ވެލާނާގެ އަބްދުލްމަޖީދު މާހިރު މިއަދު އަވަހާރަވެއްޖެ އެވެ.
ކުރީގެ ރައީސް އިބްރާހީމް ނާސިރުގެ ބޮޑުބޭބެ -- އަބްދުލްމަޖީދު އަވަހާރަވުމާ ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒުވެސް ވަނީ އެ އާއިލާއަށް ތައުޒިޔާ ވިދާޅުވެފަ އެވެ.
ރައީސްގެ މެސެޖުގައި ވިދާޅުވީ އަބްދުލްމަޖީދަކީ ދިވެހިރާއްޖޭގެ އިސް ރަށްވެހީންގެ ތެރެއިން ނުހަނު ގަދަރުވެރި، ޚިދުމަތްތެރި، ތަޖުރިބާކާރު ހަރުދަނާ ޝަހްސިއްޔަތެއް ކަމަށެވެ.
"އަބްދުލްމަޖީދު މާހިރަކީ، މާލޭ މުނިސިޕަލް ކައުންސިލްގެ ރައީސްކަމުގެ އިތުރަށް ސަރުކާރުގެ އެކި އިދާރާތަކުގައި އިސް މަގާމުތަކެއް ފުރުއްވާފައިވާ ބޭފުޅެކެވެ. މަރްހޫމު މާހިރަކީ ދިވެހި ބޭސްވެރި ހަކީމެކެވެ. ދިވެހި ތާރީހާއި އާދަކާދައިގެ އެތައް މައުލޫމާތެއް މިއަދުގެ ޖީލަށް އޮޅުންފިލުއްވައިދެއްވި އުސްތާޒެކެވެ. ގައުމަށް ހިދުމަތްތެރި އިލްމީ ގާބިލް ދަރީންތަކެއް ތަރުބިއްޔަތު ކުރެއްވި އަގުހުރި ބައްޕައެކެވެ،" ރައީސްގެ މެސެޖުގައި ވިދާޅުވެފައިވެ އެވެ.
އަބްދުލްމަޖީދުގެ ބޭފުޅުންގެ ތެރެއިން އެންމެ ގިނަ ބަޔަކަށް އެނގޭ ދެ ބޭފުޅުންނަކީ ކުރީގެ ޑިފެންސް މިނިސްޓަރު އަމީން ފައިސަލާއި ދިވެހިރާއްޖެއިން އިނގިރޭސިވިލާތަށް ކުރިން ކަނޑައަޅާފައި ހުންނެވި ސަފީރު ފަރަހަނާޒް ފައިސަލް އެވެ. އަބްދުލްމަޖީދުގެ އިތުރު ބޭފުޅުންވެސް ތިއްބަވަ އެވެ.
އުމުރުފުޅުން 96 އަހަރުގައި މިއަދު އަވަހާރަވި އަބްދުލްމަަޖީދުގެ ބައްޕައަކީ ވެލާނާ މުހައްމައިދީ އެވެ. މަންމައަކީ ފުވައްމުލަކު ފުނާޑު ގަނޑުވަރު އައިޝާ ދީދީ އެވެ.