އެމެރިކާ އާއި ރާއްޖެ ގުޅިގެން އުފައްދާފައިވާ ޓްރޭޑް އެންޑް އިންވެސްޓްމަންޓް ފްރޭމްވޯކް އެގްރީމަންޓް (ޓީއައިއެފްއޭ) ކައުންސިލްގެ ތިންވަނަ ބައްދަލުވުން ބާއްވައިފި އެވެ.
އެމެރިކާގެ ވެރިރަށް ވޮޝިންޓަންގައި މިއަދު ކުރިއަށް ދިޔަ މިބައްދަލުވުމުގައި ރާއްޖޭގެ އިކޮނޮމިކް މިނިސްޓަރު މުހައްމަދު ސައީދާއި އެމެރިކާއިން ދެކުނު އަދި ސެންޓްރަލް އޭޝިއާއަށް ކަނޑައަޅުއްވާފައި ހުންނެވި އެސިސްޓެންޓް ޓްރޭޑް ރިޕްރެސެންޓޭޓިވް ބްރެންޑަން ލިންޗްގެ އިތުރުން ދެ ގައުމުގެ އިސް ބައެއް ބޭފުޅުންވެސް ބައިވެރިވެވަޑައިގެންނެވި އެވެ.
މިބައްދަލުވުމަށްފަހު ނެރުނު ގުޅިފައިވާ ބަޔާނެއްގައި ބުނެފައިވަނީ ދެ ގައުމުގެ އިގްތިސާދީ ގުޅުން އިތުރަށް ފުޅާކޮށް، އިތުރު އިންވެސްޓްމަންޓް ފުރުސަތުތައް ހޯދުމާ ގުޅޭގޮތުން މަޝްވަރާ ކުރެވުނު ކަމަށެވެ. ރައީސް ޑރ. މުހައްމަދު މުއިއްޒު ސަރުކާރުގެ އިގްތިސާދީ ސިޔާސަތު ހުށަޅައި، ދެވެން އޮތް އެއްބާރުލުމެއް ދިނުމަށް މިބައްދަލުވުމުގައި ރާއްޖެ އިން ހުށަހެޅި ކަމަށް ބަޔާނުގައިވެ އެވެ.
މިބައްދަލުވުމުގައި ދެ ގައުމުންވެސް ވަނީ ފިކުރީ މުދާ ހިމާޔަތްކޮށް ތަންފީޒުކުރުމާ ގުޅޭ މައްސަލަތަކުގައި އެއްބާރުލުން ދިނުމުގެ މުހިއްމުކަމާ ގުޅޭގޮތުން ވާހަކަދައްކާފަ އެވެ. އަދި ރާއްޖެއިން ވަނީ ވިޔަފާރި މުއާމަލާތްތަކުގައި ބޭނުންކުރާ ބައިނަލްއަގްވާމީ ޕްލެޓްފޯމްތަކާއި ޕޭމަންޓް ސިސްޓަމް ސޮލިއުޝަންތަކުގެ ފައިދާ ހޯދޭނެ ގޮތްތަކާއި ގުޅޭގޮތުން ޑިޖިޓަލް ކޮންޓެންޓް ކްރިއޭޓަރުންނާއި އާޓިސްޓުންނާއި ވިޔަފާރިވެރިންނަށް އިތުރު ފައިދާއާއި ފަސޭހަތައް ހޯދުމަށް މަޝްވަރާކޮށްފަ އެވެ.
ދެ ގައުމުންވެސް މިބައްދަލުވުމުގައި ވަނީ މަސައްކަތްތެރިންގެ ހައްގުތަކާއި ޑިޖިޓަލް ވިޔަފާރިއާއި ތިމާވެށީގެ ކަންކަމުގައި އެއްބާރުލުން އިތުރުކުރުމަށް ގުޅިގެން މަސައްކަތް ކުރުމާ ގުޅޭގޮތުން ވާހަކަދައްކާފަ އެވެ.
މިސަރުކާރުން ވަނީ މޯލްޑިވްސްއިން ކުރަމުންދާ އިޤްތިޞާދީ އިސްލާހުތަކާއި، ވިޔަފާރި އިތުރުކޮށް، އިންވެސްޓްމަންޓަށް ބާރުއެޅުމުގެ ގޮތުން ވިޔަފާރީގެ މާޙައުލު ރަނގަޅުކުރުމަށް ކުރަމުންދާ މަސައްކަތްތަކާ ބެހޭގޮތުން މަޝްވަރާކޮށްފައެވެ.
މިނިސްޓަރު ސައީދު އެމެރިކާއަށް ވަޑައިގެން އިންވެސްޓްމަންޓް ފުރުސަތުތައް ހޯދުމަށް މަޝްވަރާ ކުރައްވަމުން ގެންދަވާއިރު މިދިޔަ މަހުގެ ތެރޭގައި ރާއްޖޭގެ ހާރިޖީ ވަޒީރު މޫސާ ޒަމީރުވެސް އެމެރިކާއަށް ވަޑައިގެން މިފަދަ މަޝްވަރާތަކެއް ކުރިއަށް ގެންގޮސްފައިވެ އެވެ.