ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ޗެއާމަން ފިޔަވައި ބޯޑުގެ ހުރިހާ މެންބަރުން ސަސްޕެންޑްކޮށްފި އެވެ.
އެޗްޑީސީގެ ބޯޑު ސަސްޕެންޑްކޮށްފައި މިވަނީ ބިންވެރިޔާ ސްކީމްގައި ނުހިމެނޭ ބަޔަކަށް ގޯތިތަކެއް ދީފައިވާ މައްސަލަ ފެންމަތިވެ ތަހުގީގު ފަށާފައިވަނިކޮށެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ) އިން މިއަދު ނެރުނު ނޫސްބަޔާނެއްގައި ބުނީ އެޗްޑީސީއާ ގުޅޭ ގޮތުން ފުލުހުން ކުރިއަށްގެންދާ ތަހުގީގަށް ޖާގަދީ ފުރިހަމަ އެހީތެރިކަން ފޯރުކޮށްދިނުމުގެ ގޮތުން އެ ތަހުގީގު ނިމި ޕީސީބީ އިން ވަކި ގޮތެއް އަންގަންދެން އެޗްޑީސީގެ ޗެއާމަން އަހުމަދު ނާސިފު ފިޔަވައި ޑިރެކްޓަރުންގެ ބޯޑުގެ ހުރިހާ މެންބަރުން މިއަދުން ފެށިގެން ސަސްޕެންޑްކޮށްފައިވާ ކަމަށެވެ.
މީގެ އިތުރުން އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދުވެސް ޕީސީބީ އިން ވަކި ގޮތެއް އަންގަންދެން އޮފީހަށް ނުނިކުމެވޭ ގޮތަށް ސަސްޕެންޑްކޮށްފައިވާ ކަމަށް މި ބަޔާނުގައި ބުނެފައިވެ އެވެ.
އެޗްޑީސީގެ ޗެއާމަން ފިޔަވައި ބޯޑުގެ ހުރިހާ މެންބަރުން ސަސްޕެންޑްކޮށްފައިވާއިރު ފޯޖުކޮށްފައިވާ ލިޔުންތަކެއް ބޭނުންކޮށްގެން ބިންވެރިޔާ ސްކީމުގެ ދަށުން ގޯތި ލިބިފައިވާ ކަމަށް ދައްކައިގެން އެ ގޯތި ތަކުގައި އިމާރާތްކުރުމަށް ބޭނުންވެ އެކަމުގެ ހުއްދައަށް އެދުނު މައްސަލައެއް ވަނީ ފަޅާއަރާފަ އެވެ.
ފޯޖުކޮށްފައިވާ ލިޔުންތަކެއް ބޭނުންކޮށްގެން ގޯތި ހޯދަން އުޅުނު މީހުންގެ ތެރޭގައި އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދުގެ ބޭބެ ފަޒީލް ރަޝީދުވެސް ހިމެނިފައިވެ އެވެ.
ނޫސްވެރިންނާ ބައްދަލުކުރައްވާ ފަޒުލް ރަޝީދު ރޭ ވިދާޅުވީ ހައުސިން މިނިސްޓްރީން ޔަގީންކުރަންޖެހޭ ހުރިހާ ކަމެއް ޔަގީންކުރުމަށްފަހު ނޫނީ ބިންވެރިޔާ ސްކީމުގެ ދަށުން އެއްވެސް ގޯއްޗެއް ހުޅުމާލެ އިން ދޫކޮށްފައި ނުވާނެ ކަމަށެވެ.
