މިދިޔަ ސަރުކާރުން ހިންގި ބިންވެރިޔާ ސްކީމްގެ ދަށުން ހުޅުމާލެ ތިންވަނަ ފިޔަވަހިން ގޯތި ލިބުނު މީހުންނަށް އަންނަ އަހަރުގެ ޖެނުއަރީ މަހުގެ ނިޔަލަށް ގޯތިތައް ހަވާލުކޮށް ނިންމާނެ ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދު ވިދާޅުވެއްޖެ އެވެ.
އެޗްޑީސީގެ މަޝްރޫއުތަކެއް އިފްތިތާހުކުރުމަށް ރޭ ހުޅުމާލޭގެ ސެންޓްރަލް ޕާކުގައި ބޭއްވި ރަސްމިއްޔާތުގައި ފަޒުލް ވިދާޅުވީ ހުޅުމާލެ ތިންވަނަ ފިޔަވަހީގެ ހިއްކުން މަޑުޖެހިފައި އޮތްކަން ގަބޫލުކުރައްވާ ކަމަށާއި އެ މަސައްކަތް ވަރަށް އަވަހަށް ފަށާނެ ކަމަށެވެ.
""އަޅުގަނޑުމެން ޖެހުނީ ފަޅުން ބިން ހިއްކަން. ވޯޓަ ނެޓްވޯކާއި ކަރަންޓު ނެޓްވޯކް ވިއުގަ ބަދަލު ކުރަން ޖެހުނު،" ގޯތި ހަވާލުކުރުމަށް ހުރި ގޮންޖެހުންތަކާއި ގުޅޭ ގޮތުން ފަޒުލް ވިދާޅުވި އެވެ.
ރައީސް ސޯލިހްގެ ސަރުކާރުން ނިންމާފައި އޮތީ ހުޅުމާލޭގެ ދެވަނަ ފިޔަވަހިން 1،408 ގޯތި އަދި ހުޅުމާލޭގެ ތިންވަނަ ފިޔަވަހިން 699 ގޯތި ދޫކުރުމަށެވެ.
ބިންވެރިޔާ ސްކީމްގެ ތެރެއިން ހުޅުމާލޭގެ ދެވަނަ ފިޔަވަހިން ދޫކުރަން ނިންމި ހުރިހާ ގޯއްޗެއް ހަވާލުކޮށްފައިވަނީ މިދިޔަ އޮކްޓޫބަރު މަހު އެވެ.
ބިންވެރިޔާ ސްކީމުގެ ދަށުން ރައީސް ސޯލިހް ނިންމަވާފައި އޮތީ ހުޅުމާލެ، ގުޅީފަޅު އަދި ގިރާވަރުފަޅުން 9،000 އެއްހާ ގޯތި ދޫކުރުމަށެވެ.
ހުޅުމާލޭގެ ތިންވަނަ ފިޔަވަހިންނާއި، ގުޅީފަޅާއި އަދި ގިރާވަރު ފަޅުން ދޫކުރަން ނިންމާފައިވާ ގޯތިތައް އަދި ހަވާލެއް ނުކުރެ އެވެ. އެ ތަންތަނުގެ ބިން ހިއްކުމުގެ މަސައްކަތްވެސް އަދި މުޅިން ނިންމާލާފައެއް ނުވެ އެވެ.