ހިސާބު އިލްމުވެރިޔެއްގެ ގޮތުގައި ގިނަ ބަޔަކު ދަންނަ އަލީ މާހިރު އަވަހާރަވެއްޖެ އެވެ.
ކުރީގެ ރައީސް އިބްރާހީމް ނާސިރުގެ އާއިލީ ބޭފުޅެއް ކަމުގައިވާ އަލީ މާހިރު އުމުރުން 90 އަހަރުގައި އިއްޔެ އަވަހާރަވީ ގިނަ ދުވަސްތަކަކު އާލަސްކަންފުޅާ އުޅުއްވުމަށްފަހު އެވެ.
މިސްރުގައި އިންޖިނިއަރިންގެ ދާއިރާއިން ތައުލީމު ހާސިލް ކުރައްވާފައިވާ އަލީ މާހިރަކީ ފަލަކީ އިލްމުގައިވެސް ފާހަގަކުރެވުނު ބޭފުޅެކެވެ.
އަލީ މާހިރުގެ ފާހަގަކޮށްލެވޭ މަސައްކަތްތަކަށް ބަލާއިރު ދިވެހި ކަލަންޑަރު ހެދުމާއި، ދިވެހިރާއްޖެއަށް ނަމާދު ގަޑިތައް ތަރުތީބުކޮށްދެއްވުން ހިމެނެ އެވެ.
އަލީ މާހިރު ވަނީ ދިވެހި ދައުލަތުގެ އިސް މަގާމުތަކެއްވެސް ފުރުއްވާފަ އެވެ. އެގޮތުން ފަޑިޔާރުގެ -- މަހްކަމަތުއްޝަރުއިއްޔާގައި ޝަރީއަތް ކުރެއްވުމާއި ސަރުކާރު ބޮޑުއިސްޓޯރުގެ މެނޭޖަރުކަމާއި، ގައުމީ ކުތުބުހާނާގެ ވެރިޔާގެ މަގާމުވެސް ފުރުއްވާފައިވެ އެވެ.