ޔޫރަޕިއަން ޔޫނިއަން (އީޔޫ)އަށް ބޭނުންވާ ތެލާއި ގޭސް އެމެރިކާ އަތުން ނުގަނެފިނަމަ ޓެކްސް ބޮޑުކުރާނެ ކަމަށް ވިދާޅުވެ ޔޫރަޕްގެ ގައުމުތަކަށް އެމެރިކާގެ އިންތިހާބީ ރައީސް ޑޮނަލްޑް ޓްރަމްޕް އިންޒާރު ދެއްވައިފި އެވެ.
ޔޫރަޕަށް ބިރުދައްކަވައި ޓްރަމްޕް ވިދާޅުވީ އޭނާގެ ސަރުކާރުން ޔޫރަޕަށް ފާރަލާނެ ކަމަށާއި، އެމެރިކާއިން އަންގާ ގޮތާ ހިލާފުވާ ބަޔަކަށް އޮތީ ބޮޑު ޓެކުހެއް ކަމަށެެވެ.
ޔޫރަޕިއަން ޔޫނިއަނުން އެމެރިކާއަށް އެތެރެކުރާ މުދަލުން ނަގާ ޓެކްސް ބޮޑުކުރާނެ ކަމަށް ވިދާޅުވެ ޓްރަމްޕް ވަނީ މީގެ ކުރިންވެސް އިންޒާރު ދެއްވާފަ އެވެ.
ރިޔާސީ އިންތިހާބަށް ކެމްޕޭން ކުރެއްވި ދުވަސްވަރުވެސް ޔޫރަޕަށް އިންޒާރު ދެއްވައި، ޔޫރަޕިއަން ޔޫނިއަންގެ ބަލަދު އެމެރިކާއަށް ނާރާނެ ކަމަށް ވިދާޅުވި އެވެ.
ޔޫރަޕަށް ބޭނުންވާ ތެލާއި ގޭސް އެމެރިކާ އަތުން ނުގަނެފިނަމަ އެ ގައުމާ ދެކޮޅަށް ދަތިކުރާނެ ކަމަށްވެސް ޓްރަމްޕް ވިދާޅުވި އެވެ. އަދި އެއީ ނޭޓޯ ގައުމެއް ނަމަ، ނޭޓޯއަށް ދައްކަން ޖެހޭ ޖިޒީއާ މެދު ވަރަށް ސީރިއަސްކޮށް އެމެރިކާ ދެކޭނެ ކަމަށްވެސް ވިދާޅުވި އެވެ.
ޓްރަމްޕްގެ ސަރުކާރެއްގައި އެމެރިކާއަށް މުދާ އެތެރެކުރާ ކޮންމެ ގައުމަކުން 10 ޕަސެންޓުގެ އިމްޕޯޓް ޑިއުޓީއެއް ނަގާނެ ކަމަށް އޭނާ ވިދާޅުވި އެވެ. އަދި ކެނެޑާ އާއި މެކްސިކޯއިން ނަގާ ޓެކްސް އިތުރުކުރާނެ ކަމަށްވެސް ވިދާޅުވި އެވެ.
މީގެ އިތުރުން ޗައިނާގެ މުދަލުން 60 ޕަސެންޓް ޓެކުހެއް ނަގާނެ ކަމަށްވެސް ޓްރަމްޕް ވިދާޅުވި އެވެ.