ހުޅުމާލޭ ވޯޓާ ތީމް ޕާކް އަލުން ތަރައްގީކުރަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ނިންމައިފި އެވެ.
ރައްޔިތުންގެ މަޖިލީހުގެ މާލިއްޔަތު ކޮމިޓީގައި އެޗްޑީސީގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދު ވިދާޅުވީ ވޯޓާ ތީމް ޕާކާއެކު ކުޑަކުދިން ކުޅޭ ސަރަހައްދެއް ހިމެނޭ ގޮތަށް އެ ސަރަހައްދު ތަރައްގީ ކުރުމުގެ ޕްލޭން ޑިޒައިން ކުރުމުގެ މަސައްކަތް ސްރީލަންކާގެ ކުންފުންޏަކާއެކު ކުރިއަށްދާ ކަމަށެވެ.
ފަޒުލް ވިދާޅުވި ގޮތުގައި މިހާރު ކުރިއަށްދާ އީއައިއޭގެ މަސައްކަތް ނިމުމުން އެ ސަރަހައްދު އިތުރަށް ހިއްކާ ތަރައްގީކުރުމަށް ވަނީ ނިންމާފަ އެވެ.
ހުޅުމާލޭގައި 25 މިލިއަން ޑޮލަރު (ގާތްގަނޑަކަށް 385.5 މިލިއަން ރުފިޔާ) ހަރަދުކޮށްގެން ވޯޓާ ތީމް ޕާކަކާއި ހަބުރީގެ ސިޓީ ހޮޓަލެއް އެޅުމަށް ޖުލައި 13، 2017ގައި އެޗްޑީސީން ފުރަތަމަ އެއްބަސްވުން ހެދީ މެލޭޝިއާގެ މިރީ ހައުސިން ޑިވެލޮޕްމަންޓް ރިއަލްޓީއާ އެކު އެވެ. ގާތްގަނޑަކަށް 235 މިލިއަން ޑޮލަރު ހަރަދުވާނެ ކަމަށް އޭރު ބެލެވުނު މިމަޝްރޫއަށް ބޭނުންވާ ބިން ކުއްޔަށް ދިނީ 35 އަހަރަށް އަކަފޫޓަކަށް ދެ ރުފިޔާގެ ރޭޓުންނެވެ.
މިރީ ކުންފުނިން ފަހުން ވަނީ މިމަޝްރޫއުގައި ހިމެނޭ އެ ކުންފުނީގެ ހުރިހާ ހައްގެއް ވޯޓާ ފްރަންޓް ހޮޓެލް އެންޑް ލެޝާ ކުންފުންޏަށް ބަދަލުކޮށްފަ އެވެ.
މިމަޝްރޫއުގެ މަސައްކަތް ނިންމަން ދިން އެއް އަހަރުގެ ތެރޭގައި އެކަށީގެންވާ ގޮތަކަށް މަސައްކަތް ކުރިއަށް ގެންގޮސްފައި ނުވާތީ އާއި ވަކި ހިސާބަކުން މަސައްކަތް ހުއްޓާލާފައިވާތީ އެޗްޑީސީން އެއްބަސްވުން ބާތިލްކޮށް ނޯޓިސް ފޮނުވީ އޮގަސްޓް 2022 ގަ އެވެ.
ހުޅުމާލޭގެ ދެކުނު ކޮޅުން ބްރިޖަށް އަރަންދާ ހައިވޭއާ ދިމާލުގައި އޮންނަ ބޮޑު މަގުގެ އަތިރިމައްޗަށްވާ ގޮތަށް ހަދާ ވޯޓަ ތީމް ޕާކުގައި ފެނުގެ ގިނަ ކުޅިވަރުތައް ކުޅެވޭނެ ވަސީލަތް ގާއިމް ކުރުމަށް ހަމަޖެހިފައިވެ އެވެ.
އެގޮތުން މި ތަނުގައި ވޯޓާ ސްލައިޑްސް އާއި ކުޑަކުދިންގެ ޕޫލްތައް ހުންނާނެ އެވެ. އަދި ބަމްޕަ ބޯޓްސް އާއި ވޯޓާ ހައުސްގެ އިތުރުން ވޯޓާ ރޯލާޒް އާއި ވޯޓާ ގައިރޯ އާއި އަކުއާ ލޫޕްސްގެ އިތުރުން ފައުންޓަން ސްކޮއާގެ ދިގު ފެންކޯރެއްވެސް ހަދަން ނިންމާފައިވެ އެވެ.