ރައްޔިތުންގެ މަޖިލީހުގެ ރައީސް ދިރިއުޅުއްވާ ގެކޮޅު -- މުރައިދޫގޭގެ ޗީފް އޮފް ސްޓާފްގެ މަގާމަށް "އަވަސް"ގެ ކުރީގެ ޗީފް އެޑިޓަރު އާދަމް ހަލީމު (މުންޑޫ) އައްޔަންކުރައްވައިފި އެވެ.
އާދަމް ހަލީމު މި މަގާމަށް އައްޔަންކުރެއްވީ މަޖިލީހުގެ ރައީސް އަބްދުއްރަހީމް އަބްދުﷲއަށް ލިބިވަޑައިގަންނަވާ ބާރުގެ ދަށުންނެވެ.
މަޖިލީހުގެ އިދާރާ އިން މައުލޫމާތު ދިން ގޮތުގައި މިދިޔަ ޖުލައި މަހުގެ 28 ވަނަ ދުވަހުން ފެށިގެން އާދަމް ހަލީމު ގެންދަވަނީ މަގާމުގެ މަސްއޫލިއްޔަތު އަދާކުރައްވަމުންނެވެ.
ލ. މުންޑޫއަށް އުފަން އާދަމް ހަލީމު ވަނީ ނޫސްވެރިކަމުގެ ދާއިރާގައި 25 އަހަރަށް ވުރެ ގިނަ އަހަރު މަސައްކަތް ކުރައްވާފަ އެވެ. މިމުއްދަތުގެ ތެރޭގައި އާދަމް ހަލީމް ވަނީ އަވަސްގެ އިތުރުން "ހަވީރު"، "އާފަތިސް" އަދި "ވީނިއުސް"ގައި ވެސް މަސައްކަތް ކުރައްވާފަ އެވެ. އެންމެ ފަހުން އޭނާ ހުންނެވީ "ދަ މިރަ"ގެ އެންމެ އިސް ބޭފުޅެއްގެ ގޮތުގައެވެ.
އޭނާއަށް ވަނީ ނޫސްވެރިކަމުގެ ދާއިރާއިން ރައީސުލްޖުމްހޫރިއްޔާ ދެއްވާ އާންމު ހިދުމަތުގެ ހިތްވަރު އިނާމާއި ރަންގަލަން ވެސް ލިބިވަޑައިގެންފަ އެވެ.
މަޖިލީހުގެ ރައީސް އަބްދުއްރަހީމް މުރައިދޫގެއަށް ބަދަލުވެވަޑައިގަތީ މިދިޔަ ޖުލައި 26 ވަނަ ދުވަހު އެވެ.
ރައްޔިތުންގެ މަޖިލީހުގެ ރައީސް ދިރިއުޅުއްވުމަށް ދައުލަތުން ހާއްސަ ގެކޮޅެއް ހަމަޖެއްސީ ކުރިން އެ މަގާމުގައި ހުންނެވި ކުރީގެ ރައީސް މުހައްމަދު ނަޝީދަށް މެއިބ 6، 2021 ގައި ދިން ބޮމުގެ ހަމަލާއަށްފަހު ސަލާމަތީ ގޮތުން އެޅުއްވި ފިޔަވަޅެއްގެ ގޮތުގައެވެ.