ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) ގެ އޮފީސް ހިންގުމަށް އެ އެޖެންސީން ކުއްޔަށް ހިފާފައިވާ އިމާރާތެއްގައި ޓިވީ ޗެނަލެއް ހިންގަމުންދާ ކަމަށް ކުރެވޭ ތުހުމަތުތައް ސަރުކާރުގެ ސަމާލު ކަމަށް ގެނައުމަށް ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމް ހުށަހެޅުއްވި ކުއްލި މައްސަލަ ބަލައިނުގަނެ ބޭރުކޮށްލައިފި އެވެ.
މަޖިލީހުގެ މިއަދުގެ ޖަލްސާގައި މަޖިލީހުގެ ރައީސް އަބްދުއްރަހީމް އަބްދުﷲ ވަނީ މީކާއީލް ހުށަހެޅުއްވި ކުއްލި މައްސަލައިގައި މަޖިލީހުގެ ގަވާއިދުގައި ބަޔާންކުރާ ޝަރުތު ފުރިހަމަ ނުވާތީ އެ މައްސަލަ މި ޖަލްސާއަށް ހުށަހެޅެން ނެތް ކަމަށެވެ.
މީކާއީލް ހުށަހެޅުއްވި ކުއްލި މައްސަލައިގައި ބުނަނީ އެންސްޕާގެ އޮފީސް ހިންގުމަށް އިމާރާތެއް ކުއްޔަށް ނެގުމަށް މި އަހަރުގެ ޖޫން 25 ވަނަ ދުވަހު ނެޝަނަލް ޓެންޑާ ބޯޑު މެދުވެރިކޮށް އިއުލާނުކުރި ކަމަށެވެ.
އެ އިއުލާނާ ގުޅިގެން ބިޑު ހުށަހެޅި ފަރާތްތަކުގެ ތެރެއިން މޯލްޑިވްސް މީޑިއާ ހައުސް ޕްރައިވެޓް ލިމިޓެޑް ކުންފުންޏަށް އެ ބިޑް އެވޯޑްކޮށް ހަތަރު ފްލޯގެ ފަސް އަހަރު ދުވަހުގެ ކުލީގެ ގޮތުގައި 34.8 މިލިއަން ރުފިޔާ އެކީ އެއްފަހަރާ ދިނުމަށްފަހު އެ ކުންފުނިން ހަތަރު ފްލޯ ކުއްޔަށް ހިފުމަށްފަހު އޭގެ ތެރެއިން ދެ ފްލޯ، މޯލްޑިވްސް މީޑިއާ ހައުސް ޕްރައިވެޓް ލިމިޓެޑުން މިދިޔަ މަހުގެ 28 ގައި ހިންގަން ފެށި އެމްއެމްޓީވީ ހިންގުމަށްޓަކައި ކުއްޔަކާ ނުލައި އެ ކުންފުންޏަށް ދީފައިވާ ކަމަށް ސޯޝަލް މީޑިއާގައި ތުހުމަތު ކުރެވެމުންދާ ކަމަށް ކުއްލި މައްސަލައިގައި ބުނެފައިވެ އެވެ.
އެ ޓީވީގައި މަސައްކަތް ކުރުމަށް ވަޒީފާ ދީފައިވާ ނޫސްވެރިންނާއި ޕްރެޒެންޓަރުންގެ ތެރޭގައި ދައުލަތުގެ އެކިއެކި އިދާރާތަކުގައި މަސައްކަތް ކުރަމުންދާ މުވައްޒަފުން ހިމެނޭ ކަމަށާއި އެ މުވައްޒަފުންނަށް އެ ޓީވީގައި އަދާކުރާ ވަޒީފާއަށް ދޭންޖެހޭ އުޖޫރަ ދެމުން ގެންދަނީ ދައުލަތުގެ އިދާރާތަކުގެ ބަޖެޓުން ކަމަށް ތުހުމަތު ކުރެވޭ ކަމަށްވެސް ބުނެފައިވެ އެވެ.
