ރައްޔިތުން މަޖިލީހުގެ މީޑިއާ އެންޑް ކޮމިއުނިކޭޝަން ޑިރެކްޓަރުގެ މަގާމަށް މީހަކު ހޯދަން އަނެއްކާވެސް އިއުލާންކޮށްފި އެވެ.
ރައްޔިތުން މަޖިލީހުގެ މީޑިއާ އެންޑް ކޮމިއުނިކޭޝަން ޑިރެކްޓަރުގެ މަގާމަށް މީހަކު ހޯދަން ތިންވަނަ ފަހަރަށް އިއުލާންކޮށްފައި މިވަނީ ކުރިން އެ މަގާމުގައި ހުންނެވި ހަސަން ޒިޔާއު (ޒިޔާ) ކުއްލި ގޮތަކަށް މަގާމުން ވަކިކުރުމަށްފަހު އެވެ.
މަޖިލީހުގެ މީޑިއާ ޑިރެކްޓަރުގެ މަގާމުގެ މައިގަނޑު މަސްއޫލިއްޔަތަކީ ރައްޔިތުންގެ މަޖިލީހުގެ މީޑިއާ އެންޑް ކޮމިއުނިކޭޝަން ސެކްޝަނާ ހަވާލުވެ ހުންނަ ވެރިޔާގެ ހައިސިއްޔަތުން ރައްޔިތުންގެ މަޖިލީހާއި މަޖިލީހުގެ އިދާރާގެ ޕަބްލިކް ރިލޭޝަންސް އަދި މީޑިއާއާ ގުޅޭ އެންމެހާ މަސައްކަތްތަކާއި ސެކްޝަންގެ އިދާރީ އެންމެހާ މަސައްކަތްތައް ރައްޔިތުންގެ މަޖިލީހުގެ އަމީން އާންމު ނުވަތަ ޑިޕާޓްމަންޓް ހިންގުމާ ހަވާލުވެ ހުންނަ ވެރިޔެއްގެ ލަފައާ އިރުޝާދުގެ ދަށުން ރާވައި ހިންގުމެވެ. އަދި ރައްޔިތުންގެ މަޖިލީހުގެ ޖަލްސާތަކާއި، ކޮމިޓީތަކާއި، އެކި އިވެންޓްތައް ބްރޯޑްކާސްޓްކުރުމަށް ކުރަންޖެހޭ އެންމެހާ ކަންކަން ބެލެހެއްޓުމާއި، ހަބަރު ތައްޔާރުކުރުމާއި، ސޯޝަލް މީޑިއާ އަދި ވެބްސައިޓް ދުވަހުން ދުވަހަށް އަޕްޑޭޓްކުރުމުގެ ކަންކަން ބެލެހެއްޓުންވެސް ހިމެނެ އެވެ.
މަޖިލީހުގެ މީޑިއާ ޑިރެކްޓަރު ޒިޔާއު މަގާމުން ވަކިކޮށްފައިވަނީ ޕާލިމަންޓަރީ ސާވިސްގެ ކޯޑް އޮފް ކޮންޑަކްޓާ ހިލާފުވުމުގެ ސަބަބުން ކަމަށް މަޖިލީހުން ކުރިން ބުނެފައިވެ އެވެ. ނަމަވެސް ޒިޔާއު ވިދާޅުވީ މަޖިލީހުގެ ކޯޑް އޮފް ކޮންޑަކްޓާ ހިލާފުވާ ފަދަ އެއްވެސް ކަމެއް އޭނާ ކުރައްވާފައި ނުވާނެ ކަމަށެވެ. މަގާމުން ވަކިކުރީ ކޯޑް އޮފް ކޮންޑަކްޓާ ހިލާފަށް މަޖިލީހުގެ އިސް ބައެއް ބޭފުޅުން އެންގެވި ބައެއް ކަންކަން އޭނާ ނުކުރެއްވުމުން ކަމަށްވެސް ޒިޔާއު ވިދާޅުވި އެވެ. ޒިޔާއު ހިލާފުވީ ކަމެއް މަޖިލީހުގެ އިދާރާ އިން މީޑިއާގައިވެސް ބުނެފައެއް ނުވެ އެވެ.
ޕަބްލިކް ސާވިސް މީޑިއާ (ޕީއެސްއެމް) ގައި 13 އަހަރަށް ވުރެ ގިނަ ދުވަހު މަސައްކަތް ކުރުމަށް ފަހު، ނޫސްވެރިޔާ ޒިޔާ މަޖިލީހާ ގުޅުނީ 2019 ވަނަ އަހަރު އެވެ. ޓީވީއެމުން އިސްތިއުފާ ދެއްވިއިރު ޒިޔާއު ހުންނެވީ އެ ސްޓޭޝަންގެ މެނޭޖަރެއްގެ މަގާމުގަ އެވެ.