނަވަސްކަމާއި، ހަނގުރާމައިގެ ނާމާން ހާލަތަކީ މުޅި އިސްލާމީ އުންމަތަށް އޮތް އެންމެ ބޮޑު ކަންބޮޑުވުން ކަމުގައިވެސް ރައީސް ވިދާޅުވި އެވެ. އުންމަތަށް ކުރިމަތިވެފައިވާ މިފަދަ ގޮންޖެހުންތަކުން އަރައިގަތުމަށްޓަކައި، ގުޅިގެން އެއް އުންމަތެއްގެ ގޮތުގައި މަސައްކަތް ކުރަންޖެހޭ ކަމުގައިވެސް ވިދާޅުވި އެވެ.