އެމްއެމްޓިވީ އޮޕަރޭޓްކުރުމަށް އެއާފްރައިޓްކޮށް އިކްއިޕްމަންޓް ގެނެސްފައިވާއިރު އެ ތަކެތި ކަސްޓަމުން ނެރެފައިވަނީ ގާނޫނާ ހިލާފަށް އިމްޕޯޓް ޑިއުޓީ މައާފުކޮށްގެން ޑިއުޓީއަށް އެއްވެސް ފައިސާއެއް ނުދައްކާ ކަމަށް ތުހުމަތު ކުރެވޭ ކަމަށް ކުއްލި މައްސަލައިގައި ބުނެފައިވެ އެވެ.
މޯލްޑިވްސް މީޑިއާ ހައުސް ޕްރައިވެޓް ލިމިޓެޑްއަކީ މީޑިއާގެ މަސައްކަތް ކުރުމަށް އެކުލަވާލައިފައިވާ ކުންފުންޏެއްކަން އެ ކުންފުނީގެ ނަމުންވެސް ދޭހަވާއިރު އެންސްޕާއަށް އޮފީހެއް ކުއްޔަށް ނެގުމާގުޅޭ ބިޑް މީޑިއާ ކުންފުންޏަކަށް ހަވާލުކޮށްފައިވުމުންވެސް މި މުއާމަލާތަކީ ސައްހަ މަގުން ހިންގާފައިވާ މުއާމަލާތެއް ކަމަށް ޝައްކު ކުރެވޭ ކަމަށް ކުއްލި މައްސަލައިގައި ވަނީ ބުނެފަ އެވެ.
ތުހުމަތުތަކުގައި ހަގީގަތެއް އެކުލެވޭނަމަ މިއީ ދައުލަތުގެ ޕްރޮކިއޯމަންޓް ނިޒާމު ނަހަމަ ގޮތުގައި ބޭނުންކޮށްގެން ހިންގައިފައިވާ ބޮޑު ހިޔާނާތެއް ކަމަށާއި އެމްއެމްޓީވީ ހިންގުމަށާއި އެ ތަނުގައި މަސައްކަތްކުރާ މުވައްޒަފުންގެ އުޖޫރަ ދިނުމަށް ދައުލަތުގެ މާލިއްޔަތުން ހޭދަކުރަމުންދާނަމަ އެއީ ދައުލަތުގެ މާލިއްޔާއިން ހިންގޭ ބޮޑު ވައްކަމާއި ކޮރަޕްޝަންގެ އަމަލެއް ކަމަށް ކުއްލި މައްސަލައިގައި ފާހަގަކޮށްފައިވެ އެވެ.
އެންސްޕާގެ ބަޖެޓުން މިފަދައިން ފައިސާ ހޭދަކުރުމަކީ އެ އެޖެންސީއާ ގާނޫނީ ގޮތުން ލާޒިމުކޮށްފައިވާ މަސްއޫލިއްޔަތު އަދާކުރުމުގެ ގޮތުން ރައްޔިތުންގެ ތެރެއިން އިޖުތިމާއީ ރައްކާތެރިކަމަށް ބޭނުންޖެހިފައިވާ މީހުންނަށް އެހީތެރިކަން ފޯރުކޮށްދިނުމަށް ހުންނަ ފައިސާ ހުސްވެ ދައުލަތުގެ ފަރާތުން އެފަދަ އެހީތެރިކަން ފޯރުކޮށްދިނުން ހުއްޓުމަކަށް އަތުވެދާނެ ކަމެއް ކަމަށްވެސް ކުއްލި މައްސަލައިގައިވެ އެވެ.
މި ކުއްލި މައްސަލަ ހުށަހެޅިއިރު އެންސްޕާ ހިންގަން އިމާރާތެއް ހޯދުމަށް މުއާމަލާތްކުރީ ފިނޭންސް މިނިސްޓްރީއާއެކު ކަމަށާއި އިތުރު ފަރާތަކާ މުއާމަލާތް ކޮށްފައިނުވާނެ ކަމަށް އެ އެޖެންސީން ވަނީ ބުނެފަ އެވެ.