އަކިރި ނަގަން ގޮސް އުޅުނު މީހަކު މާވަހަރެއް ކަމަށް ބެލެވޭ އެއްޗެއް ހޮވައިފި އެވެ.
ރ. ފައިނުގެ އުމުރުން 24 އަހަރުގެ ޒުވާނަކު އެ ރަށު ގޮނޑުދޮށުން މާވަހަރެއް ކަމަށް ބެލެވޭ އެއްޗެއް ހޮވީ މިދިޔަ ހުކުރު ދުވަހު އެވެ.
އޭނާ އަށް މި އެއްޗެއް ފެނުނީ އަމިއްލަ މަސައްކަތެއް ކޮށްލުމަށް އަކިރިކޮޅެއް ނަގަން އުޅުމުގެ ތެރޭގައި ކަމަށްވެ އެވެ.
އޭނާ ހޮވި އެއްޗަކީ މާވަހަރެއްތޯ ބެލުމަށް އެ އެއްޗެއް މިހާރު ވަނީ މާލެ ގެނެސްފަ އެވެ. ނަމަވެސް މާލޭގައިވެސް ސީދާ އެފަދަ ޓެސްޓް ހެދެން ނެތުމުން އެފަދަ ތަކެތި ޔަގީންކޮށްދޭ މީހަކަށް ދެއްކުމުން އެއީ މާވަހަރު ކަމަށް ބުނާ ކަމަށްވެ އެވެ.
މަވާހަރު ކަމަށް ބުނާ އެއްޗެއް ހޮވި ޒުވާނާ މިހާރު ގެންދަނީ އޭގެ ސާމްޕަލް ބޭރަށް ފޮނުވައިގެން ނަމަވެސް އެއީ މާވަހަރެއްތޯ ޔަގީންކުރުމުގެ މަސައްކަތް ކުރަމުންނެވެ.