ކުޑަކުއްޖަކަށް ޖިންސީ ގޯނާކުރި މީހަކު 18 އަހަރަށް ޖަލަށް ލުމަށް ހުކުމްކޮށްފި އެވެ.
ކްރިމިނަލް ކޯޓުން މި ހުކުމް ކޮށްފައިވަނީ ނާޒިމް އިބްރާހީމް ކިޔާ މީހަކަށެވެ.
ކޯޓުގެ ހުކުމްގައި ވަނީ ކުޑަކުދިންނަށް ޖިންސީ ގޯނާކުރާ މީހުންނާ މެދު ހާއްސަ އުސޫލުތަކަކަށް އަމަލުކުރުމުގެ ގާނޫނުގެ ދަށުން، ކުޑަކުއްޖަކު އިތުބާރުކުރަން ޖެހޭ މަގާމެއްގައި ހުރެ، އެ ކުއްޖާއާ އެކު ޖިންސީ އަމަލެއް ހިންގުމުގެ ކުށުން ނާޒިމު ކުށްވެރިވާ ކަމަށް ކަނޑައަޅާފަ އެވެ.
ކުށުގެ އަދަބެއްގެ ގޮތުގައި ކަނޑައަޅާފައިވަނީ އޭނާ 18 އަހަރަށް ޖަލަށްލުމަށެވެ.
މިމައްސަލައަކީ ކުޑަކުއްޖެއްގެ މަސްލަހަތު ހިމެނޭ މައްސަލައަކަށްވާތީ ހުކުމުގެ ތަފްސީލް ކޯޓުން ހިއްސާކޮށްފައެއް ނުވެ އެވެ.
މިމައްސަލައިގައި ފާތިމަތު ލީޒާ ކިޔާ މީހަކަށްވެސް ދައުވާ ކުރި އެވެ. އޭނާއަށް ދައުވާ ކުރީ އެ ކުއްޖާއަށް ޖިންސީ ގޯނާ ކުރިކަން އެނގިހުރެ އެކަން އަންގާފައި ނުވާތީ އެވެ. އެކަމަކު ދައުވާ ސާބިތުވާ ވަރަށް ހެކި ހުށަހަޅާފައި ނުވާތީ އޭނާގެ މައްޗަށް ކުށް ސާބިތުވެފައެއް ނުވެ އެވެ.