ކުޑަކުއްޖަކާ އެކު ޖިންސީ ގުޅުން ހިންގި މީހަކު 25 އަހަރަށް ޖަލަށްލުމަށް ކްރިމިނަލް ކޯޓުން ހުކުމްކޮށްފި އެވެ.
މިމައްސަލައިގައި ޑިސެންބަރު 17، 2020 ގައި ދައުލަތުން ދައުވާކުރީ ނަސްރުﷲ ފާއިޒު ކިޔާ މީހަކަށެވެ.
މިއީ ކުޑަކުދިންގެ މަސްލަހަތު ހިމެނޭ މައްސަލައަކަށްވާތީ ދައުވާ ލިބުނު މީހާގެ އިތުރު އެއްވެސް މައުލޫމާތެއް އަދި މިއަމަލު ހިންގި އެއްވެސް ތަނެއްގެ މައުލޫމާތުވެސް ކޯޓުން ހާމަކޮށްފައެއް ނުވެ އެވެ.
ނަސްރުﷲ ފާއިޒުގެ މައްޗަށް ހުކުމްކޮށްފައިވަނީ މިދިޔަ ޑިސެމްބަރު 30 ވަނަ ދުވަހު އެވެ.
އޭނާގެ މައްޗަށް ދައުލަތުން އުފުލި ތިން ދައުވާގެ ތެރެއިން ދެ ދައުވާ ވަނީ ސާބިތުވެފަ އެވެ. އޭނާގެ މައްޗަށް ސާބިތު ނުވީ އޮރިޔާންކާޑު ގެންގުޅުގެ ކުށުގެ ދައުވާ އެވެ.
އޭނާގެ މައްޗަށް ސާބިތުވީ ޖިންސީ ނިޔަތެއް އޮވެގެން ކުޑަކުއްޖެއްގެ ހަށިގަނޑުގައި އަތްލުމުގެ ކުށުގެ ދައުވާގައި ކޯޓުން ހުކުމް ކުރީ 15 އަހަރަށް ޖަލަށް ލުމަށެވެ. ސާބިތުވި އަނެއް ދައުވާ ކަމަށްވާ ކުޑަކުއްޖަކު އިތުބާރުކުރަންޖެހޭ މަގާމެއްގައި ހުރި މީހަކު، އެ ކުޑަކުއްޖާއާއެކު ޖިންސީ އަމަލެއް ހިންގުމުގެ ކުށުގެ ދައުވާގައި އިއްވީ 10 އަހަރުގެ ޖަލު ހުކުމެކެވެ.