ކުރީގެ ބަންޑާރަ ނާއިބު އައިޝަތު އާޒިމާ ޝަކޫރު، އިސްލާމިކް ބޭންކް އޮފް މޯލްޑިވްސް (އެމްއައިބީ)އަށް 4.2 މިލިއަން ރުފިޔާ ދައްކަންޖެހޭ ކަމަށް އާޒިމާގެ ޣައިރު ހާޒިރުގައި ކުރި ހުކުމް ބާތިލުކޮށް، އެކަމަކު އެ ފައިސާ ތިން މަސް ދުވަހުގެ ތެރޭގައި ދައްކަން އާޒިމާގެ މައްޗަށް އަލުން ހުކުމްކޮށްފި އެވެ.
އާޒިމާގެ މައްޗަށް ކުރި 4.2 މިލިއަން ރުފިޔާގެ ހުކުމުގެ މައްސަލަ އޭނާގެ ފަރާތުން ހައި ކޯޓުގައި އިސްތިއުނާފް ކުރަންވެސް ކުރިން ހުށަހެޅި އެވެ. އެކަމަކު ހައިކޯޓުން ނިންމީ، އެ މައްސަލަ ހައިކޯޓަށް ބަލައި ނުގަނެ، އަލުން ސިވިލް ކޯޓަށް ހުށަހަޅާށެވެ.
މި މައްސަލަ ސިވިލް ކޯޓުން އެންމެ ފުރަތަމަ، އާޒިމާގެ ޣައިރު ހާޒިރުގައި ހުކުމްކުރީ އޭނާ ނެންގެވި ލޯނަކަށް ފައިސާ ނުދައްކާ ކަމަށް ބުނެ އިސްލާމިކް ބޭންކުން ދައުވާ ކުރުމުންނެވެ. އަދި އޭރު އޭނާ ގެންދެވީ މާލޭގެ މޭޔަރު ހޮވުމަށް ބޭއްވި ބައިއިލެކްޝަންގައި ޕީޕީއެމް ޕީއެންސީގެ ކެންޑިޑޭޓެއްގެ ގޮތުގައި ވާދަވެސް ކުރައްވަމުންނެވެ. އާޒިމާ އޭރު ވިދާޅުވީ އެގޮތަށް ހުކުމްކުރީ ލޯނު ރީސްޓްރަކްޗާ ކުރަން ބޭންކާ އެކު މަޝްވަރާ ކުރައްވަމުން ގެންދަވަނިކޮށް ކަމަށެވެ.
އެ މައްސަލައިގައި މިއަދު ސިވިލް ކޯޓުން ނިންމީ ޣައިރު ހާޒިރުގައ ކުރި ހުކުމް ބާތިލް ކުރި ނަމަވެސް އެ ފައިސާއަކީ އާޒިމާ ދައްކަވަން ޖެހޭ ފައިސާއެއް ކަމަށެވެ. އަދި ތިން މަސް ދުވަހުގެ ތެރޭގައި 4.2 މިލިއަން ދައްކަން އާޒިމާގެ މައްޗަށް މިއަދު ކުރި ހުކުމުގައި އަންގާފައިވެ އެވެ.