މިމައްސަލަ ފެންމަތިވެ ވަރަށް ބޮޑަށް ހޫނުވުމާ ގުޅިގެން ނޫސްވެރިންނާ ރޭ ބައްދަލުކުރައްވާ ފަޒުލް ވިދާޅުވީ ބިންވެރިޔާ ސްކީމުގެ ދަށުން ލިބުނު ކަމަށް ބުނާ ގޯތިތަކެއްގައި އިމާރާތް ކުރުމުގެ ހުއްދައަށް އެދުމުން އެ އޮންނަ އުސޫލުން ހައުސިން މިނިސްޓްރީ ތެރެއިން ބޭނުންވާ މައުލޫމާތުތައް ސާފުކުރުމަށް އެޗްޑީސީ އިން އެ މިނިސްޓްރީއަށް މިދިޔަ ޖުލައި 22 ވަނަ ދުވަހު ސިޓީ ފޮނުވާފައިވާނެ ކަމަށެވެ. އެޗްޑީސީގެ ސިޓީއަށް މިނިސްޓްރީން ޖަވާބު ދީފައިވަނީ މިދިޔަ އޯގަސްޓް 15 ވަނަ ދުވަހު އެވެ.
ފަޒުލް ވިދާޅުވި ގޮތުގައި އެޗްޑީސީ އިން މިނިސްޓްރީއަށް ސިޓީ ފޮނުވަންޖެހުނީވެސް އެއް ބިމަކަށް ދެ މީހުން އެދުމުން އެކަން ކަށަވަރުކުރުމުގެ ގޮތުންނެވެ. ސޯޝަލް މީޑިއާގައި ދައުރުވަނީ މައްސަލަ ދިމާވި ދެ ބިމަކާ ގުޅޭ ލިޔުންތައް ކަމަށްވެސް ޔަގީންކޮށްދެއްވި އެވެ. އަދި މިނިސްޓްރީގެ ޖަވާބު ލިބުމާ އެކު ބިމުގެ "ޕާމިޓް" އެޗްޑީސީ އިން ކެންސަލްކުރި ކަމުގައިވެސް ވިދާޅުވި އެވެ
"އަޅުގަނޑުމެން އެއްވެސް ހާލެއްގައި މިނިސްޓްރީ އޮފް ހައުސިން އިން ނާންގާ ފަރާތަކަށް ބިމެއް ހަވާލުކޮށްފައެއް ނުވާނެ،" ފަޒުލް ވިދާޅުވި އެވެ.
ފަޒުލް ވިދާޅުވި ގޮތުގައި ފުރަތަމަ ބިން (20768) އިމާރާތްކުރަން ބޭނުންވެ ހުއްދަ ހޯދުމަށް ހުށަހަޅާފައި އޮތީ މިދިޔަ ޖޫން 30 ވަނަ ދުވަހު އެވެ. ދެވަނަ ބިން (20821) އިމާރާތްކުރަން ބޭނުންވެ ހުއްދަ ހޯދުމަށް ހުށަހަޅާފައި އޮތީ މިދިޔަ ޖޫން 29 ވަނަ ދުވަހު އެވެ.
މިމައްސަލައިގައި އޭނާގެ ބޭބެގެ ނަން ހިމެނިފައި އޮތް ނަމަވެސް މިމައްސަލައިގައި ގޯސްކޮށް ހިނގައިގެން އުޅޭ އެއްވެސް ކަމެއްގައި ފަޒުލްގެ ބައިވެރިވުމެއް ނެތް ކަމަށްވެސް އޭނާ ވިދާޅުވި އެވެ. އެހެންވެ ހަގީގަތާ ހިލާފު ވާހަކަތައް ފަތުރަނީ އަގުވައްޓާލަން ކަމުގައިވެސް ވިދާޅުވި އެވެ. ބޭބެގެ މައްސަލަ ފުލުހަށް ހުށަހަޅާފައި ނުވާނެ ކަމަށާއި ބެލީ މިނިސްޓްރީއާއި ވާހަކަދައްކައިގެން މައްސަލަ ހައްލުކުރަން ކަމަށްވެސް ވިދާޅުވި އެވެ. އަދި މިމައްސަލައިގައި އަމިއްލަ މަސްލަހަތު އިސްކޮށްގެން އެއްވެސް ކަމެއް ކުރައްވާފައި ނުވާނެ ކަމަށްވެސް ވިދާޅުވި އެވެ.